Kulaba 14 - Libuka Lya Kuyela

Bantu bakulinyenga

¹ Niho bantu ba Ishalela bakalokele wushiku nimwawo.

² Bantu ba Ishalela balinyengelelenga Moshesha na Aloni, pe bambile ngayi, “Nisho hinga shengile shuma shashiwahe kufwila mu Engepita, hingebene muno mu libelelengwa!

³ Shumangani kati Nyambi ya Ngula ali na kututwalila mu litunga liyo? Etu tukazihiwa ku nzita, pe bakazetu na banabetu bakapukuliwa. Kaliha shikwinga shuma shashiwahe ku bokela kami ku Engepita ndi?”

⁴ Nohobene balyambashanine umo na wamina ngayi, “Tuyenu tuhate mukakutwaminina, pe tuboke ku Engepita.”

⁵ Niho Moshesha na Aloni bashinkamine hanci kumbili ya bantu ba Ishalela nimwabo.

⁶ Kami Yoshuwa mwana Nune na Kalembu mwana Yefuna, bakakuhokela babili, batabwele bivwalo byabo mu wunginga,

⁷ pe bambile ku bantu ba Ishalela ngayi, “Litunga elye tunakahokele linengi litunga lyaliwahe.

⁸ Ndi Nyambi ya Ngula uku wahilila, ukatutwalako na kutupana litunga likukunkula mahwe na wushi.

⁹ Hinga mukananganisha Nyambi ya Ngula kami hinga mwikala na bowa ku bantu bekalamo. Tukabambwangula mbwangu! Nyambi ya Ngula uli hamo nanetu kami unalobeshe banyambi babo aba babalamanga, nohobene hinga mutina.”

¹⁰ Likunge nimwalyo lya bafumbilile kubaziha na mamanya ngayi bafwe, ngoboni kubazumuka bantu hiba ku mona liyeye lya lumuni lwaku meho a Nyambi ya Ngula, hiluku moneka Hayilu ya ntanda ya shikungulukilo sha bantu ba Ishalela.

Moshesha ukulombelela bantu

¹¹ Nyambi ya Ngula wambile kuli Moshesha ngayi, “Shikati sha kukuma kuti aba bantu bakahandula? Pe shikati sha kukuma kuti osho aba bantu baka kana kukulupila mumwami, hinge ndi natendele bikomokesho byabingi mukati kabo?

¹² Nikatuma wulweli wakubula kutwesha kupangiwa na kubalobesha, ngoboni nika kutenda kwinga tata matunga amanene shikuma na ngovu kubapitakana!”

¹³ Ngoboni Moshesha wambile kuli Nyambi ya Ngula ngayi, “Obe waleta aba bantu kubafumisha mu Engepita na ngovu zobe. Oho Baengepita bakayuvwa ebye unatende ku bantu bobe,

¹⁴ bakamba ku bantu bazika mu litunga lino. Aba bantu banayuvwu ngayi Obe Nyambi ya Ngula uli hamo nanetu, pe kami walihololanga shiwahe oho likumbi lyobe lyemananga hayilu yetu, kami wayanga kumbili yetu mu likumbi lya ku shesha hanci ku mwaana na likumbi lya mundilo ku wushiku.

¹⁵ Haya ndi ukuziha bantu bobe nimwabo, mishobo eye yayuvwa mpupo yobe yikamba

¹⁶ ngayi Obe unazihili bantu bobe mu libelelengwa ndaba wakwanga kubakumisha mu litunga liya walibezele kubapanikalyo.

¹⁷ Nohobene haya Obe Nyambi ya Ngula ami nili na kukulambilila ngayi tumoneshe ngovu zobe, kami tenda ebye watukulupishile oho wambile ngayi,

¹⁸ ‘Ami Nyambi ya Ngula kaliha napilamanga shawangu, kami namoneshanga shishemo sha mwaya myaka na kuyatila wubi na bakamilandu. Ngoboni kukwanga kushushula batwanuke na bazukulu nifwako, kutwala ku shihemunwino sha wuhatu na sha wunaa ha wubi wa bahemi babo.’

¹⁹ Haya Obe Nyambi ya Ngula kwezeka ngonehe wunene wa shishemo shobe sha mwaya myaka, nikulomba ngayi, yatila wubi wa naba bantu ngonehe tuhu wabayatilanga shikati nimwasho hinga bafumina ku Engepita.”

²⁰ Nyambi ya Ngula wakumbwile ngayi, “Nabayatili, ngonehe unanyepe.

