Ishaya 66 - Libuka Lya Kuyela

Nyambi ya Ngula ukuyata matunga

¹ Nyambi ya Ngula ukwamba ngayi, “Liyilu lyenga litanda lyami, na hanci henga malyatilo a mawulu wami. Litala lya mushobo ngani mu kutwesha kunzikila, na mwanya wa mushobo ngani omu nikutwesha kwikala?

² Kati liboko lyami kaliha linatende byuma nimwabyo ebye ndi, kami nimwabyo byenga byami. Ngoboni nikafulankana muntu uyo, mu ka kulilimbwilisha na kulishisha ku wubi wendi, na kukanka oho akuyuvwa lizu lyami. Eshe nisho anamba Nyambi ya Ngula.

³ Ngoboni kuli bantu ba kutenda bya bawahilishanga, kukwabo howa kulishiya kukukombelela nkunzi, hinge kukombelela muntu, ndi ba kukombelela mbelele, hinge ku mungula mukoshi wa kawa, hinge ndi ba kukombelela mpeka, ndi bakutupula mukeza wa ngulube. Ndi ba kuhokesha incence, hinge kulemesha tunankishi. Ba nalihatili zinzila zabo, kami mitima yabo yiku wahilila mu byuma bya wunyengwe.

⁴ Nohobene nami nikabahatila nyinkalo ya shilala, na kubengisha bowa, ndaba na behanine, kowa wa nkumbwile. Oho nambile, kowa wanyuvwililile, batendele byabibi ku meho ami kami balihatilile kwamba byuma bya kubula kungwahililisha.”

⁵ Yuvwililenu lizu lya Nyambi ya Ngula, enu mu kukankila lizu lyendi bawushindawenu baya bamizimba, na kumi kenda ndaba ya lizina lyami, bakwamba ngayi, “Nyambi ya Ngula alemekiwe, ngayi tumone kutangala kwenu.” Ngoboni nibo bakayeneshiwa.

⁶ Yuvwililenu oyo mishunga mu lukena, yuvwenu oyo miyoyo yikufuminina mu Litala lya Nyambi. Yinengi miyoyo ya lizu lya Nyambi ya Ngula, ou uli na kushushula bamalamo bendi.

⁷ Lukena lwami lwa kuyela lunafweke ngo mbuyama ou na bazumuku tuhu washalahonikale, kwakubula kuyuvwa kukola.

⁸ Yani wayuvwa shuma sha nehe? Yani wamona shuma sha nehe? Kati litunga likutwesha kuhemuwa mu mutena umo, hinge bantu ba kuholoka mu shikati shashishe ndi? Ngoboni Ziyoni wabelekele bana bendi, kwakubula kwihala.

⁹ Nyambi ya Ngula nepulu ngayi, kati nikakandika bantu bami kuhemuwa, oho shikati shabo shinakumu ndi? Kati ni ku shinka nzila ya mu kakubeleka, oho nishinga ngayi abeleke ndi? Eshe nisho anamba Nyambi ya Ngula.

¹⁰ Wahililenu na Yelushalema, tangalenu hahendi, baya bamuhaka nimwabo. Wahililenu mumwendi na kutangala, baya bamulililenga nimwabo.

¹¹ Ngayi mwanga mukayamwe na kwikuta na mabele wendi akubengezekesha, ngayi mukanwe na ku wahilila ku wuheti wendi wawingi.

¹² Nyambi ya Ngula ukwamba ngayi, monenu, nikamutangamisha ngonehe mushinzi, wuheti wa matunga ukakukila kukwenu ngonehe kashinzi kaya kabulanga kuyuma, pe mukayamwa na kumiyaka mu mbebe yendi, na kumi lela, ha manungo endi.

¹³ Nikakubengezekela mu Yelushalema, ngonehe manda muntu abengezekanga mwanendi.

¹⁴ Mukamona eshe shikaholoka, pe mitima yenu yikawahilila, bifupa byenu bikatama ngonehe mwila wamulombelela, pe kukalimukiwa ngayi liboko lya Nyambi ya Ngula, lili ha bakamilimo bendi, ngoboni ukamonesha wukali ku bamalamo bendi.

¹⁵ Monenu, Nyambi ya Ngula ukeza mu mundilo, na makoloyi wendi akenga ngo kakundukundu, ngayi akabatokomokele na kupilama kwendi, na wukali akabambile na milangi ya mundilo.

¹⁶ Nyambi ya Ngula ukayata bantu nimwabo, bamu kaye na mukwale wendi na mundilo, aba bakazihiwa kuli Nyambi ya Ngula bakenga babengi.

¹⁷ Obo baliyeleshanga nibo bamwine na kutendela banyambi bowa, ngayi baye mu mafuba umo na umo, ba kulya nyama ya bangulube, miholobozi na bampuku, nimwabo bakamaninina hamo.

¹⁸ Ndaba nikulimuka milimo yabo na bihanganiko byabo, nili na kwiza na kukungula matunga nimwao na zindimi, oho bakeza, bakatwesha ku mona wuwahe wami.

¹⁹ Kami nikayaka shilimukisho mukati kabo. Hakati kabo nikatuma mashaliza ku matunga, ku baka Tashishi na Limbiya, baka Lindiya na bantu bendi bawunongi wakupuha bipando bya mukunzi ku Tumbalu na Ngilishi nanaba bekala kwakutali ku bibumbo bya liwate, baya banabulu kuyuvwa hinge ku mona wuwahe wami, pe bakashimika wunene wami.

²⁰ Bakafumisha baminenu nimwabo mukati ka matunga, kwinga ngo ntupu kuli Nyambi ya Ngula, bakabaleta ha bambishi na ha mambema na ha makamela mu makoloyi na bikocikala ku lipili lyami lya kuyela mu Yelushalema, ngonehe shiya Baishalela baletanga ntupu ya mpeka ha bikwatilo bya kuyela mu Litala lya Nyambi.

²¹ Nikakwataho bamo ngayi benge bakankombela na Balevi. Eshe nisho anamba Nyambi ya Ngula.

²² Ndaba ngonehe liyilu lyalipya na kaye kakapya, aka nikalenga bikekala mwaya myaka, nisho kami bazukulyenu na mazina wenu bikalaluka,

²³ Ku balika ha ngonda nimwendi wamupya kutwala ku ngonda wamina wamupya, ku balika ha mutena wakukatala kutwala naku mutena wamina, bantu nimwabo bakeza na kundemesha kuno ku Yelushalema. Eshe nisho anamba Nyambi ya Ngula.

²⁴ Pe oho bakatutikanga bakamona mituntu ya bafu ya baya bamfutulukilile na kundwisha. Mapila aya akabalya kukafwa afwako na mundilo uya ukabahokesha kukazimiwa wufwako, bakengisha wunyengwe bantu nimwabo.