Ishaya 55 - Libuka Lya Kuyela

Nyambi ukuyuvwila nceshe bantu

¹ Nyambi ya Ngula ukwamba ngayi, enu nimwenu muli na linyontwa, yekenu ku mema enu munabulu mali, yekenu mulande byakulya, ngayi mulye. Yekenu mulande waine na mahwe bya kubula ndando hinge mali.

² Bishini mu kubipishila mali, ha byuma bya kubula kulya, na Kubipisha ngovu zenu, ha bya kubula kwikutisha? Yuvwililenu shiwahe ebye nikwamba, pe mu kulya byabiwahe na kulikuwa bya mazi.

³ Haya yuvwililenu shiwahe, pe mwize kukwami, Nyuvwililenu ngayi muyoye. Nikalimama nenu kulimama kwa shishemo sha mwaya myaka. Nikamipanika mfuywezi ziya na kulupishile kuli Ndavita.

⁴ Monenu, namuhatile kwinga paki ku bantu na mukakutwaminina, na mukulwane wa bantu.

⁵ Mona, mukehana bantu mwabula kulimuka, pe matunga babula kumi limuka baketukila kukwenu, ndaba Nyambi ya Ngula, Nyambi yenu, wa Kuyela wa Ishalela, unamipana maleema.

⁶ Shingashingenu Nyambi ya Ngula, oho ashili kuwaniwa, mwihanenu oho ashili hahepi.

⁷ Bakuluwa bashiye nyinkalo yabo yayibi, na muntu wakubula kulunga ashiye bihanganiko byendi byowa. Abokele kuli Nyambi ya Ngula, ngayi mwanga abayatile na kubayuvwila nceshe.

⁸ Bihanganiko byami kaliha nibyo bihanganiko byenu, hinge zinzila zenu kaliha, nizo zinzila zami. Eshi nisho anamba Nyambi ya Ngula.

⁹ Nehi mayilu ekala kwakutali na hanci, pe nisho shili na nami, zinzila zami zili hayilu ha zenu, na bihanganiko byami bili hahatali kupitakana byenu.

¹⁰ Mvula wa likandavula wafumininanga kuyilu, kami kaliha byabokelanga kuyilu, ngoboni byayitililanga hanci. Byameneshanga na kukulisha zimbuto, byapanikanga ndimi mbuto na linkende ku mukakulilya.

¹¹ Nisho shili na mazu wami, afwako kukaboka kukwami kwakubula shimina, ngoboni bikutenda nimwabyo nikushinga kutenda, pe bakatangama munebye nikabatumina.

¹² Enu bantu bami, mukafuma mu Mbambiloni hinga mwawahilila, mu kumifumisha mu litunga liyo mu ku mwena, Mapili na binkanda bikembila nyimbo, na mitondo mu lishaka yikakweshela.

¹³ Mitondo ya mipaini, yikamena muli mikona. Mitondo ya mayiliti yikamena muli mitwampuku. Kami shuma eshe shikaletesha lizina lya Nyambi ya Ngula kwinga shilimukisho sha mwaya myaka.