Ishaya 51 - Libuka Lya Kuyela

Nyambi ya Ngula ukubengezeka Ziyoni

¹ Yuvwililenu kukwami enu mukushinga kupuluka, enu mukushinga ngayi nimiyavwe, tilaminenu ku limanya oku mwafumine, namu liteke omu mwakabile.

² Hanganikenu nkaka yenu Abulahama, na Shala ou wamibelekele. Shikati oho nehanine Abulahama hinga abula mwana, ngoboni na mufuywelele na kumupana bana, na kuhanyisha bazukulyendi.

³ Ndaba Nyambi ya Ngula ukabengezeka Ziyoni, ukabengezeka nimwabo bashala mu mapembe wendi nimwawo, na kufutula libelelengwa lyendi kwinga ngo mfuba ya Endeni, na ngawungawu kwinga ngo mfuba ya Nyambi ya Ngula, kutangala na ku wahilila bikawaniwa mumwendi, nyimbo za kumuyemeza na kukambilila zikekalako.

⁴ Nyuvwililenu enu bantu bami, tengekelenu matu wenu kukwami enu matunga wami, ndaba nikamitongweza mazu ami, kami kulunga kwami kukaleta mwaana ku bantu bami.

⁵ Nakwiza wanguwangu na kulamwina bantu bami, shikati shami sha kupulwisha shili hahepi. Kuyata kwami kukayata bantu. Bantu bekala ha bikuli bakatilamina kukwami kami baka tatilila, na ku lumbeza kukwami ngayi nibapulwishe.

⁶ Yimbwilenu meho enu ku mayilu, kami tilaminenu litunga lya hanci, ndaba mayilu akazimina ngonehe wishe, hanci ha kataboka ngonehe likwiza lya mwaka, kami bazikaho bakafwa ngo mbalembale, ngoboni kupulwisha kwami kukenga kwa mwaya myaka, kami kulamwina kwami kukamana kufwako.

⁷ Yuvwililenu kukwami enu mu kulimuka kulunga, enu mu kulama ku longesha kwami mu mitima yenu. Hinga mutina oho bantu ba kumihandula, kami hinga mutinishiwa na matuka wabo.

⁸ Ndaba ba tunzembule baka balya ngo likwiza, kami likoloto likabalya ngo wutonge, ngoboni kulamwina kwami kukekalako mwaya myaka, na kupulwisha kwami ku bihemwinino nimwabyo.

⁹ Pinduka, pinduka ulishumishe, obe liboko lya Nyambi ya Ngula, pinduka, utende ngonehe watendelenga ku matena akushikale, ku bihemunwino bya ku mwaka. Kati kaliha obe waketwezele litoshi wamu liwate, Lahambu tupinzitupinzi ndi? Obe shiya wayahile shanzangombe mampulwa ndi?

¹⁰ Kati kaliha obe wayumishile liwate, mema a kunonka amu liwate lyalinene, watendele nzila ha mampunga a liwate, ngayi aba wakulizile batweshe kuzabuka ndi?

¹¹ Bakakukuliziwa ba Nyambi ya Ngula mwanga baboke, baboke mu Ziyoni na kwimbila nyimbo za ku wahilila, na kuwulumwina tunkelenkele ha zimpala zabo hakamoneka ku wahilila kwa mwaya myaka, pe wunginga na kulihwezumuna bikamana.

¹² Ami, Amibene uya wami bengezekanga, kati obe yani ukutina muntu uya wafwanga, na bana ba bantu bamananga ngo mwila.

¹³ Kami munavulama Nyambi ya Ngula, Shakalenga wenu, ou watandubwile mayilu na kuyala mimbi ya kaye, mu kuyoyelanga bishini na bowa ha mutena ha mutena? Ndaba ya wukali wa mukakuyandisha. Oho akuliwahishila kumiyandisha, haya wukali wabakakumiyandisha ulikuti?

¹⁴ Obo bali mu wuntapwa, wuluno balubuke, kukafwila mu tolongo yabo bafwako, hinge kukabula byakulya bafwako.

¹⁵ Ndaba ami Nyambi ya Ngula, Nyambi yenu, nalayelelanga liwate, pe likunkwancana, Nyambi wa Makunge nilyo lizina lyami.

¹⁶ Kami nayaka mazu wami mu kanwa kobe, nakuholeke mu mubombola wa liboko lyami, ngayi nitandubule mayilu na kuyala mimbi ya hano hanci, pe nambile ku Ziyoni ngayi, “Enu muli bantu bami.”

Kumana kwa makando a Yelushalema

¹⁷ Pinduka obe Yelushalema, pinduka, ukatuke. Obe unanu nkomoki yaku shushula ya Nyambi ya Ngula, nkomoki ya wukali wendi. Unayinu na kuyikunamina nimwayo, haya yili naku kutalangilisha.

¹⁸ Ku bana nimwabo wabelekele, kowa ukukutwaminina. Ku bana nimwabo wabelekele, kowa wakukukwata ku liboko.

¹⁹ Makando amengi, ezakale hahobe, yani ukutwesha kukuyuvwila nceshe? Mishunga na kuloba na nzala na nzita, byaholokakale kukwobe, yani ukutwesha kukubengezeka?

²⁰ Bana bobe banalunguku, banalangana mu zinkomi za mikwakwa nimwazo. Banafweke ngo likendende unafu mulunyimbwa. Banayuvwu ulemezezi wa wukali wa Nyambi ya Ngula, ha ku shuza kwendi.

²¹ Haya yuvwililenu, enu ba kuyanda, enu munakolwo, ngoboni kaliha na waine.

²² Nyambi ya Ngula, Mwene yobe, Nyambi yobe, ou walamwinanga bantu bendi ukwamba ngayi, monenu, ninakufumisha mu maboko obe nkomoki eyi yatalangilishanga bantu, mufwako kami kukanwina mu nkomoki ya wukali wami.

²³ Nikayiyaka mu maboko anaba bakakumiyandisha, aba bamyambililenga ngayi, “Langanenu, mwanga tumilyatangile.” Pe mwapapalalishile myongo yenu hanci, kuyifutula ngo mukwakwa, ngayi bendeho.