Kulaba 11 - Libuka Lya Kuyela

Mwanya ukutumbiwa Tambela

¹ Bantu batatikile kulinyengela kuli Nyambi ya Ngula ha makando wabo. Oho Nyambi ya Ngula abayuvwile, wapilamine pe watumine mundilo mukati kabo. Pe wahokeshele na kulobesha mbalila imo ya kunkumo ya munkungwa.

² Bantu balililile kuli Moshesha na kulomba kuyavwiwa, pe Moshesha walombelele kuli Nyambi ya Ngula pe mundilo wazimine.

³ Nohobene mwanya uyo bawutumbile ngayi Tambela, ndaba ngayi mundilo wa Nyambi ya Ngula wahokele mukati kabo.

Moshesha ukuhata 70 bakakutwaminina

⁴ Kwekalile mapukwenda bendelenga hamo na Baishalela. Bekalile na likwilu shikuma lya nyama, hinge Baishalela nibo bene batatikile kulinyenga ngayi, “Shinga taha batupeko nyama tulye.

⁵ Mu Engepita twalilenga zinci za nahiya za kubula kulanda. Anukenu makaka na namunwa na nyanyishi ya kufweka mayangayanga na nyanyishi ya kunuka shikuma ebye twekalile nabyo.

⁶ Ngoboni shikati shino ngovu zetu zamana. Kowa hinge byakulya. Kowa ndele maana aha mutena ha mutena!”

⁷ (Mbuto eye ya maana yafwekele ngo mbuto yayisheyishe.

⁸ Awililile ha munkungwa hamo na mume wushiku.

⁹ Oho kwashile lumenemene bantu bayikundwilenga na kuwapabula hinge kuwatwa muhunga, pe kami hi kuwateleka na kuwavuba mankende akupapalala. Ayuvwanikile ngo mankende akuvuba na mazi a olive.)

¹⁰ Moshesha wayuvwile bantu nimwabo hibalinyenga oho bemaninenga mu tunzunga kubipana bya zintanda zabo. Moshesha wabulile ku wahilila ndaba Nyambi ya Ngula wabapilaminine.

¹¹ Wambile kuli Nyambi ya Ngula ngayi, “Shumangani munanyakili mu wukalu wanehe? Shumangani munabulu ku wahilila na nami? Shumangani mwampanikila ngovu ha bantu aba nimwabo?

¹² Kaliha nabalengele hinge kubabeleka. Shumangani mukundomba ngayi ninge ngo shibeleki na kubashimba mu maboko wami ngo bambututu kubatwala ku litunga elye mwalibezele na bankakazabo?

¹³ Kutibo oku nikutwesha kuwana nyama ya bantu aba nimwabo, aba bakulinyenga na kulomba nyama?

¹⁴ Kutwesha kwikala na ngovu ha bantu aba ninkayami nifwako, shanenehelakale shikuma.

¹⁵ Ku mona ndi uli na kuntenda nehe, nyuvwilenuko nceshe na kunziha, ngayi nibule ku mona awa makando.”

¹⁶ Nyambi ya Ngula wambile kuli Moshesha ngayi, “Kungula balume 70 ba kulemeekiwa, aba balimukiwa ngo benga bakakutwaminina bantu ba Ishalela, ubalete kukwami ku ntanda ya shikungulukilo, pe ubatongweze bakemane kwakwipi nanobe.

¹⁷ Nikashuluka kwiza na kwamba nobe kuyo, kami nikafumishako umo ku moyo ou na kupanika na kubapanawo. Niho bene bakatwesha ku kuyavwa kwikala na ngovu ha bantu aba, pele kukayanda ninkayobe ufwako.

¹⁸ Haya tongweza bantu ngayi, ‘Liyeleshenu kubya nzona ndaba mukekala na nyama ya kulya. Nyambi ya Ngula nayuvwu kulinyenga kwenu oho mukwamba ngayi shinga munali nyama, pe kami ngayi mwekalile shiwahe mu Engepita. Niho haya Nyambi ya Ngula ukamipana nyama pe mukalya.

