Kulaba 1 - Libuka Lya Kuyela

Kulaba Kwakutatika kwa Ishalela

¹ Ha mutena wakutatika wa ngonda wawubili mu mwaka wawubili oho bantu ba Ishalela bafumakale ku Engepita, Nyambi ya Ngula wambile kuli Moshesha kuyo ku Ntanda ya Shikungulukilo mu Libelelengwa lya Shinayi. Wambile nehi ngayi,

² “Obe na Aloni mukalabe bantu ba Ishalela mu mavumo namu mapashi. Tikitenu mazina a balume nimwabo

³ ba myaka makumi abili hinge ba kukula kupitakana oho, aba banakumu ha kulwa nzita. Obe na Aloni ukatikitishe banzita.

⁴ Mukatule mukulwane umo wamu livumo ku mushobo na mushobo akamiyavwe.

⁵ Aba nibo balume bakakutwaminina mukati ka mishobo yabo, ba ku fwanina kumiyavwa mukutenda ou mulimo. Ku mushobo wa Lubena ukamiyavwa Elizula, mwana Shendula,

⁶ ku mushobo wa Shimiyoni, Shelumiyela mwana Zulishandayi,

⁷ ku mushobo wa Yunda, Nahishoni mwana Aminandabe,

⁸ ku mushobo wa Ishaka, Natanele mwana Zuwala,

⁹ ku mushobo wa Zembuloni Eliyambi mwana Heloni,

¹⁰ kuli bana ba Yoshefwa babalume ku mushobo wa Efulemu, Elishama mwana Amihundi, ku mushobo wa Manashe, Ngamaliyele mwana Pendahizu,

¹¹ ku mushobo wa Mbenjamani, Ambindani mwana Ngindiyoni,

¹² ku mushobo wa Ndani, Ahiyaza mwana Amishandayi,

¹³ ku mushobo wa Asha, Pangiyele mwana Okilani,

¹⁴ ku mushobo wa Ngandi Eliyashafwi, mwana Ndeulu,

¹⁵ ku mushobo wa Nafwitali, Ahila mwana Enani.”

¹⁶ Aba nibo bantu bahatiwile mu shikungulukilo, bakakutwaminina mishobo ya bankakazabo, bakulwane ba mavumo a Baishalela.

¹⁷ Moshesha na Aloni bashimbile aba bantu banatoyiwi mazina,

¹⁸ pe behanine hamo likunge nimwalyo ha mutena wakutatika wa ngonda wawubili. Pe batikitile bantu nimwabo mu livumo namu livumo, mazina a balume ba myaka makumi abili hinge ba kukula kupitakana, batikitiwile na kulabiwa,

¹⁹ ngonehe Nyambi ya Ngula atongwezele Moshesha. Nohobene Moshesha alabililemo bantu mu Libelelengwa lya Shinayi.

²⁰ Ku bazukulya Lubena mwana Ishalela wa mweli, watikitile mazina a balume nimwabo ba myaka makumi abili hinge ba kukula kupitakana oho, ku mavumo naku mapashi wabo.

²¹ Palo ya bantu bawanine ku bazukulya Lubena bengile 46,500.

²² Ku bazukulya Shimiyoni, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo.

²³ Bantu balabile ku bazukulya Shimiyoni bengile 59,300.

²⁴ Ku bazukulya Ngandi, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi.

²⁵ Bantu balabile ku bazukulya Ngandi, bengile 45,650.

²⁶ Ku bazukulya Yunda, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi.

²⁷ Bantu balabile ku bazukulya Yunda, bengile 74,600.

²⁸ Ku bazukulya Ishaka balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo.

²⁹ Bantu balabile ku bazukulya Ishaka, bengile 54,400.

³⁰ Ku bazukulya Zembuloni, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo.

³¹ Bantu balabile ku bazukulya Zembuloni bengile 57,400.

³² Ku bana ba Yoshefwa, bazukulya Efulemu, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo.

³³ Bantu ba ku Efulemu balabiwile ku bazukulya Yoshefwa, bengile 40,500.

³⁴ Ku bazukulya Manashe, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo.

³⁵ Bantu balabiwile ku bazukulya Manashe bengile 32,200.

³⁶ Ku bazukulya Mbenjamani, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo.

³⁷ Bantu balabiwile ku bazukulya Mbenjamani, bengile 35,400.

³⁸ Ku bazukulya Ndani, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo.

³⁹ Bantu balabile ku bazukulya Ndani, bengile 62,700.

⁴⁰ Ku bazukulya Asha, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo.

⁴¹ Bantu balabile ku bazukulya Asha, bengile 41,500.

⁴² Ku bazukulya Nafwitali, balume nimwabo ba myaka makumi abili hinge ba kukula kupitakana oho, aba banakumu ha kulwa nzita, batikitiwile mazina ngonehe, ku mavumo naku mapashi wabo.

⁴³ Bantu balabile ku bazukulya Nafwitali, bengile 53,400.

⁴⁴ Aba nibo balabiwile kuli Moshesha na Aloni na baya bakakutwaminina ba Ishalela likumi na babili, muntu na muntu wemaninine livumo lyendi na lupashi lwendi.

⁴⁵ Baishalela nimwabo ba myaka makumi abili hinge ba kukula kupitakana oho, aba banakumu ha kulwa nzita balabiwile kwezeka ngo mu mapashi wabo.

⁴⁶ Bantu nimwabo balabile bengile 603,550.

⁴⁷ Ngoboni Balevi kaliha batikitiwile hamo na mishobo yamina,

⁴⁸ ndaba Nyambi ya Ngula wambile kuli Moshesha ngayi,

⁴⁹ “Oho ukalaba bantu nimwabo Baishalela banakumu ha kulwa nzita, hinga ukayakako mushobo wa Balevi.

⁵⁰ Ngoboni uyake Balevi kukulama Ntanda ya Shikungulukilo na byuma byayo nimwabyo bilimo. Bakakulika byuma byayo nimwabyo na kutendelamo, kami bakayizinguluka ha kuzika munkungwa.

⁵¹ Shikati nimwasho oho mu kutuntula munkungwa wenu, Balevi nibo bakatuntula ntanda nakwimikayo kami ku munkungwa wawupya. Muntu washenge ou ukwiza kwakwipi na ntanda ukazihiwa.

⁵² Wingi wa Baishalela bakatenda munkungwa litanga na litanga, muntu na muntu ha muhoko wendi niyemwine, kami mu nceto ya ndembela yendi.

⁵³ Ngoboni Balevi bakatula na kuzinguluka ntanda ya wupaki na kuyilama ngayi mwanga kukabule muntu wakwiza kwakwipi na ku shonkomona wukali wami wakukama likunge lya Baishalela.”

⁵⁴ Nohobene bantu ba Ishalela batendele byuma nimwabyo biya Nyambi ya Ngula atongwezele Moshesha.