Kulaba 13 - Libuka Lya Kuyela

Bakakuhokela

¹ Nyambi ya Ngula wambile kuli Moshesha ngayi,

² “Hataho mukakutwaminina umo ku mushobo na mushobo ku mishobo nimwayo likumi na yibili, pe ubatume kwinga bakakuhokela, mwanga bakahokele litunga lya Kenaani, elye nili na kupanika Baishalela.”

³ Moshesha wombatalile ndayano za Nyambi ya Ngula, pe watumineko muntu ku mushobo na mushobo ku mishobo nimwayo likumi na yibili oho bashili ku libelelengwa lya Palani. Batumiwile bengile bakakutwaminina mukati ka mishobo.

⁴ Ku mushobo wa Lubena watumine Shamuwa, mwana Zakula.

⁵ Ku mushobo wa Shimiyoni watumine Shafwati, mwana Holi

⁶ ku mushobo wa Yunda watumine Kalembu, mwana Yefuna.

⁷ Ku mushobo wa Ishaka watumine Ingalu, mwana Yoshefwa

⁸ ku mushobo wa Efulemu watumine Hoshiya, mwana Nune

⁹ ku mushobo wa Mbenjamani watumine Paliti, mwana Lafu

¹⁰ ku mushobo wa Zembuloni watumine Ngandiyele, mwana Shondi

¹¹ ku mushobo wa Yoshefwa (kutontolola ngayi ku mushobo wa Manashe) watumine Ngandindi, mwana Shushi

¹² ku mushobo wa Ndani watumine Amiyelu, mwana Ngemali.

¹³ Ku mushobo wa Asha watumine Shetula, mwana Mayikulu.

¹⁴ Ku mushobo wa Nafwitali watumine Nahimbi, mwana Vofwashi.

¹⁵ Ku mushobo wa Ngandi watumine Ngeulu, mwana Maki.

¹⁶ Aba nibo bakakuhokela atumine Moshesha mu kuhokela litunga. Wafutwile lizina lya Hoshiya mwana Nune kwinga Yoshuwa.

¹⁷ Oho Moshesha abatumine, wambile kukwabo ngayi, “Yenunga ku ncelele ku mbalila yaku mabukubuku yaku litunga lya Kenaani, pe niho mukapitakana na kukuma ku litunga lya binkanda.

¹⁸ Kapenzesheshenu eshe lyekala liyo litunga, bantu banga bekalamo naha za kuma ngovu zabo.

¹⁹ Kapenzesheshenu ndi litunga lyaliwahe hinge ndi lyalibi, hinge ndi bantu bekala mu tunzi twaha munkanda hinge mu minzi yamu bipata.

²⁰ Kapenzesheshenu ndi limvu lyenga lya wilo, kami hinge ndi litunga lyenga lya mashaka. Pe, mukamone ngayi mu kashimbako mikabo yamenangamo.” Nisho shengile shikati oho mikabo ya shinyanca yatatikilenga kuhoka.

²¹ Nohobene balume bayile ku ncelele na kuhokela litunga kubalika ku libelelengwa lya Zini ku mabukubuku a nzila nimwayo ya kuya ku Lehombi, kwakwipi na Nzila ya Ncinencine ya Hamati ku ncelele.

²² Bayile taha mukati ka litunga lya mbalila ya mabukubuku a litunga, pe bezile ku Hembuloni, oku kwazikile mavumo a Ahimani na Sheshayi na Talimayi, bazukulya mukoka wa malengwalengwa akutumbiwa Baanakimu. (Munzi wa Hembuloni wabaliwile myaka mutanu na yibili oho munzi wa Zowani shilolo uzikiwe mu Engepita.)

²³ Bezile ku Mukulo wa Eshikolu, pe niko baketwilile mwahi ou wekalile na lihozozo limo lya mikabo ya shinyanca, lyengile lyalilemu shikuma liya lyashimbile balume babili ha mubanda. Baletele kami manzenze na nkuyu.

²⁴ (Uya mwanya watumbiwile ngayi Mukulo wa Eshikolu ndaba ya lihozozo lya mikabo ya shinyanca elye baketwile Baishalela.)

²⁵ Oho bahokelele litunga ku matena makumi anaa, babokele

²⁶ kuli Moshesha na Aloni naku likunge nimwalyo lya Ishalela ku Kandeshi mu libelelengwa lya Palani. Bashimikile ebye bakamonene na kubamonesha mikabo eye bakaletele.

²⁷ Batongwezele Moshesha ngayi, “Tunakahokele litunga liya watutumine, litunga likukunkula mahwe na wushi, pe yino niyo yimo yaku mikabo yalyo.

²⁸ Ngoboni bantu bazikamo banengi bangovu shikuma na minzi yabo yayinene shikuma na ku shitila bipata. Shashibi shikuma kupitakana eshe, twaka monako bazukulya malengwalengwa.

²⁹ Baamaleki bazika mu mbalila ya mabukubuku a litunga lya Nengembu. Bahita na Bayembushi na Baamoli bazika mu litunga lya binkanda na Bakenaani bazika kwakwipi na Liwate naha shibumbo sha mushinzi wa Yondana.”

³⁰ Kalembu wamweneshele bantu balinyengelelenga kuli Moshesha, pe wambile ngayi, “Tuku fwanina haya kulwa na kushimba litunga, tuli na ngovu za ku fwanina kulikona.”

³¹ Ngoboni balume aba bayile na Kalembu bambile ngayi, “Byo! Kaliha tuli na ngovu za kutwesha kubalwisha, bantu ba kuyo bangovu shikuma kupitakana.”

³² Nohobene bapanzanishile mbuzi ya mahalo mukati ka Baishalela habya litunga elye bahokelele. Bambile ngayi, “Liya litunga kutwesha hinge kututwisha bya ku fwanina kulelesha bantu bekalamo lifwako. Bantu nimwabo aba twamonene bengile babatali shikuma,

³³ Twakamoneneko bene kami na malengwalengwa, bazukulya Anakimu. Twalimonene wushe ngo tuli nehe bambimba, kami shiyo nisho twakamonekele kukwabo.”