¹⁹ Mukayilya kaliha mutena umo tuhu, hinge matena abili, hinge ndi matena mutanu, hinge ndi matena likumi, hingebene makumi abili,

²⁰ ngoboni ngonda nimwayo, hantu munayikimwi, hantu yinakamikoleshe. Eshe shikamoneka ndaba munakana Nyambi ya Ngula ou uli kuno hakati kenu na kulinyenga kukwendi ngayi shinga kaliha mwafumine mu Engepita.’”

²¹ Moshesha wambile kuli Nyambi ya Ngula ngayi, “Kuno nili na kutwaminina bantu 600,000, pe Obe ukwamba ngayi ukabapana nyama yinakumu mu ngonda umo ndi?

²² Zingombe na bambelele ba ku fwanina kutwesha kuzihiwa ngayi bakonkane ndi? Kati zinci nimwazo zili mu mawate zikutwesha kubakonkana ndi?”

²³ Nyambi ya Ngula wakumbwile Moshesha ngayi, “Kati kuli aha ha kumina ngovu zami ndi? Wuluno umone ndi ebye namba bikatendiwa hinge ndi bifwako.”

²⁴ Nohobene Moshesha wayile na kutongweza bantu ebye ambile Nyambi ya Ngula. Wakungwile 70 bakakutwaminina, pe wabayakile kuzinguluka ntanda.

²⁵ Niho Nyambi ya Ngula ashulukile mu likumbi, pe wambile nendi. Niho Nyambi ya Ngula ashimbile moyo umo ku nowe apanine Moshesha, pe wawupanikile kubakakutwaminina 70. Oho moyo wezile hahabo, babalikile kukuwa kufwekesha ngo bamiluwe, ngoboni kaliha shikati shashitali.

²⁶ Babili kunobo bakakutwaminina 70, Elundandi na Mendandi, bekalile mu munkungwa kaliha batutikilile ha munkanda kwingina mu ntanda. Muyo mu munkungwa moyo wa kuyela wezile hahabo, niho ba kuwile nakufwekesha ngo bamiluwe.

²⁷ Ndumbana umo wetukile kuya na kutongweza Moshesha ebye batendelenga ba Elundandi na Mendandi.

²⁸ Niho Yoshuwa mwana Nune, ou wengile mukakuyavwa Moshesha kutatika kuwanuke wendi, wabwalumukile na kwamba kuli Moshesha ngayi, “Bakanishe hekulu!”

²⁹ Moshesha wambile ngayi, “Obe ukulifulankana nahiti na byuma ebye byenga byami? Nikushinga ngayi Nyambi ya Ngula apane moyo ku bantu bendi nimwabo ngayi bambenga ngo miluwe.”

³⁰ Niho Moshesha na bakakutwaminina 70 ba Ishalela babokele ku munkungwa.

Nyambi ya Ngula ukutuma bitentu

³¹ Kubazumuka tuhu, Nyambi ya Ngula ha kutuma mpepo eye yaletele bitentu bya ku liwate, byezile na kutuka mita imo kufuma hanci. Byatulilile ha munkungwa na kuwuzinguluka mashentimita 45 mu zimbalila nimwazo.

³² Nohobene bantu batendele mutena uyo nimwawo na wushiku nimwawo na mutena nimwawo wakulundaminako kukwata bitentu, muntu na muntu wakundwile byabingi kupitakana makilongilamu likulukazi. Bayanikilebyo ngayi biyume ha munkungwa nimwawo.

³³ Oho nyama shilolo yimane mu kanwa kabo, Nyambi ya Ngula wapilaminine bantu aba, pe watumine wulweli wakubula kutwesha kupangiwa hakati kabo.

³⁴ Mwanya uyo watumbiwile ngayi “Binzimbi Bya ku shokomena,” ndaba ngayi kuyo niko bafundile bantu obo bashokomenene shikuma nyama. Nibyo byatulile mu munkungwa na kuwuzinguluka na makilomita amengi mu zimbalila nimwazo, hantu noho byabunganine mushiinzi kwii, wutali wakufuma hanci wengile mita imo.

³⁵ Kufuma kuyo bantu bayile ku Hazeloti, oko niko bakatulilile.