Ishaya 65 - Libuka Lya Kuyela

Bakakufutulukila bakashushuliwa

¹ Nalibalakanyine kukumbula malombelo a bantu bami, ngoboni kaliha balombelele. Nalibalakanyine baya bancingilenga, ngoboni babulile kwezeka kuncinga. Hinge ndi ami nalibalakanyine kukumbula ngayi, “Ami uno, Nikamiyavwa.” Ku litunga lyabulile kwihana ha lizina lyami.

² Shikati nimwasho naliwahishila kutambula bantu bakakufutulukila na bakakutenda byabibi, na kuya mu zinzila zowa za kubula kuyilamo.

³ Bantu aba bazamina kumpilamisha shikati nimwasho, ba kukombela zinkombela mu mafuba na kuhokesha incence ha tuula twabo.

⁴ Obo bekalanga mukati ka binzimbi, wushiku nimwawo na kwamba ku mipashi ya bantu ba kufwa, baya ba kulya nyama ya bangulube na kunwa muhozi wa nyama yinatupuliwi ku zinkombela.

⁵ Baya bakwamba ku bamina ngayi, “Fumenu aha, hinga muhenyena hahepi nanetu, ndaba etu tuli ba kuyela.” Bantu banehe banengi ngonehe wishe mu mizulu yami, na mundilo ukubanga mubangilila.

⁶ Monenu, kwatikitiwa kukwami, nifwako kukamwena. Ni kaba bweshela wubi wabo.

⁷ Ha wubi wabo na wubi wa batatizabo, eshe nisho akwamba Nyambi ya Ngula. Ndaba bahokeshelele nkombela ha mapili, twa bakalitunga na kwamba byabibi kukwami, pe nikabashushula kuya na biheka byabo bya kunyima.

⁸ Nyambi ya Ngula ukwamba ngayi, ngonehe waine ya waniwanga ku lihozozo lya shinyanca, nehi bantu bakwamba ngayi, “Hinga ulicancola, ndaba kushili byabiwahe kukwalyo,” nami kami nisho nikatenda, ndaba ya mukamulimo wami, kuka balobesha bantu bami nimwabo nifwako.

⁹ Nikapindula bazukulu kuli Yakobo, naku mushobo wa Yunda bakakona litunga lyami, bantu bami ba kuhatiwa bakalikona, na bakamilimo bami bakazika kuyo.

¹⁰ Mbuwa ya Shaloni yikenga mabuyishilo a bambelele, na mukulo wa Akola wafutukile malalo a zingombe, ndaba bantu bami banancingi.

¹¹ Ngoboni enu mwakanine Nyambi ya Ngula, mwavulamine Ziyoni lipili lyami lya kuyela, oku mu kulemesha Ngandi na Meni, banyambi ba kuleta kutandala na kutamwa.

¹² Nikamifungwila nakamizihisha mu nzita, pe nimwenu mukanyongamina hanci ngayi bamiketule mitwe, ndaba oho namihanine kaliha mwankumbwile, kami oho nambilenga kaliha mwanyuvwilile, ngoboni mwatendele byabibi ku meho wami, pe mwahatile ebye byancipishile ku mutima.

¹³ Nohobene Nyambi ya Ngula, ukwamba ngayi, monenu, bakamilimo bami bakekala na byakulya, ngoboni enu mukalanduka ku nzala. Bakamilimo bami bakanwa mema, ngoboni enu mukayuvwa linyontwa. Bakamilimo bami bakawahilila, ngoboni enu mukayuvwa lisheni.

¹⁴ Monenu, bakamilimo bami bakembila na kutangala, ngoboni enu mukalila, ndaba ya kukola shikuma ku mutima.

¹⁵ Bantu ba kuhatiwa bakaliyavwisha lizina lyenu enu bakubula kwombatala ha ku kuta, pe ami Nyambi ya Ngula nikamiziha, ngoboni bakamilimo nikabatumba lizina lyalipya.

¹⁶ Nohobene ou ukushinga mfuywezi mu litunga liyo, ukanyepa mfuywezi kuli Nyambi wa kupwisha, kami muntu nimwendi ukulibeza mu litunga liyo, ukalihaha na Nyambi wa kupwisha, Ndaba wukalu wakumwaka unavulamiwi, kami unafumishiwi ha meho wami.

Kulenga kwakupya

¹⁷ Nyambi ya Ngula ukwamba ngayi, nili na kulenga mayilu amapya na hanci hahapya. Ebi binatendiwi kunyima nimwabyo bikavulamiwa, kukanukiwa bifwako.

¹⁸ Wahililenu na kutangala mwaya myaka, hanebye nikalenga. Monenu, nikatenda Yelushalema wamupya, ukenga wamuwahe na bantu bendi bakawahilila.

¹⁹ Nikawahilila ha Yelushalema, na kutangala na bantu bami. Kukaloka na mbingo za kulila, kukayuvwanika mu lukena bifwako.

²⁰ Bambututu kukafwa oho bashili babashe bafwako, kami bakulwane bakayoya kukuma na ku mamaninino a myaka yabo. Ou ukafwa oho uli na myaka ya kukuma ha mwanda, ukahanganikiwa ngayi nafu oho ushili kanuke. Ou ukafwa oho shilolo akume ha myaka ya mwanda, ukahanganikiwa ngayi wakukutiwa uli na wubi.

²¹ Bakazika matala na kwikalamo, bakakuna mafuba a shinyanca na kulya mikabo.

²² Kukatenda matala ngayi mwikale bantu bashenge bafwako, hinge kuka kuna mafuba a shinyanca aya bakabula kulya mikabo bafwako. Bantu bami, bakayoya ngonehe matena a mutondo, pe bakakuhatiwa bami, bakalikuwa shikati shashitali ebye banatende na maboko abo.

²³ Bafwako kukatenda milimo ya ntalu. Bafwako kukabeleka bana bakafwa oho bashili batwanuke, ndaba Nyambi ya Ngula ukabafwuywela, hamo na bazukulyabo.

²⁴ Oho shilolo behane, nika kumbula, oho bashili kwamba, nikabayuvwa.

²⁵ Bambinzi na bambelele, bakalya hamo, shimbwi ukabuya mwila ngonehe ngombe, pe lukungu lukenga byakulya bya liyoka. Bifwako kukahumana, hinge kukalobesha wamina ha lipili lyami lya kuyela. Eshi nisho akwamba Nyambi ya Ngula.