Ishaya 64 - Libuka Lya Kuyela

¹ Haya shinga unatabulu mayilu hakati na ku shulukila hanci, ngayi mwanga mapili akakumone, na kukanka ku meho wobe na bowa.

² Bakakanka ngonehe mundilo walashekanga ha kuhokesha nconco, ngonehe mundilo waleteshanga mema ngayi abile. Nobe yeka uholole lizina lyobe ku bamalamo bobe, ngayi ukankishe matunga ku meho wobe.

³ Ndaba oho watendele byuma bya kutinisha, biya twabulile kutatilila ngayi bikamoneka. Washulukile, pe mapili akumonene akankile ku meho wobe.

⁴ Ku balika kubikati bya kushikale, kowa muntu wayuvwako hinge kumutengekela litu. Kowa liho lyamona Nyambi washenge, ndele obe ukutwesha kutendela baya ba kumutatililila.

⁵ Ukuyavwa baya ba ku wahilila ha kutenda bya kulunga, baya ba kukwanuka kwenda mu zinzila zobe, Monenu, ngoboni oho twazaminine Kubipisha watulamwinine kati tukutwesha kupuluka nahiti?

⁶ Nimwetu tunafutuku kwinga bababi, na ntendelo yetu ya kulunga ya futukakale ngo shivwalo sha wunyengwe, ndaba ya wubi wetu tukwinga ngonehe mabizi akulebuka, pe kutengama kwetu ngonehe mpepo, kukatupepwila kwashenge.

⁷ Kowa muntu wakwihana ha lizina lyobe, hinge kwezeka shikuma ngayi mwanga amikakatile, ndaba unatuholekele lupala lwobe, na kutulehela mu maboko a milandu yetu.

⁸ Hinge shingi noho, obe Nyambi ya Ngula uli tatiyetu, etu tuli lima, obe mbumbi, nimwetu tuli mulimo wa maboko wobe.

⁹ Obe Nyambi ya Ngula, hinga utukalihila shikuma, pe hinga wanuka Kubipisha kwetu pe umone, na kuhanganikaho, nimwetu tunengi bantu bobe.

¹⁰ Zinkena zobe za kuyela zafutukakale libelelengwa. Ziyoni wafutukakale libelelengwa Yelushalema kami unalobeshiwi.

¹¹ Litala lyetu lyaliwahe na lya kuyela, oku bankakazetu ba kuyemezelenga, linahokeshiwi na mundilo, myanya yetu nimwayo yayiwahe yinafutuku mapembe.

¹² Obe Nyambi ya Ngula, kati ushili kutulumana ha nimwabyo ebye ndi? Kati uku mwena tuhu nee na kubula kutendaho shuma shimina ndi? Nakutuyandisha shikuma ndi?