Kulaba 12 - Libuka Lya Kuyela

Miliyamu ukushushuliwa

¹ Moshesha wayekele mukazi wa Kakushi, pe Miliyamu na Aloni bamuhengaminine haneshe.

² Pe bambile ngayi, “Kati Nyambi ya Ngula uli na kwamba tuhu muli Moshesha ndi? Kati kwamba kami mumwetu ufwako ndi?” Nyambi ya Ngula wayuvwile ebye bambilenga.

³ (Moshesha wengile muntu wakulilimbwilisha, kupitakana muntu nimwendi wa hanci.)

⁴ Kubazumuka tuhu, Nyambi ya Ngula hakwamba kuli Moshesha na Aloni na Miliyamu ngayi, “Nikushinga mu wuhatu wenu mwize kuno kukwami ku Ntanda ya shikungulukilo.” Pe bayile ku Ntanda,

⁵ Nyambi ya Ngula washulukile mu likumbi lya kwimana nkonka, wemanine ku menginino aku ntanda ya shikungulukilo, niho ehanine, “Aloni! Miliyamu!” Mu wubili wabo bahenyenene kumbili,

⁶ pe Nyambi ya Ngula wambile ngayi, “Haya yuvwenu ebye nikwamba! Oho muli na bamiluwe mukati kenu, nikuliholola amimwine kukwabo mu bimono kami nikwamba nabo mu milo.

⁷ Nisho shinatapuluku oho nikwamba na mukamulimo wami Moshesha namuyaka kulama bantu bami nimwabo Baishalela.

⁸ Nohobene nikwamba kukwendi meho na meho shiwahewahe, pe kaliha mu tushimpu. Niye unamono shifwekesha shami. Haya shumangani boni mwabula kwikala na bowa kwamba na kulwisha mukamulimo wami Moshesha?”

⁹ Nyambi ya Ngula wabakalihilile, pe aha afumine,

¹⁰ likumbi lyaha ntanda lyafumine, kubazumuka tuhu shikonde sha Miliyamu shakonkanakale na wulweli wakubula kutwesha kupangiwa pe wafutukile wakutuba too ngonehe mpemba. Aloni wamutilaminine, pe wamumonene ngayi unakonkana wulweli.

¹¹ Aloni wambile kuli Moshesha ngayi, “Tawee! Obe hekulu, hinga mututenda kwinga bakakutambula kashushwilo kaha wubi waha kuyeba kwetu.

¹² Hinga umuleha ngonehe muntu unahemuwu mu livumo lya bamandiyendi wakufwa na lutu lwa kuzomozoka.”

¹³ Nohobene Moshesha wabilikizile kuli Nyambi ya Ngula ngayi, “Obe Nyambi mupoleshe!”

¹⁴ Ngoboni Nyambi ya Ngula wakumbwile ngayi, “Ndi tatiyendi wamuhandwile ha kumufwizila mate ha lupala lwendi, pe wafwaninine kwikala na lisheni ku matena mutanu na abili. Nohobene mulehenu bamushinkilile ha munkanda wa munkungwa ha shunda yimo, pe kwamana nihoboni aletiwe na ku bokela mukati.”

¹⁵ Nohobene Miliyamu bamushinkilile ha munkanda wa munkungwa ha matena mutanu na abili, pe bantu kaliha batuntukile hantu noho bamubweshele mukati.

¹⁶ Niho bafumine ku Hazeloti pe batendelele munkungwa mu libelelengwa lya Palani.