Ishaya 9 - Libuka Lya Kuyela

¹ Ngoboni bantu bekalile mu makando kukekala kami mu mincimpwe bafwako. Ku matena akunyima litunga lya Zembuloni na litunga lya Nafwitali a handuliwile, ngoboni ku matena akumbili maleema akeza ku nzila yaha shibumbo sha liwate, litunga lya mu nciza ya Yondana. Ngalileya wa Bakamatunga.

Nzita yinamana

² Bantu bendelenga mu mincimpwe, hano banamono lumuni lwalunene. Baya bekalilenga mu litunga lya mubombola wa mincimpwe, lumuni luna ba muniki.

³ Obe Nyambi ya Ngula unavulishi litunga lya Ishalela, una bawahilishi shikuma. Bakutangalila kumbili yobe ngo kutangala kwa ha kuteza, hinge oho ba kulitapila ebye banakapukulu.

⁴ Ndaba unapokozolo mpongoho iya ya balemenenene, shitondo shiya shili ha bifuzi byabo na mukombo wa mukakuyandisha, ngonehe shiya atendele ha mutena wa Mindiyani.

⁵ Ndaba nkwabilo na bivwalo bya bakakulwa nzita babo, nimwabyo binatampakana mukeza, kami bikahokeshiwa peluu ngonehe nkuni zaha mundilo.

Mwana unahemuwu

⁶ Ndaba kukwetu kunahemuwu kanuke, mwana wa mulume niye nahemuwu kukwetu, ngovu za kulela zikapanikiwa kukwendi, kami lizina lyendi likatumbiwa ngayi, “Nkongo Wakukomokesha,” “Nyambi Wangovu,” “Tate wa Mwaya Myaka,” “Mwana Mwene waku Mwena.”

⁷ Ngovu na ku mwena kwa kulela kwendi kukamana bifwako. Ukekala ha litanda lya Ndavita, kami ukalela ha wene wendi ukayata shiwahe mu kupwisha na kulunga, ku balika ku shikati shino kutwala na mwaya myaka. Lihungu lya Nyambi wa Makunge nilyo likatenda eshe.

Nyambi ya Ngula ukashushula Ishalela

⁸ Mwene unatumu lushango lwa kulwisha Yakobo, kami lukawila ha Ishalela.

⁹ Bantu nimwabo bakalimuka luya lushango, Efulemu na bantu bekala mu lukena lwa Shamaliya nimwabo, aba bambanga na kuliyemeza na kulilundumika ngayi,

¹⁰ “Matala akuzika na shintina ananyemukili hanci, ngoboni tuka wa tendulula na mamanya akubebulula. Mikambo ya bitondo bya mukuyu binaketuliwi, ngoboni tukahingishamo mikambo ya bitondo bya shinda.”

¹¹ Niho Nyambi ya Ngula ukatumeza bamalamo ba mwene Lezina mu kubalwisha, pe ukashonkomona bamalamo babo.

¹² Baashiliya ku mushamuko na Bafwilishitina ku mponci, banayahamishi tunwa twabo kuvwota Ishalela. Hinge noho wukali wa Nyambi ya Ngula kukafwomoka wufwako na liboko lyendi lishili kukolobela mu kushushula.

¹³ Bantu ba Ishalela bafwako kutenguluka, hinge ndi Nyambi wa Makunge unabashushulu, shilolo batengulukile kukwendi.

¹⁴ Pe mu mutena umo, Nyambi ya Ngula ukaketula mu Ishalela mutwe na mushila, mwahi wa munkomona na litete.

¹⁵ Balume ba babakulwane na babilolo ba kupanikiwa maleema nibo mutwe, bamiluwe bakakulongesha bya mahalo nibo mushila.

¹⁶ Baya batwamininine aba bantu ba bayongeshele na ku batwaminina ku kuloba.

¹⁷ Nohobene Nyambi ya Ngula wufwako ku wahilila ha bandumbana babo, shikeketima wufwasho haba nginga babo na bamfwile ndaba nimwabo kaliha bakanyambi na kuluwa, kami nimwabo bakwamba byabibi. Hinge noho wukali wa Nyambi ya Ngula kukafwomoka wufwako na liboko lyendi lishili kukolobela mu kushushula.

¹⁸ Mwa shikuma kuluwa kwa bantu kwa banganga ngo mundilo, kwahokeshanga mikona na mihongela. Kwahokeshanga mashaka akuzika, pe wishe wakakumukanga muyilu nehe makumbi.

¹⁹ Wukali wa Nyambi wa Makunge ukuhokesha litunga, kami bantu bakwinga ngo nkuni za ku bangisha mundilo. Kowa ukuyuvwila shikeketima minendi.

²⁰ Bakuhukula byakulya bili ku shilyo, ngoboni bashili kuyuvwa nzala. Ba kuvwota nimwabyo bya ku shimoho, ngoboni kwikuta bafwako. Muntu na muntu ukulya nyama ya lutu lwa minendi.

²¹ Bantu ba Manashe bakulwisha bantu ba Efulemu na bantu ba Efulemu bakulwisha bantu ba Manashe. Nimwabo kami bakulwisha Yunda. Hinge noho wukali wa Nyambi ya Ngula kukafwomoka wufwako na liboko lyendi lishili kukolobela mu kushushula.