Koloshe 3 - Libuka Lya Kuyela

¹ Nohobene ndi munashanguku na Kilishitu, shingenu byuma ebye bili muyilu, omwo Kilishitu akwikala ku liboko lya shilyo lya Nyambi.

² Yakenu mitima yenu ku byuma bili muyilu, kaliha ku byuma bili hano hanci.

³ Ndaba enu munafu na wumi wenu unaholekiwi na Kilishitu muli Nyambi.

⁴ Oho Kilishitu, ou wenga wumi wetu, akamoneka, pe nanenu kami mukamoneka hamo mu wuwahe wendi.

Nyinkalo ya mwaka na yayipya

⁵ Haya zihenu likwilu lya wuntu likutenda byuma ebye bili hano hanci, wunjenge, mazilo, mutongo, lihungu lyalibi na kulishoza, nikwo kami kulemesha tunankishi.

⁶ Ndaba ya byuma ebye, pe wukali wa Nyambi ukwiza ha bana bakubula kwombatala.

⁷ Ha shikati shimo mwekalilenga nehi nibo, mwatendelenga byuma bya kufweka nehi ebye.

⁸ Ngoboni wuluno hinga mutenda kami byuma bya kufweka ebye, kupilama, wukali, nkoko, matuka na mazu a mazilo akufuma mu kanwa kenu.

⁹ Hinga mwamba mahalo umo kuwamina, ndaba munavulu muntu wa mwaka hamo na milimo yendi,

¹⁰ kami munavwala muntu wamupya, mu kalimukisho ngonehe shifwekesha shendi Shakalenga ou wamilengele.

¹¹ Ndaba ya wumi wawupya, kowa kutapuluka mukati ka Bakamatunga na Bayunda, mukakuya ku mukanda hinge mukakubula kuya ku mukanda, mukakubula kulilongesha, shihulahuli, ndungo hinge mwana wakushoboloka, ngoboni Kilishitu wenga nimwabyo mu nimwabyo.

¹² Nohobene vwalenu ngo bakakuhatiwa ba Nyambi, bakakuyela na kuhakiwa, shishemo, nceshe, kulilimbwilisha, kubomba na lunzewe.

¹³ Liyavwenu umo na wamina na kuliyatila umo na wamina, ndi muntu wamina uli na ntongawushi na wamina, ngonehe Mwene amiyatilile, tendenu noho kami ku umo na wamina.

¹⁴ Hayilu ya byuma ebye nimwabyo, vwalenu shishemo, nisho shikumanga byuma nimwabyo hamo ku kulembuluka.

¹⁵ Ku mwena kwa Kilishitu kulele mu mitima yenu, oku nikwo mwehaniwile mu lutu lumo, pe kambililenu.

¹⁶ Lizu lya Kilishitu nimwalyo mu wingi walyo likale mu mitima yenu, oho mu kulilongesha na kulibela umo na wamina na mu ngana nimwazo, oho mukwimbila nyimbo za kumulemesha na za kumuyemeza na kukambilila kuli Nyambi.

¹⁷ Shuma nimwasho mukwamba hinga kutenda, tendenu nimwabyo mu lizina lya Mwene Yeshu na kukambilila kuli Nyambi Tate kupitila mumwendi.

Kuliyuvwashana kwa bantu mu wumi wawupya

¹⁸ Enu bakazi, lishishenu ku bakokwenu, shinafwanini muli Mwene.

¹⁹ Balume, hakenu bakazenu, hinga mwikala na shilala kukwabo.

²⁰ Batwanuke, ombatalenu bahemi benu mu byuma nimwabyo, ndaba eshe shikuwahililisha Mwene.

²¹ Nanenu bahemi, hinga mushonkomonanga mahungu bana benu, kutina batampwa.

²² Bandungo, ombatalenu bahekulyenu ba hano hanci mu byuma nimwabyo, kaliha tuhu ku wahilisha bantu ndaba enu mwashinga kuyemeziwa, ngoboni na mutima umo, ngo mu kutendela milimo Nyambi.

²³ Shuma nimwasho mu kutenda, tendenu na mutima umo, ngo kuli Mwene, kaliha ku bantu,

²⁴ mulimuka ngayi mukatambula ncuungu ya likona kuli Mwene, ndaba mu kutendela milimo Mwene Kilishitu.

²⁵ Ngoboni muntu nimwendi ukutenda byabibi, bikamubokela, ndaba Nyambi ufwasho shihota na bantu.