Ishaya 7 - Libuka Lya Kuyela

Ncango za mwene Ahazi

¹ Oho Ahazi mwana Yotamu, ou wengile muzukulya Uziya, alelele Yunda, nzita yakatukile. Lezina mwene wa Shiliya na Peka mwana Lemaliya mwene wa Ishalela, bezile mu kulwisha Yelushalema, ngoboni bakwangile kulukoma.

² Oho ncango za kumine kuli Ahazi mwene wa Yunda ngayi, “Shiliya unalikwata shikonzi na Efulemu,” niho mutima wendi na mitima ya bantu bendi yatinine shikuma ngonehe shiya yanyenkananga mitondo na mpepo yayinene shikuma.

³ Niho Nyambi ya Ngula ambile kuli Ishaya ngayi, “Yenunga mushimbawile Ahazi obe na mwanobe Sheyela Yashubi. Mukamuwana ku nkumo ya lilomba liya lya tutwishanga mema kufuma ku liziba lya kuyilu, mu nzila ya kuya ku mwanya uya bantu bayoweshelanga makwiza.”

⁴ Pe mukamutongweze ngayi, “Keya, tula mutima hinga utina, mutima wobe hinga upopa, ndaba ya wukali wakubamba wa mwene Lezina na Baashiliya na nou wa mwana Lemaliya. Bya lifweke ngonehe otu tushinzi tubili twa mundilo tu kututuma wishe.”

⁵ Shiliya hamo na Efulemu na mwana Lemaliya banafungu byabibi hahobe bakwamba ngayi,

⁶ “Tuyenu mu kulwisha Yunda na kumutinisha, pe tukamukome na ku shwanisha mwana Tambilu kwinga mwene.”

⁷ Ngoboni Mwene Nyambi ya Ngula, ukwamba ngayi, “Owo mafumbila kukatwesheka afwako, kami eshe banamba kukatendiwa shifwako.

⁸ Ndaba lukena lwa Shiliya lwenga Ndamashika, kami kalela wa Ndamashika wenga Lezina. Mu myaka 65, Efulemu ukalobeshiwa, pe mwaka kukenga kami matunga ufwako.

⁹ Kami lukena lwa Efulemu lwenga Shamaliya kami kalela wa Shamaliya unengi mwana Lemaliya. Ndi kukulupila kwenu kaliha kwa ku shuma, mwa shikuma kutwesha kwimana mufwako.”

¹⁰ Nyambi ya Ngula watumine kami ncango kuli Ahazi ngayi,

¹¹ “Nyepa Nyambi ya Ngula, Nyambi yobe ngayi akupane shilimukisho, hinge sha kufuminina ku kalunga ka bafu hinge sha kufuminina hayilu hahatali ngo kuyilu.”

¹² Ngoboni Ahazi wakumbwile ngayi, “Kukanyepa nifwako kami kushinga kwezeka Nyambi ya Ngula nifwako.”

¹³ Ishaya wambile ngayi, “Haya yuvwenu, enu ba litala lya Ndavita. Kati shinengi shuma shashishe kukwangisha bantu ndi? Mukushinga kami mukwangishe na Nyambi yami ndi?

¹⁴ Nohobene Mwene niye mwine mukakupana shilimukisho, kankanga ukemita na kubeleka mwana wa mulume, ukatumbiwa Imanuwele.

¹⁵ Oho akahumuka na kulimuka byabibi na byabiwahe, ukalyanga tuhu mahwe a mafwi na wushi.

¹⁶ Ndaba ngayi oho shilolo alimuke kukana byabibi na kuhata byabiwahe, matunga a bamyene babili baya mwatina akafutaminiwa.”

¹⁷ “Nyambi ya Ngula ukaleta hahobe na bantu bobe hamo na baka litala lya tatiyobe matena amakalu shikuma, oho litunga lya Efulemu lya ketukile ku litunga lya Yunda, ukaleta mwene wa Ashiliya.”

¹⁸ “Ha mutena uyo Nyambi ya Ngula ukashiba mulozi kwinga shilimukisho ku Baengepita na Baashiliya. Baengepita bakeza mu wingi ngo banzinzi kufuma ku tushinzi twa kwakutali na Ashiliya kufuma ku litunga lyabo ngo bampuka.

¹⁹ Pe nimwabo bakeza na kwikala mu mikulo na mu manzolongoma a mamanya namu mapukumuna a mihongela naku mabuyishilo a bimuna nimwako.

²⁰ “Ha mutena uyo, Mwene ukakumuna kabemba mu nciza ya mushinzi wa Yufuleta, kuli mwene wamunene wa Ashiliya. Pe ukasheha milevu yenu na huki za ku mitwe yenu, hamo na wushako wa ha zinyutu zenu.

²¹ “Ha mutena uyo hinge ndi ndimi ukekala na mwana ngombe yimo na bambelele babili tuhu,

²² bakamupana mahwe amengi shikuma akutenda mafwi. Ee, bantu babashe bakashala mu litunga bakalya mahwe a mafwi na wushi.

²³ “Ha mutena uyo nimwako kwekalile mafuba a mikolobozi ya shinyanca, likulukazi likutwesha kulandiwa na likulukazi lya mali a muwayawaya wa shiliva, mukamena mitwampuku na mapukumuna a mihongela.

²⁴ Bantu bakaya na kuyombelamo na bipando bya mivwi. Ee, litunga nimwalyo likenzala na mitwampuku na mihongela,

²⁵ twina nimwato tuyo twalimiwilenga na makahu tukatambilila mitwampuku na mihongela, kami kowa ukayamo. Pe ukenga mwanya wakubuyishila zingombe na bambelele.”