Ishaya 63 - Libuka Lya Kuyela

Nyambi ya Ngula ukukona matunga

¹ Yani ou uli nakufuminina ku Endoma, hinga avwala bya kufubila kufuminina ku Mbozila, Yani ou unavwala na maleema, ou uli na kwenda na ngovu? “Nengi Ami nikwamba bya kulunga, mukakupulwisha wa ngovu.”

² Kati shumangani, bivwalo byobe binafubili shikuma, ngonehe bivwalo bya mukakulyatangila mushizongelo sha mikabo ya shinyanca?

³ Nalyatangili bakamatunga, ngonehe mikabo ya shinyanca, kowa ou unanyavwa. Nabalyatangili hinga napilama, pe mukeza wabo, unashabukili ha bivwalo byami.

⁴ Ndaba mutena wakushushula, wekalile mu mutima wami, pe mwaka wakukuliza kwami, wakumakale.

⁵ Nashingile muntu wakunyavwa, ngoboni kaliha namuwanine. Napilamine, oho kwabulile wakunyavwa, ngoboni liboko lyami lyantwesheshele kukoma. Kami wukali wami, wanyavwile.

⁶ Nalyatangilile bakamatunga hinga napilama. Na bakolweshele na wukali wami, na kuyitila mukeza wabo hanci.

Wuwahe wa Nyambi ya Ngula ku Ishalela

⁷ Nikashimikila shishemo sha mwaya myaka, na Nyambi ya Ngula, na kumuyemeza ha nimwabyo ebye anatutendele Nyambi ya Ngula. Unatende byabingi byabiwahe, ku baka litala lya Ishalela ndaba ya shishemo shendi, na nceshe zendi za mwaya myaka.

⁸ Nyambi ya Ngula wambile ngayi, “Mwa shikuma banengi bantu bami, bana baya bakubula kutwesha kunyongeza.” Pe niho engile mulamwini wabo.

⁹ Mu makalikiza wabo nimwawo, wayandile nabo, lingeloyi wafumine kukwendi wabapulwishile. Mu nceshe zendi na shishemo shendi waba kulizile. Niye wabalaminenga, mu matena nimwawo akunyima.

¹⁰ Ngoboni bamufutulukilile na kuyenesha Moyo wendi wa kuyela, nohobene Nyambi ya Ngula, wafutukile kwinga kamalamo wabo, pe wabalwishile.

¹¹ Niho banukile matena akunyima, ha matena a Moshesha mukamulimo wendi, pe wepwile ngayi, “Kati uli kuti ou wapitishile bantu bendi mu liwate na balishani ba litanga lyendi, kati uli kuti ou wayakile Moyo wa Kuyela wendi hakati kabo?

¹² Kati Nyambi ya Ngula, uli kuti ou watendele byuma byabinene, kupitila muli Moshesha, ou kami watapulwile mema amu liwate, ngayi mwanga atumbalalishe lizina lyendi mwaya myaka.

¹³ Pe wabapitishile mu mampunga a liwate ngonehe mbishi ukwenda mu libelelengwa, kami kaliha balituntwile?”

¹⁴ Ngonehe zingombe zikukunkuluka ku mbuwa ya wilo, na moyo wa Nyambi ya Ngula wabapanine kukatala. Nisho wendeshele bantu bobe, ngayi mwanga utumbalalishe lizina lyobe.

Lilombelo lya kushinga kuyavwiwa

¹⁵ Obe Nyambi ya Ngula, wekala muyilu ha litanda lyobe lya kuyela na maleema, penza hanci umone. Kati yili kuti ntukumina yobe na ngovu zobe? Shili kuti shifungo sha mutima wobe na shikeketima shobe, kati wabifumisha kale kukwetu ndi?

¹⁶ Ndaba uli tatiyetu, hinge ndi nkaka yetu Abulahama kutulimuka afwako, na Ishalela kaliha wetabilile, ngoboni obe Nyambi ya Ngula uli tatiyetu. Walitumba ku balika kushikale ngayi, mukakukuliza.

¹⁷ Obe Nyambi ya Ngula, kati shumangani kutushanwishila mu zinzila zobe? Kati shumangani ukutukaluhishila mitima ngayi tubule kukutina? Boka ndaba ya bakamilimo bobe, naha mishobo yiya yenga likona lyobe.

¹⁸ Bantu bobe ba kuyela bekalile na mwanya wobe kashikati kakashe, bamalamo betu banalyatangili litala lyobe lya kuyela hanci.

¹⁹ Twafutukakale ngo bantu baya benga hinga watanga kubalela, ngonehe baya babula kwihaniwa na lizina lyobe.