Ishaya 47 - Libuka Lya Kuyela

Kuyatiwa kwa Mbambiloni

¹ Nyambi ya Ngula ukwamba ngayi, “Obe kankanga, Mbambiloni, shuluka ha litanda lyobe pe wikale hanci mu lukungu. Obe kankanga, Kalendiya! Ndaba wufwako kukatoyiwa kami washikonde shashiboto na kulezima.

² Tola limanya lya kupelela, pe upele muhunga. Lifwukulule shitambala, pe vunga ku bivwalo byobe, niho uvule ncangwa zobe ku mawulu, pe yanga na kuzabuka mishinzi.

³ Ukavuliwa pe ukenda muhelengwa, niho bakamona lisheni lyobe. Nikabweshela wubi, kukatetelela nifwako.”

⁴ Nyambi, wa Kuyela wa Ishalela wenga mukakukuliza, Nyambi wa Makunge nilyo lizina lyendi.

⁵ Yikala mu ku mwena, ingina mu mincimpwe, obe kankanga, Kalandiya. Ndaba kukatoyiwa wufwako ngayi manda wene.

⁶ Napilaminine bantu bami, nazilulwile likona lyami. Nabayakile mu liboko lyobe, kami kaliha wabayuvwilile nceshe. Hinge bakulwane wabatwikile zimpongoho zazilemu shikuma.

⁷ Wahanganikile ngayi, “Shikati nimwasho ukenga lihano,” kami kaliha wayakile ebye ku mutima, hinge kwanuka eshe bikamana.

⁸ Nohobene haya yuvwenu ku neshe, enu mwahaka myelembo, mu kuhanganika ngayi munekala shiwahe na kupuluka, ukwamba mu mutima wobe ngayi, “Ami tuhu, kowa wamina wakulyezeka na nami, kukenga mfwile nifwako, kami bana bami kuka batamwa nifwako.”

⁹ Byuma ebye bibili bikakwizilila shikati shashishe ha mutena umo, byuma ebye nimwabyo bikamoneka, bya kufwisha bana na kwinga mfwile. Ebye bikeza kukwobe mu wingi wabyo, hinge ndi wekala na malele amengi na wulozi wobe wawunene.

¹⁰ Wakulupilile mu kuluwa kwobe, wambile ngayi, “Kowa uku mona,” ngana zobe na kalimukisho kobe bya ku shanwishile, kami wambile mu mutima wobe ngayi, “Ami tuhu, kowa wamina kumbali yami.”

¹¹ Ngoboni byabibi bikakwizilila, obyo ukabula kutwesha kulikinga na malele wobe. Makando akeza hahobe, owo ukabula kutwesha kulilamwina. Kami kuloba kukeza hahobe na kukubazumuna, oko ukabula kulimuka.

¹² Likwatishe na malele na zimpindo zobe nimwazo, ezi unaliyavwishinga kufuma kuwanuke wobe, nkampe bikukutweshesha hinge ndi nkampe ukaletesha bowa.

¹³ Unalipokweshe tuhu kuya na kushinga kubeliwa, ku baya balilongesha bya nyenye na kwaula bya kumbili ha ngonda na ngonda. Yanga ukabepule mwakupulukila ku nobyo bikatendiwa.

¹⁴ Mona, bantu bakukulupila mu nyenye bakwinga ngo mwila ukuhoka ku mundilo, bafwako kutwesha kulilamwina nibo bene ku milangi ya mundilo. Kowa eze akatweshe kwikala na kuyota ku mundilo owe.

¹⁵ Bantu banehe nibo unatende nabo milimo, nibo unakabakana nabo kufuma kuwanuke wobe, banayembangili, muntu na muntu na nzila yendi, ngoboni kowa wakubalamwina.