Ishaya 49 - Libuka Lya Kuyela

Liyeye lya Matunga

¹ Enu mwazika ha bikuli, yuvwililenu kukwami, enu bantu mwekala kwakutali yuvwenuko. Oho shilolo nihemuwe, Nyambi ya Ngula wanyihanine, oho nishili mu livumo lya bamawa, wantumbile lizina.

² Watwepeshele kanwa kami ngonehe mukwale wawutwe. Wankowezele mu mubombola wa liboko lyendi, wamfulile ngonehe muvwi wawutwe, wankowezele mu ncumbilo ya mivwi yendi.

³ Wambile kukwami ngayi, “Obe Ishalela wenga mukamulimo wami, mumwobe nimo nikawanina maleema.”

⁴ Ngoboni nambile ngayi, “Nalipokweshelenga tuhu, nayandishile tuhu nyala zami, hinge noho binamfwanini bili kuli Nyambi ya Ngula, kami ncuungu yami yili kuli Nyambi yami.”

⁵ Nyambi ya Ngula, ou wambumbile mu livumo lya mawa ngayi ninge mukamulimo wendi ukwamba ngayi, mu kubwesha Yakobo kukwendi, na Ishalela ngayi nimulubwile kukwendi, ninalemeekiwi ku meho a Nyambi ya Ngula. Nikuwana nyala muli Nyambi yami.

⁶ Kati shinengi shuma shashishe ngayi winge mukamulimo wami ndi, na ku shangula mishobo ya Yakobo, na kubwesha mashaliza a Ishalela baya bapulukile, nika kupana ku matunga kwinga lumuni, ngayi mwanga ukatwale kupulwisha kwami kwakumina hano hanci.

⁷ Nyambi ya Ngula, Mukakukuliza wenu, wa Kuyela wa Ishalela ukwamba ngayi, ku muntu ou balimbwilishile shikuma, ou wazimbiwile ku matunga, ou wengile mukamulimo wa batulela. Bamyene bakamona pe bakayimana kupana maleema, bana ba bamyene bakashintama hanci na kulamba, ndaba Nyambi ya Ngula, ou wakulunga, wa Kuyela wa Ishalela niye unakuhata.

Kupindula Yelushalema

⁸ Nyambi ya Ngula ukwamba ngayi, oho shikati sha kumipulwisha shakakuma, nikamiyamiziza, na kukumbula malombelo wenu. Nikamilama na kumi koweza ngayi mumwenu nimo nikalimama, na bantu bami nimwabo nikamitabilisha kwikala mu litunga lyenu, kami elye linafutuku mapembe lelo.

⁹ Nikutongweza batuyili ngayi, “Yenunga munashoboloko,” Na ku baya bali mu mincimpwe ngayi, “Yekenu ku mwana.” Pe bakenga ngo bambelele ba kubuyila ha binkanda.

¹⁰ Bafwako kukafwa nzala hinge linyontwa, mpepo ya ntukumina hinge mutena kukayuvwanika bifwako, ndaba bakatwamininiwa ku nowu wa bahaka. Niye ukabatwaminina ku kaheloke ka mema.

¹¹ Nikawululisha mapili kwinga mikwakwa mwakupita bantu bami.

¹² Mona, bantu bami bakufuma kwakutali, bakafuminina ku ncelele naku mponci. Kami bakafuminina ku litunga lya Shiyene.

¹³ Enu mayilu yimbilenu! Enu hanci, bilikizenu na ku wahilila! Enu mapili wulumwinenu. Ndaba Nyambi ya Ngula ukabengezeka bantu bendi, kami ukayuvwila nceshe bantu bendi ba kuyanda.

¹⁴ Ngoboni bantu ba mu Ziyoni bakwamba ngayi, “Nyambi ya Ngula natufutamini, hekulyetu natuvwulama.”

¹⁵ Nyambi ya Ngula ukukumbula ngayi, kati mbuyama ukutwesha kuvulama mwanendi waku mabele, ngayi abule kuyuvwila nceshe mwanendi wakulibelekela ndi? Hinge ndi mbuyama ukavulama mwanendi, ngoboni Ami nifwako kuka mi vulama.

¹⁶ Monenu, Yelushalema nifwako kuka kuvulama, natikiti lizina lyobe ha bikamba bya maboko wami.

¹⁷ Obo baka kutendulula, wuluno bali na kwiza, kami baya ba kunyemwine baka ku shiya.

¹⁸ Tilamina nokunoku umone bili na kutendiwa, bantu bobe bali na kukunguluka, bali na kuboka kukwobe. Mwa shikuma ngonehe nili Nyambi wakuyoya, ukaliyemezela bantu bobe, ngo mwenga aliyemezelanga bya kuliyenga byendi.

¹⁹ Hinge ndi walobeshiwile na kufutaminiwa, kami litunga lyafutukile mapembe, ngoboni haya likenga lyalishe na bantu bobe, kami baya ba kuyandishilenga, bakaya na kwikala kwakutali.

²⁰ Bana bobe, baya bahemuwile ha shikati wekalile mu makando, bakamba kukwobe ngayi, “Lino litunga lyengakale lyalishe shikuma, tuwaninenu oku tuku fwanina kwikala.”

²¹ Niho ukamba mu mutima wobe ngayi, “Kati yani ou nambelekele aba bana nimwabo? Nayongeshele bana bami, kami nengile mumba, natwaliwile mu wuntapwa, pe kami nakendiwile. Monenu nashalile ninkayami, haya aba bana bakufuma kuti? Kati ou unabandelele yani?”

²² Nyambi wa Makunge ukwamba ngayi, nikalabiza bakamatunga, nikakatwila ndembela yami ku bantu, pe bakabwesha bana bobe hinga babakwata mu maboko, pe bana bobe ba bambuyama, bakabaleta hinga babakatula ha mafuzi.

²³ Bamyene bakenga ngo batatizenu, kami ba mahano bakenga ngo bamandizenu. Bakashintama hanci na kulamba kukwenu, bakamipana maleema. Niho mukalimuke ngayi, Ami Nyambi ya Ngula, aba ba kulumbeza mumwami, kukayuvwa lisheni bafwako.

²⁴ Kati mu kutwesha kuyangula bakanzita ebye banapukulu, hinge kuyangula bantapwa ku mukakulela wa ngovu ndi?

²⁵ Nyambi ya Ngula ukwamba ngayi, hinge bantapwa bakalela wa ngovu bakayangiwa, na lipuku likayangiwa ku bakanzita, ndaba nikalwisha bamalamo benu, na kupulwisha bana benu.

²⁶ Nikatumiza bakakumiyandisha ngayi bakalye mishunyi ya zinyutu zabo. Kami bakakolwa na mukeza wabo, ngonehe waine. Niho bantu nimwabo bakalimuka ngayi, Ami Nyambi ya Ngula, ou wamipulwishanga, na mukakumikuliza, Nyambi wa ngovu wa Ishalela.