²¹ Ngoboni nikukulupisha ngayi mwa shikuma ngonehe nayoya, kami mwa shikuma ngonehe maleema a wuwahe wami ekala hano hanci nimwaho,

²² kowa waku bantu aba ukengina na kuyoya mu litunga liyo. Banamono liyeye lya lumuni lwaku meho wami na bikomokesho biya natendele ku Engepita namu libelelengwa, ngoboni banezeke kuwumina kwami, kakengikengi pe banakana kunyombatala.

²³ Kukengina mu litunga elye nalibezele ku bankakazabo bafwako. Kowa waku bantu obo bandimbwilile ukenginamo.

²⁴ Ngoboni ndaba mukamulimo wami Kalembu uli na shifwekesha sha kutapuluka kami unengi wakulunga kukwami, nikamukumisha mu litunga elye ahokelele pe bazukulyendi bakalitambula,

²⁵ mu mikulo omu Baamaleki na Bakenaani banaziki wuluno. Nzona mutenguluke, muboke na kuya mu libelelengwa mu nzila yikulumbalala ku Liwate lya matete.”

Nyambi ya Ngula ukushushula bantu ha kulinyenga

²⁶ Nyambi ya Ngula wambile kuli Moshesha na Aloni ngayi,

²⁷ “Shikati sha kukuma kuti aba bantu bababi bakuya na kulinyengela hahami? Nayuvwu shikuma bya manyengo awa!

²⁸ Haya ba kumbule nehe, ‘Mwa shikuma nikulibeza ngayi nikatenda kukwenu tuhu ebye mwanyepa. Eshe nisho anamba Nyambi ya Ngula.

²⁹ Mukafwa, pe mituntu yenu yikapanzanina mu libelelengwa elye nimwalyo. Ndaba munalinyengele hahami, kowa muntu kukwenu wa myaka kupitakana makumi abili ukengina mu litunga.

³⁰ Namikulupishile kuzikamo, ngoboni kowa muntu hahenu ukekalamo, ndele tuhu Kalembu mwana Yefuna na Yoshuwa mwana Nune.

³¹ Mwambile ngayi bana benu bakapukuliwa, ngoboni nikabaleta ku litunga liya mwakanine.

³² Ngoboni enu mukafwila muno mu libelelengwa.

³³ Bana benu bakenga balishani mu libelelengwa ku myaka makumi anaa a kuyanda ha kubula kwoloka kwenu, hantu wakukumininako hahenu nafu.

³⁴ Mukamona malwa aha wubi wenu myaka makumi anaa, mwaka umo ku mutena umo wa matena makumi anaa aya mwapitile na kuhokela litunga pe mukalimuka ha kundwisha!

³⁵ Nikubeza ngayi nikatenda eshe kukwenu bantu bakuluwa munakungulu hamo mu kundwisha. Nimwenu mukafwila muno mu libelelengwa. Ami nambakale noho, Ami Nyambi ya Ngula.’”

³⁶ Balume aba atumine Moshesha mu kuhokela litunga baletele lushango lwa mahalo olwe lwaleteshele bantu kulinyengela Nyambi ya Ngula.

³⁷ Niho Nyambi ya Ngula wabakamine na malweli, pe bafwile.

³⁸ Ku bakakuhokela likumi na babili ndele tuhu Yoshuwa na Kalembu mwana Yefuna mwana Nune, nibo bashalileho babomi.

Kukatukila litunga mutakwe kwakutatika kutendiwa

³⁹ Oho Moshesha atongwezele Baishalela nimwabo ebye ambile Nyambi ya Ngula balilile shikuma.

⁴⁰ Oho kwashile lumenemene bakatukilile litunga lya binkanda mutakwe. Hibamba ngayi, “Haya tukuliwahishila kuya ku mbalila eye Nyambi ya Ngula atutongwezele. Tunetabili ngayi tunabipishi.”

⁴¹ Ngoboni Moshesha wambile ngayi, “Haya shumangani haya muli na kubulila kwombatalila Nyambi ya Ngula hano? Kukatwesha mufwako!

⁴² Hinga muya. Nyambi ya Ngula kaliha uli nanenu hamo. Kami bamalamo benu bakamitampwisha.

⁴³ Oho mu kululumana Baamaleki na Bakenaani, mukafwa mu nzita. Nyambi ya Ngula kukekala nanenu hamo ufwako, ndaba munakana kumukonka.”

⁴⁴ Ngoboni balimangile na kuya mu litunga lya binkanda, hinge shingi noho kowa shakatukile, hinge Likwati lya Kulimama kwa Nyambi ya Ngula hinge Moshesha kaliha wafumine ku munkungwa.

⁴⁵ Niho Baamaleki na Bakenaani aba bazikilengamo babalwishile na ku bakoma, pe babakonkelelele kuka bakumisha naku Homa.