Ishaya 6 - Libuka Lya Kuyela

Nyambi ya Ngula ukwihana Ishaya kwinga muluwe

¹ Mu mwaka afwile mwene Uziya, namonene Mwene hinga ekala ha litanda na maleema hayilu. Lyambangubo lyendi lyenzalile mu Litala lya Nyambi.

² Hayilu yendi hemanine mashelafwimu, limo na limo lyekalile na mbando mutanu na lumo. Na mbando zibili, zalifwikile ku meho na mbando zamina zibili, zalifwikile ku mawulu, ezi zamina zibili, nizo atukishilenga.

³ Embililenga ngayi, “wa Kuyela, wa kuyela, wa kuyela, Nyambi wa Makunge, wa kuyela, Kaye nimwako kanenzala na wuwahe wendi.”

⁴ Oho bembililenga, bikwiliti bya bipana byanyenkanine na Litala lya Nyambi, lyenzalile na wishe.

⁵ Nambile ngayi, “Makando wami tawee, nafwakale, ndaba ya mivumbo yami ya kubula kuyela, kami nekala mukati ka bantu bamivumbo ya kubula kuyela, kami meho ami anamono Mwene, Nyambi wa Makunge.”

⁶ Niho lishelafwimu limo lyatukilile kukwami, hinga lya shimba lishanga lya mundilo, elye ashimbile ha kaala na zimanya.

⁷ Niho akwatile ha mivumbo yami na lishanga lya mundilo kami na kwamba ngayi, “Mona, mivumbo yobe yinakwatiwi naneshe, haya mulandu wobe unamana na wubi wobe unayatiliwi.”

⁸ Niho nayuvwile Mwene hepula ngayi, “Kati yani ou nikatuma? Yani ou ukenga ntumwana wetu?” Niho na kumbwile ngayi, “Ami uno ntumenu.”

⁹ Niho ambile ngayi, “Yanga ukatongweze aba bantu ngayi, ‘Kuyuvwa hi muyuvwa, ngoboni ku yuvwishisha mufwako, ku mona himumona, ngoboni kumoneshesha mufwako.”

¹⁰ Yebesha ngana za naba bantu zika matu abo, zimananisha meho abo, kutina bamona na kuyuvwa, hinge babule ku yuvwishisha pe babule kutenguluka ngayi mwanga ni ba nyongomanishe.

¹¹ Niho nepwile ngayi, “Obe Mwene, kati shikenga noho ha shikati sha kukuma hati?” Wankumbwile ngayi, “Hantu zinkena zinafutuku mapembe na mukungulu, oho mukabula wakuzikamo namatala akabula bantu bakwikalamo na mafuba akafutuka mapembe.

¹² Ami Nyambi ya Ngula nikatandila bantu kwakutali, na litunga nimwalyo likafutaminiwa.

¹³ Hinge ndi umo mukati ka bantu likumi ukashala muyo, naye kami ukalobeshiwa. Ukafweka ngonehe lishina lya mitondo ya telebini na oka lya shiyanga lishina ndi yinatemiwi.” Lishina likwimanina mabalikilo amapya a bantu ba Nyambi.