Ishaya 59 - Libuka Lya Kuyela

Muluwe ukunyanca wubi wa bantu

¹ Monenu, liboko lya Nyambi ya Ngula kaliha lyalipi, ngayi likwange kupulwisha, hinge ndi wazika matu ngayi akwange kuyuvwa.

² Ngoboni wubi wenu unamitapululu mukati kenu na Nyambi yenu. Wubi wenu unaholeke lupala lwendi ngayi abule kuyuvwa.

³ Ndaba maboko wenu anatampakana na mukeza, na minwe yenu yinatampakana na wubi, mivumbo yenu yikwamba bya mahalo, na zindimi zenu zikubuzika bya kuluwa.

⁴ Kowa ukuyatisha minendi mu kulunga, kami kowa ukwimana na kwamba bya kupwisha. Mwayaka tuhu mitima na kutatoka byowa, na kwamba bya mahalo, bakufunga malwa na kuleta byabibi.

⁵ Batetanga mangi a bampili, na kutunga wuntangantanga wa kantanga. Ou nimwendi wakulya mangi wabo ukufwa, ndi lingi limo linatetuku, mu kututika liyoka.

⁶ Wuntangantanga wabo kutwesha kutungaho bya kuvwala bafwako, milimo yabo yinengi ya kuluwa, namu maboko wabo muli ntendelo ya mushunga.

⁷ Mawulu wabo akwitukila kuya mukutenda byabibi, ba kunyankupila mu kuyita mukeza wakubula mulandu. Bihanganiko byabo binengi bihanganiko byabibi, Kubipisha na kulobesha kuli mu zinzila zabo.

⁸ Kulimuka nzila ya ku mwena bafwako, kwendesha nyatilo ya kulunga bafwako. Nzila yabo ba kukonkanga ya kukontama, kami kowa muntu wakwenda mu nzila yiyo ukekala mu ku mwena.

Bantu ba kulitabila wubi wabo

⁹ Nohobene kuyata na kulunga kuli kwakutali nanetu, kami kwoloka kukuma kukwetu kufwako. Tukushinga mwaana, ngoboni nimwako kuli tuhu mincimpwe. Kami tukushinga liyeye, ngoboni tukwenda mwakushipa.

¹⁰ Tukupapatila limota ngo tushishitwa, tukupapatila ngo bantu bakubula meho. Tukupukazala mwaana ncanana ngo ha kaboko bwii, mukati ka bangovu tunengi ngo bantu ba kufwa.

¹¹ Nimwetu tukubuluma ngo mbeya, tukulila ngo bankilimba. Tukushinga kwoloka ngoboni kowa, ndaba kupulwishiwa kuli hahatali nanetu.

¹² Obe Nyambi ya Ngula, Kubipisha kwetu kunavulu ku meho wobe, kami wubi wetu ukutuyata. Kubipisha kwetu kuli ha mitwe yetu, kami tukulimuka milandu yetu.

¹³ Tunabipishi na kukana Nyambi ya Ngula, twayakale mwashenge, ha kubula kukonka Nyambi. Kwamba bya kuyandisha na kufutulukila, mitima yetu yenzala na kwamba mahalo.

¹⁴ Kuyata kwa kulunga kunamana kami kwoloka kuli hahatali shikuma. Ndaba mowa kupwisha mu zimbanza, kami maleema afwako kuwaniwamo.

¹⁵ Kupwisha ku kushingiwa, muntu ukushiya kutenda byabibi ukupukuliwa byendi. Nyambi ya Ngula wamonenesho, pe shalubile ku mu wahililisha, ha ku mona ngayi kowa kuyata kwakwoloka.

Nyambi ya Ngula ukuliwahishila kulamwina bantu bendi

¹⁶ Nyambi ya Ngula wamonene ngayi kowa muntu, kami wakomokele ha kuwana ngayi kowa mukakwimanina, niho aliyavwishile ngovu zendi mu kubapulwisha na kulunga.

¹⁷ Ukuvwala kulunga kwinga ngo shikobelo sha nzita sha ha kapumpo, na hoshi ya kupulwishiwa ku mutwe wendi. Bivwalo byendi bikwinga bya kubweshela wubi ku wubi na kulikumbakanya wukali wendi ngo canci.

¹⁸ Nyambi ya Ngula ukashushula bamalamo ba bantu bendi, kuya na biheka byabo. Ukamonesha wukali wendi ku baya bakakumulwisha, ukabweshela wukali wendi, ukabashushula hinge ndi bekala kwakutali.

¹⁹ Pe bantu bakatina Nyambi ya Ngula, kufuma ku mushamuko kukuma ku mponci, na wuwahe wa maleema endi akafuminina ku mushamuko, ndaba niye ukeza ngo kashinzi ka makuka, oko kakukukushiwa na mpepo yayinene.

²⁰ Nyambi ya Ngula ukwamba ku bantu bendi ngayi, nikeza ku Yelushalema mu kukuliza baka litala lya Yakobo, aba banatenguluku ku wubi wabo.

²¹ Nyambi ya Ngula ukwamba ngayi, nehi boni ami, oku niko kulimama kwami nanibo. Moyo wami ou uli hahenu na mazu ami awa nayaka mu tunwa twenu, afwako kukafuma mu tunwa twenu, hinge mu tunwa twa bana benu, hinge mu tunwa twa bazukulyenu, kufuma ku shikati shino kuya mwaya myaka.