Ishaya 61 - Libuka Lya Kuyela

Ncango zaziwahe za kulamwina

¹ Moyo wa Nyambi ya Ngula uli hahami, ndaba unangwabishi mu ku shimikila ncango zaziwahe ku ba kushepwa. Ku manga mitima ya ba kupokoka. Unantumu mu kubilika ku shoboloka ku bantapwa, ku shobolola baya banalyatilili na ku shimikila, kami mu kufumisha baya banamangiwi mu tolongo.

² Mwanga nibilike mwaka wakuyamiziza kwa Nyambi ya Ngula, na mutena wakubweshela bamalamo, na kubengezeka baya ba kulila nimwabo.

³ Mukuvwika baya ba kulila ku Ziyoni munana, Mazu a kuwahilisha kupitakana kulila, shivwalo sha kuyemeziwa kupitakana, moyo wakuhomba, mwanga batumbiwe ngayi mitondo ya kulunga ya Oka, biya atampikile Nyambi ya Ngula, niyemwine ngayi mwanga ayemeziwe hanebye anatende.

⁴ Bakatendulula mapembe a bashikale, bakapindula biya byabipishiwile ha kutatika, bakatendulula zinkena za kuwa ziya zalobele ku bihemunwino byabingi kunyima.

⁵ Enu bantu bami, mapukwenda bakabuyisha matanga wenu a bambelele, na bayeni bakamiliminanga, na kulama mafuba wenu a shinyanca.

⁶ Ngoboni mukatumbiwa ngayi bakankombela ba Nyambi ya Ngula, bantu bakamitoya ngayi bakakutendela milimo Nyambi yetu, mukalikuwa wuheti wa matunga, pe mu wuheti wabo nimo mukaliyemezela.

⁷ Kupitakana kwikala na lisheni, mukekala shitapilo kabili. Kupitakana ku shampuliwa, mukawahilila mu likona lyenu, nohobene mukatambula bitapilo bibili mu litunga lyenu, ku wahilila kwenu kukekala mwaya myaka.

⁸ Nyambi ya Ngula ukwamba ngayi, nashinga kuyata na kuketula byambo shiwahe, nazimba wukombe na ntendelo yayibi, nikabapana ncuungu na kulimama nabo kulimama kwa mwaya myaka.

⁹ Bazukulyabo bakalimukiwa hakati ka matunga, pe bana babo bakalimukiwa mukati ka matunga. Nimwabo bakabamona bakabalimuka, ngayi banengi bantu aba anafuywele, Nyambi ya Ngula.

¹⁰ Nikawahilila shikuma muli Nyambi ya Ngula. Moyo wami ukaliyemezela muli Nyambi yami, ndaba unamvwaliki shivwalo sha kupulwishiwa. Namfwiki na shivwalo sha kulunga, ngonehe mukakuyeka unalivwaliki, niyemwine hoshi ya shifupawenga, kami ngo mwenga unaliyenge, niyemwine na bya kuliyenga byendi.

¹¹ Ndaba ngonehe limvu lya tutwishanga mbuto kwinga zinconga, kami ngonehe ameneshanga ebye binakubiwimo, nahiyo kami, mwene Nyambi ya Ngula ukaleta kulunga, na kuyemeziwa ku matunga nimwawo.