Ishaya 57 - Libuka Lya Kuyela

Kunyanca ha tunankishi

¹ Bantu bakulunga balobanga, pe kowa muntu ukulifulankana, bantu babawahe ba ku shimbiwa, kowa ou wayuvwishishinga Ndaba wakulunga ukufumishiwa ku makando,

² bakwingina mu ku mwena, bakakatala ha malili wabo obo bendenga mukwoloka.

³ Ngoboni enu bana ba mulozi wa mbuyama, bana ba mu wumambe na lwiholwiho.

⁴ Kati bayani aba mu ku kumangiza? Kati bayani mu kukendwila na kulapwila lulimi? Kati kaliha enu bana bawuya mukakutenda bya kutengama, mbuto ya mahalo ndi?

⁵ Enu mwahanganikanga bya linyawe, mu nceto ya mitondo ya Oka, oku ba kulemeshela tunankishi. Mukukombelela bana benu ha tuula, ha tuula munatende mu mikulo, mu manzolongoma amu mamanya.

⁶ Mukati ka mamanya akulembuka, niko kuli shitapilo shenu mukayitilila waine, na ku baletela ntupu ya mpeka. Kati mu kuhanganika ngayi niku wahilila nabyo ebye ndi?

⁷ Enu mwayanga bilala ku mapili akukankama, oku mu kukombelela ku tunankishi.

⁸ Mwemikanga tunankishi twenu kunyima ya bihala byenu na kubikwiliti bya ku bipana, ndaba ya kunciya, munafwikululu malili wenu. Munakankalala kuya kukwabo, munaneneheshe malili wenu, munaliyuvwashana nabo enu bamwine, munahaka malili wabo, kuyo niko mwamanishilanga makwilu wenu.

⁹ Mukulilembulula na mazi a lukumba na kuwaba mazi a livumba lyaliwahe, pe mu kuya mu kulemesha nyambi wowa Moleki, mu kutuma bantumwana kwakutali, na kukungulukila nikokwine ku kalunga ka bafu.

¹⁰ Munalikwangishi enu bamwine ha kuya mukala wa wutali, na ku shinga ba nyambi bowa, Ngoboni kaliha mwambile ngayi, “Twalipokweshe tuhu kwenda.” Mwahanganikile ngayi tunankishi tukamipana nyala, pe nisho shuma mwabulile kupopa.

¹¹ Nyambi ya Ngula ukwipula ngayi, kati banyambi benu ngani aba mu kuyuvwila bowa, ngayi mutweshe kumvulama na ku shimika bya mahalo kukwami? Mwaleha kale ku mpanika maleema, ndaba ya ku mwena kwami shikati shashitali ndi?

¹² Nikatontolola bya kulunga kwobe nanebye watendanga, ngoboni bifwako kuka kuyavwa.

¹³ Oho ukehana na kushinga kuyavwiwa, tunankishi twobe tufwako kuka kulamwina. Mpepo yikatupepula. Ngoboni ou ukuholama mumwami pe ukakona litunga na lipili lyami lya kuyela.

Nyambi ukukulupisha kuyavwa na kunyongomanisha

¹⁴ Shikambiwa nehe ngayi, “Tendenu mukwakwa, tendenu mukwakwa, wahishenu nzila ya bantu bami. Fumishenu bipukalisho nimwabyo mu nzila yabo.”

¹⁵ Ami Nyambi uli hayilu ya nimwabyo, Nyambi wa kuyela, ou wayoya mwaya myaka, Ami Nyambi wayoya hayilu, na kumbalila ya kuyela. Ngoboni nekala na bantu ba kulilimbwilisha na kutenguluka, ngayi nipindule kukanca na kulumbeza kwabo.

¹⁶ Ndaba napanikile bantu bami wumi, nifwako kukazamina ku bayatisha hinge kubapilamina mwaya myaka.

¹⁷ Nabapilaminine ndaba ya milandu na mutongo, Hinge ndi na bashushwile na ku bafutamina, ngoboni bazaminine kuboka munyima mwayile ku shuma kwa mitima yabo.

¹⁸ Namono biheka byabo, ngoboni nikabanyongomanisha, nikabatwaminina na ku bayavwa, na kubengezeka obo bakekala na kulila.

¹⁹ Nyambi ya Ngula ukwamba ngayi, nikaleta ku mwena kunobo balikwakutali hamo nanobo bali kwakwipi, kami nika banyongomanisha.

²⁰ Ngoboni bakuluwa banafweke ngo kunkwancana kwa liwate, ndaba ya kubula kutulumana, mankanyi alyo aletanga ndoba na mazilo.

²¹ Nyambi ya Ngula, uli na kwamba ngayi, kowa ku mwena kubakuluwa.