Ishaya 60 - Libuka Lya Kuyela

Wuwahe wakumbili wa Ishalela

¹ Katuka, obe Yelushalema, byazima ngonehe ku byazima kwa mutena. Wuwahe wa Nyambi ya Ngula ukubyazimina hahobe.

² Mona, mincimpwe yikafwika hanci na mincimpwe yayinene yikafwika matunga, ngoboni Nyambi ya Ngula ukekala nanenu, kami wuwahe wendi ukamoneka hahenu.

³ Na matunga akeza ku mwaana wobe, na bamyene kami bakeza na ku mona mincalala yobe.

⁴ Yimbula meho obe, pe upenze noku noku umone bikutendiwa, bana bobe bali na kukunguluka kwiza kukwobe. Bana bobe babalume bakufuma kwakutali, kami bana bobe ba bambuyama bakashimbiwa ngo bambututu.

⁵ Oho ukamona ebye, pe ukawahilila, ukakanka ndaba ya ku wahilila shikuma. Wuheti wa matunga ukaletiwa kukwobe, kufuminina mu nciza ya liziba.

⁶ Mihoko yayinene ya bakamela yikafuma, ku Mindiyani na ku Efwa. Bakafuma ku Shemba, bakeza na kuleta ngolinde na incence. Bantu bakabilika kuyemeza Nyambi ya Ngula.

⁷ Matanga a bambelele ba ku Kenda, bakakungulukila kukwobe, bikungwe bya bambelele ba ku Nebayoti bikaletiwa kukwobe. Ziketabilishiwa kwinga nkombela ya ha kaala kami, nikatambula nkombela yabo, na kuwahisha litala lyami kwinga lyaliwahe kupitakana kunyima.

⁸ Kati bishini mato amanene akukuka hayilu ngo makumbi, awa akutuka ngo bankilimba bakuya ku shitombo shabo?

⁹ Anengi mato amanene akufuma ku matunga akwakutali, Mato amanene aku Tashishi akuleta banabobe. Ali na kwiza na shiliva na ngolinde, mu kulemeeka lizina lya Nyambi ya Ngula, Nyambi yenu, wa Kuyela wa Ishalela. Niye unengishi matunga nimwawo ngayi enge akukomokesha.

¹⁰ Nyambi ya Ngula ukwamba ku Yelushalema ngayi, mapukwenda bakatendulula mamota wenu, pe bamyene babo, bakamitendela milimo, ndaba na wukali wami namishushwile. Ngoboni haya nikamiholwela shikeketima na nceshe.

¹¹ Mapangati wenu akenga akushinkuluka shikati nimwasho, mwaana na wushiku kowa ukawashinka. Ngayi mwanga bantu ba mu matunga, na bamyene babo bamiletele wuheti.

¹² Ngoboni matunga na wene uya ukabula kumitendela milimo ukaloba. Aya matunga akaloba nimwawo.

¹³ Mitondo ya mupani na yunipa na shayipulashi, mitondo yayiwahe shikuma ya kufuma ku Lembanoni, kwiza na kuwahisha mwanya wami wa kuyela. Nikaleemeka mbalila iya nalyatilanga mawulu ami.

¹⁴ Bana babaya bamiyandishilenga, bakeza mu kulamba kukwenu. Kami nimwabo bamihandwilenga bakashintama ku mawulu wenu. Bakakutoya ngayi, lukena lwa Nyambi ya Ngula, Ziyoni, wa Nyambi wa kuyela wa Ishalela.

¹⁵ Hinge ngayi wakendiwile na kuzimbiwa, kami kaliha kwekalile muntu wapitilenga kukwobe, ngoboni nika kunenehesha mwaya myaka, waku wahilila ku bihemunwino nimwabyo.

¹⁶ Ukanyamwa ku mahwe a matunga, ukanyamwa ku mabele a bamyene. Niho mukalimuke ngayi, Ami Nyambi ya Ngula, niye mukakumipulwisha wenu. Namuka kumi kuliza, Nyambi Wangovu wa Yakobo.

¹⁷ Kupitakana kumi letela lubemba, nikahingishamo Ngolinde. Mu byondo nikahingishamo shiliva, namu bitondo nikahingishamo lubemba. Nikahingisha byondo mu mamanya, batulela bobe nikabenga ba kuleta ku mwena. Bakamyendesha mu ku mwena na mu kulunga.

¹⁸ Mu litunga lyobe mufwako kami kukekala mishunga, bya Kubipisha hinge bya kulobesha bifwako kukekala ku zingiza za litunga lyobe, ukatumba mamota wobe ngayi, “Kupulwishiwa” na mapangati wobe ngayi, “Kuyemeza.”

¹⁹ Lukena kaliha lwashingile mincalala ya mutena, hinge wezi wa ngonda, ndaba wuwahe wa Nyambi walumunikile, ngoboni Nyambi ya Ngula ukenga, mwaana wobe mwaya myaka na Nyambi yobe ukenga maleema wobe.

²⁰ Mutena kukalela ufwako, hinge ngonda kuya ku mincimpwe. Nyambi ya Ngula ukenga mwaana mwaya myaka, kami matena akulila kwobe akamana.

²¹ Bantu bobe nimwabo bakenga bakulunga, bakakona litunga mwaya myaka. Ntombola eye natampikile unengi mulimo wa maboko wami, ngayi mwanga niyemeziwileho.

²² Wamushe ukafutuka kwinga mavumo, na wamushe shikuma ukenga matunga a ngovu, Ami Nyambi ya Ngula, nikaholola eshe wanguwangu ha shikati shasho.