Ishaya 50 - Libuka Lya Kuyela

¹ Nyambi ya Ngula ngayi, “Kati liñwati lya kulubula mandiyobe lilikuti, elye namukana nalyo? Hinge kuli yani muka mukuli wami oku namilandishi? Ndaba ya wubi wenu pe mwalandishiwile, mandiyenu watandiwile ndaba ya milandu yenu.

² Kati shumangani bantu bami babulileko oho nezile? Oho nabehanine, kati shumangani kwabulile muntu wakukumbula? Kati liboko lyami lyalipi ngayi nibule kutwesha kukuliza ndi? Hinge kati ngovu za kulamwina nifwazo ndi? Monenu na kukaliha kwami nikutwesha kuyumisha liwate, nikufutula mishinzi kwinga libelelengwa. Zinci zikafwa ku linyontwa, zikanuka ndaba ya kubula mema.

³ Nikutwesha kufwika mayilu na mincimpwe, na kubapana bincancolo kwinga bivwalo byabo.”

Kwombatala kwa Mukamulimo wa Nyambi ya Ngula

⁴ Mwene, Nyambi ya Ngula unampana bya ku fwanina kwamba, ngayi mwanga nitweshe kushumisha ba kupopa. Lumenemene na lumenemene, wantoneshanga, watoneshanga litu lyami ngayi niyuvwe ngonehe baya banalongeshiwi.

⁵ Nyambi ya Ngula unanzikululu mu matu, kami kaliha nafutulukilile hinge kuboka munyima.

⁶ Napenzeshele mongo wami ku baya bankaminenga, na mumbanga wami ku baya bavukwilenga mulevu wami, kaliha nakanishile baya bandwishile na kumfwizila mate ku lupala.

⁷ Ndaba Nyambi ya Ngula wanyavwanga, pe kukashampuliwa nifwako. Nohobene nashumishile lupala lwami ngo litale, kami nikulimuka ngayi nifwako kukayuvwishiwa lisheni.

⁸ Mukakuncambisha uli hahepi, kati yani ukampana mulandu? Tokonoko tuliyatishenu. Kati yani ou ukunyatisha? Eze kuno tuli penze na nami.

⁹ Mona, Nyambi ya Ngula niye wanyavwanga. Kati yani ukutwesha kumpana mulandu? Mona, nimwabo bakakulumpala ngo likwiza, bakaliwa ku bampenzi.

¹⁰ Kati bayani hakati kenu ba kutina Nyambi ya Ngula, na kwombatala lizu lya mukamulimo wendi? Ou ukwenda mu mincimpwe na kubula mwaana, ngoboni ukukulupila mu lizina lya Nyambi ya Ngula, na kukinka mutima hali Nyambi yendi.

¹¹ Monenu, enu nimwenu mu ku bangiza mundilo, mu kulihambizila enu bamwine bishinzi bya mundilo. Haya yenunga na kwenda mu liyeye lya mundilo wenu, pe ku bishinzi bya mundilo ou muna hambizi. Eshe nisho mukatambula ku liboko lyami, mukekala mu makando.