Koloshe 1 - Libuka Lya Kuyela

¹ Ami Paulu, ntumwana wa Yeshu Kilishitu, mu shifungo sha Nyambi, nili hamo na Timoteo kawushinda wetu.

² Tukutikitila kukwenu bantu ba Nyambi bali mu Koloshe, bawushinda wetu ba kupwisha muli Kilishitu. Nyambi Tatiyetu mwanga amipane nceshe na ku mwena.

Lilombelo lya kukambilila

³ Twakambililanga shikati nimwasho kuli Nyambi, Tata Mwene wetu Yeshu Kilishitu, oho tukumilombelela.

⁴ Kufuma ku shikati shiyo twayuvwile mpupo ya kukulupila kwenu muli Kilishitu Yeshu na shishemo muli nasho ku bakakuyela nimwabo.

⁵ Ndaba ya kulumbeza oku banamitentekele kuyilu, oku mwayuvwile mwaka mu lizu lya kupwisha, ncango zaziwahe zinezi kukwenu.

⁶ Ncango ezi zaziwahe zikuhanya mu kaye nimwako, ngonehe likutenda kami mumwenu, kufuma ku mutena uyo mwaliyuvwile na ku yuvwishisha nceshe za Nyambi mu kupwisha.

⁷ Nehi mwalilongeshele kuli Epafulashi, minetu mukamulimo wakuhakiwa, ou nengi kukwenu mukakushimikila wa kupwisha wa Kilishitu mu myanya yetu.

⁸ Niye kami watutongwezele bya shishemo muli nasho mu Moyo.

⁹ Ndaba ya shuma eshe, etu kami kufuma ku mutena uyo twayuvwile byenu, tufwako kuleha kumi lombelela na kulomba kuli Nyambi ngayi mwinzale na kalimukisho ka shamutima wendi mu ngana na ku yuvwishisha nimwako kwa mu Moyo.

¹⁰ Tukulomba eshe ngayi enu mutweshe kuyoya oku akushinga Mwene na kumuwahilisha mu ntendelo nimwayo na kuhanya mu milimo yayiwahe na kukula mu kalimukisho ka Nyambi.

¹¹ Tukumilombelela ngayi mwanga Nyambi amishumishe na ngovu zendi zaziwahe, kutwala ku lunzewe nimwalwo na lukakatila na ku wahilila

¹² na kukambilila kuli Tate, ou unatutende ngayi tufwanine kutambula shitapilo sha likona lya bakakuyela mu wene wa mu lumuni.

¹³ Unatulamwini ku ngovu za mincimpwe na kutuleta mu wene wa Mwanendi wakuhakiwa,

¹⁴ mumwendi tuli na kukuliza kwa kuyatila kwa wubi.

Muntu na mulimo wa Kilishitu

¹⁵ Kilishitu unengi shifwekesha sha Nyambi wakubula ku moneka, mweli wa bibumbwabumbwa nimwabyo.

¹⁶ Ndaba kupitila mumwendi Nyambi walengele byuma nimwabyo bili muyilu na hano hanci, bya ku moneka na bya kubula ku moneka, hinge matanda, hinge ngovu za kulela, hinge batulela, hinge ngovu za kutwaminina byuma nimwabyo byalengiwile kupitila mumwendi, kami byenga byendi.

¹⁷ Niye uli kumbili ya byuma nimwabyo, kami mumwendi byuma nimwabyo bikwikala.

¹⁸ Niye nengi mutwe wa lutu, nilyo litengo. Niye wakutatika na mweli ku bafu, ngayi mu byuma nimwabyo niye enge wakumbili.

¹⁹ Ndaba Nyambi wawahililile ngayi Wunyambi wendi nimwawo wikale mumwendi,

²⁰ na kupitila mumwendi ngayi alyambwilile na byuma nimwabyo, hinge bili hano hanci, hinge muyilu, kuleta ku mwena na mukeza wa ha shishempakano shendi.

²¹ Mwaka mwekalile kwakutali na Nyambi, kami mwengile bamalamo bendi ndaba ya byuma byabibi mwatendelenga na biya mwahanganikilenga.

²² Ngoboni wuluno, ndaba ya lufu lwa Mwanendi, Nyambi unamibweshe niye mwine, watendele eshe ngayi kukwendi, mwinge ba kuyela na bakakubula nyanco na bakubula mulandu ku meho wendi,

²³ ndi mu kuzamina mu kukulupila kwenu na kuhalaba mipishi na ku shumankana na kubula kufuma ku kulumbeza kwa ncango zaziwahe eze mwayuvwile, eze zinashimikiwi ku bibumbwabumbwa nimwabyo bili mu nceto ya liyilu, ebye nibyo ami Paulu nengile mukakushimikila.

Mulimo wa Paulu ku litengo

²⁴ Wuluno ami niku wahilila mu makando ami ndaba yenu na kwinzalisha mu wuntu wami ebye byayawilile bya makando a Kilishitu ndaba ya lutu lwendi, nilyo litengo.

²⁵ Ami natendiwile kwinga mukamulimo walyo kuya na ngovu eze Nyambi ampanine, za kuya na ku shimikila shiwahe lizu lyendi,

²⁶ ncimpi zaholekiwile ku myaka na ku mikoka, ngoboni wuluno zinaholoko ku bakakuyela bendi.

²⁷ Kukwabo Nyambi washingile ku balimukisha wuheti wawuwahe wa ncimpi ezi mukati ka Bakamatunga, nizo zenga Kilishitu uli mumwenu, kulumbeza kwa wuwahe wa Nyambi.

²⁸ Tu ku shimikila Kilishitu naku shiwulula na ku longesha muntu nimwendi mu ngana nimwazo, ngayi tulete muntu nimwendi kwinga wakulunga muli Kilishitu.

²⁹ Nibyo nikutendela milimo shikuma na kuliyavwisha ngovu za Kilishitu zikutenda milimo mumwami shikuma.