Kulaba 10 - Libuka Lya Kuyela

Zimpandula za Shiliva

¹ Nyambi ya Ngula wambile kuli Moshesha ngayi,

² “Ufule zimpandula zibili za shiliva, za kwihanisha bantu na kutuntula munkungwa.

³ Oho mungunina wa zimpandula zibili ukatendoka, pe likunge nimwalyo likakungulukile hamo kukwobe ku shipana sha Ntanda ya Shikungulukilo.

⁴ Ngoboni oho mungunina wa mpandula yimo ukatendoka, niho bakakutwaminina tuhu mavumo a Ishalela nibo bakakungulukila hamo kukwobe.

⁵ Oho mungunina wa mpandula ukatendoka shashishe, mishobo yazika ku mbalila yaku mushamuko yikatuntuka.

⁶ Oho mungunina wawushe ukatendoka kawubili, mishobo yaku mbalila yaku mabukubuku yikatuntuka. Nohobene mingunina yayishe ikatendoka ha kutuntula munkungwa,

⁷ ngoboni hakwihana likunge hamo, mungunina wawunene ukatendoka, ngoboni ukashibiwa shashishe.

⁸ Bana ba Aloni, baya bakankombela bakashiba zimpandula, pe eze zikenga Ndayano za mwaya myaka kukwenu.

⁹ Oho muli ku nzita mu litunga lyenu, ha kulilamwina enu bamwine ku kamalamo uli na kumi lwisha, shibenu zimpandula, shinge shilimukisho kuli Nyambi ya Ngula, Nyambi yenu ngayi amilamwine ku bamalamo benu, eze ndayano ziku fwanina kulamiwa ku shikati nimwasho sha kumbili. Ami Nyambi ya Ngula, Nyambi yenu, nikamiyavwa na kumipulwisha ku bamalamo benu.

¹⁰ Pe ha matena aku wahilila, ha bimbo bya kutelama kwa ngonda wamupya naha bimbo byenu byamina bya wunyambi, mukashiba zimpandula oho mukapana nkombela yenu yakuhokesha na nkombela ya kulilumikila. Niho nikamiyavwa. Ami Nyambi ya Ngula, Nyambi yenu.”

Baishalela ba kutuntuka ha Munkungwa

¹¹ Ha mutena wawumakumi abili ha ngonda wawubili, mu mwaka wawubili oho bantu bafumakale mu Engepita, likumbi lyaha ntanda ya wupaki lyakatukile,

¹² pe Baishalela batatikile mukala wabo kufuma mu Libelelengwa lya Shinayi. Likumbi lyezile mu kutulila mu Libelelengwa lya Palani.

¹³ Bantu batatikile kuya na kuwuluta ku mazu a Nyambi ya Ngula kupitila muli Moshesha,

¹⁴ pe shikati nimwasho osho batuntukilenga, bendele mu ndayano zimo. Obo bekalile mu ndembela ya shipani shiya batwamininine ba mushobo wa Yunda balimenekele kuya, kanzunga na kanzunga. Nahishoni mwana Aminandabe niye wengile mukakutwaminina.

¹⁵ Natanele mwana Zuwala niye wengile mukakutwaminina mushobo wa Ishaka,

¹⁶ kami Eliyambi mwana Heloni niye wengile mukakutwaminina mushobo wa Zembuloni

¹⁷ Oho bamanishile kuvungavunga ntanda ya Nyambi, ba mavumo a Ngeshona na Melali bakatukile na kuyikulika.

¹⁸ Balundaminineko obo bekalile na ndembela ya shipani shiya batwamininine ba mushobo wa Lubena bakatukile na kuya, kanzunga na kanzunga. Na Elizula mwana Shendula niye wengile mukakutwaminina.

¹⁹ Shelumiyela mwana Zulishandayi niye wengile mukakutwaminina mushobo wa Shimiyoni,

²⁰ na Eliyashafwi mwana Ndeulu niye wengile mukakutwaminina mushobo wa Ngandi.

²¹ Niho livumo lya Kohati, aba bashimbile byuma bya shizila bakatukile na kuya. Ha shikati shiya bakumine ha munkungwa wamina, bawanine ntanda bayimikakale kami.

²² Bakulundaminako, obo bekalile na ndembela ya shipani shiya batwamininine ba mushobo wa Efulemu bakatukile na kuya, kanzunga na kanzunga. Elishama mwana Amihundi niye wengile mukakutwaminina.

²³ Ngamaliyele mwana Pendahizu niye wengile mukakutwaminina ku mushobo wa Manashe,

²⁴ kami Ambindani mwana Ngindiyoni niye wengile mukakutwaminina ku mushobo wa Mbenjamani.

²⁵ Bakumanishilila, obo bekalile na ndembela ya shipani shiya batwamininine ba mushobo wa Ndani, bengile bakapata nyima wa muhoko wa maziko nimwawo, bakatukile kanzunga na kanzunga. Ahiyaza mwana Amishandayi niye wengile mukakutwaminina.

²⁶ Pangiyele mwana Okilani niye wengile mukakutwaminina ku mushobo wa Asha,

²⁷ kami Ahila mwana Enani niye wengile mukakutwaminina ku mushobo wa Nafwitali.

²⁸ Nehi nisho bendelenga na kuwuluta, kanzunga na kanzunga, shikati osho nimwasho Baishalela batuntukilenga ha munkungwa na kuya.

²⁹ Moshesha wambile kuli mulamu wendi Hombambu mwana Leule wa Kamindiyani ngayi, “Tuli hahepi na kutuntuka kuno na kuya ku mwanya owo atoyele Nyambi ya Ngula ngayi ukatupanawo. Unakulupishi kutumpula Ishalela, nohobene tuyenga tukekala nobe shiwahe.”

³⁰ Hombambu wakumbwile ngayi, “Byo, nili na kuboka ku litunga lyami na ku bawushinda wami.”

³¹ Moshesha wambile ngayi, “Hinga wutushiya. Obe ndambo walimuka oku twafwanina kukatulila mu libelelengwa, kami obe ukenga meho wetu.

³² Ndi ukuya nanetu, tukalitapila hamo na nobe bitandalisho nimwabyo biya akatupana Nyambi ya Ngula.”

Bantu bakatukile

³³ Oho bantu bafumine ku Shinayi ku lipili lya Nyambi ya ngula, bendele matena ahatu, kami Likwati ya Kulimama kwa Nyambi ya Ngula lyayile kumbili yabo shikati nimwasho na kubawanina mwanya wabo wakutulila.

³⁴ Oho bendelenga kufuma ha munkungwa umo kuya kuwamina, likumbi lya Nyambi ya Ngula lyekalile hayilu yabo ku mwaana.

³⁵ Shikati nimwasho oho Likwati lya Kulimama kwa Nyambi ya Ngula lyatatikile kwenda, Moshesha wambilenga ngayi, “Obe Nyambi ya Ngula haya katuka, panzanisha bamalamo bobe na kutinisha obo ba kuzimba.”

³⁶ Shikati nimwasho oho lyemanine, Moshesha wambilenga ngayi, “Obe Nyambi ya Ngula boka, ku makulukazi aba lupashi lwa Ishalela.”