Ishaya 45 - Libuka Lya Kuyela

Nyambi ya Ngula ukuhata Shilushi

¹ Nyambi ya Ngula ukwamba kuli Shilushi mukakuwabishiwa wendi, ou akwatile ku liboko lya shilyo ngayi akome matunga. Wamutumine, ngayi amanishe ngovu za bamyene, wamushinkwilile mapangati a zinkena.

² “Nikaya kumbili yobe, na kunyekamisha mapili. Nikapokola mapangati a lubemba, na kuketula mikambo ya byondo.

³ Nikakupana biya binahololiwi, wuheti uya unakongiwi kwakubula kulimukiwa. Mwanga ukalimuke ngayi, Ami Nyambi ya Ngula, Nyambi wa Ishalela, ou unakwihana ha lizina lyobe.

⁴ Ndaba ya mukamulimo wami Yakobo, na Ishalela wakuhatiwa wami, ninakutumbu lizina, ninakutumbu, hinge ndi obe kundimuka wufwako.

⁵ Ami Nyambi ya Ngula, kowa wamina. Kowa Nyambi wamina wakulyezeka na nami. Nikakushumisha, hinge ndi kaliha wandimuka,

⁶ ngayi mwanga bantu balimuke, ku balika ku mushamuko kukuma naku mponci. Bakalimuka ngayi, Ami Nyambi ya Ngula, kowa wamina.

⁷ Nalenga mwaana na mincimpwe, natangamishanga na kuleta malwa, Ami, Nyambi ya Ngula, ou watendanga byuma ebye nimwabyo.

⁸ Enu mayilu, pulumunenu bya kuyilu, makumbi mwanga alokeshe kwoloka. Kaye kashinkuluke mwanga kaholole kulunga, na kupuluka kami kuholoke hano hanci. Ami, Nyambi ya Ngula nalengele ebye.”

Nyambi ya Ngula walengele nimwabyo

⁹ Makando wendi, ou ukulikanangana na nou wamulengele. Unengi nyungu ya lima mu maboko a mukakubumba. Kati lima likutwesha kwamba ku mukakubumba ngayi, “Kati shumangani eshe ukubumba?” Hinge ngayi, “Eshe unatende shifwawo makwatilo?”

¹⁰ Makando wendi ou ukwamba kuli tatiyendi ngayi, “Bishini mwambelekelele nehe?” Hinge kwamba kuli mandiyendi ngayi, “Bishini wayendukile, oho wambelekelenga?”

¹¹ Nyambi ya Ngula, wa Kuyela wa Ishalela na Shakalenga wendi ukwamba ngayi, kati mu kutwesha kunyipula bya bana bami, hinge kwamba ha mulimo uya natende na maboko ami ndi?

¹² Nalengele hanci, na kubumbilaho muntu. Engile maboko ami aya atandubwile mayilu, na kuyaka nimwabyo biya bilimo.

¹³ Nikatuma Shilushi ngayi akatende byami bya kulunga, nikolola zinzila zendi nimwazo. Ukatendulula lukena lwami, na ku shiya bantapwa bami nimwabo, kwakubula kumupana shimo, hinge lizika kanwa. Nisho anamba Nyambi wa Makunge.

¹⁴ Nyambi ya Ngula ukutongweza Ishalela ngayi, wuheti wa Engepita na bakamikwebo ba Etopya, bikenga byenu. Bantu ba ku Shemba baya bantu babatali, bakawulumukila kukwenu pe bakenga bandungo benu. Bakamikonkangiza, bakeza hinga bamangiwa pe bakashintama kukwobe. Bakalamba kukwobe ngayi, “Nyambi uli hamo na nobe, kami kowa wamina, kowa nyambi wamina.”

¹⁵ Shinengi sha kupwisha, muli na Nyambi ou waliholekanga, ou Nyambi wa Ishalela, Mukakupulwisha.

¹⁶ Nimwabo batendanga tunankishi, bakabayuvwisha lisheni na kuhanduliwa, bakafuma hamo na kuvulanganyiwa.

¹⁷ Ngoboni Ishalela unapulwishiwi kuli Nyambi ya Ngula, na kupulwishiwa kwa mwaya myaka, bantu bendi kukayuvwa lisheni bafwako.

¹⁸ Ndaba eshe nisho anamba Nyambi ya Ngula, ou walengele mayilu, niye bene Nyambi! Ou wabumbile hano hanci na kutendaho, wazikile mwimbi waho, kaliha walengele tuhu ngayi hekale nahiya, wabumbileho ngayi henge mwanya wakuzika, Ami Nyambi ya Ngula, kami kowa wamina.

¹⁹ Kaliha nambile kuwi mu litunga lya mincimpwe, kaliha nambile ku bazukulya Yakobo ngayi, Ncingenu na malimbwilizi Ami Nyambi ya Ngula, nikwamba kupwisha, nikwamba bya ku fwanina.

Nyambi ya Ngula niye Nyambi wa nimwabo

²⁰ Yekenu mu kungulukile hamo, muhenyene hahepi, enu munapuluku ku matunga a bantu bamina, bantu bakubula ngana, baya ba kushimba tunankishi twabo twa bitondo, na kulombela ku banyambi baya bakubula kutwesha kupulwisha.

²¹ Ambenu, tontololenu shambo shenu, balehenu balyambashane hamo. Kati yani wambile ebye kushikale. Kati kaliha ami, Nyambi ya Ngula ndi? Kami kowa nyambi wamina wakwezeka na nami. Nyambi wakulunga, ou wapulwishanga. Kaliha kwekala wamina ndele Ami.

²² Tengulukilenu kukwami pe mukapulwishiwa, enu mwekala kwakumina hanci. Ndaba ami Nyambi, kowa wamina.

²³ Nalibeze amimwine ngayi, shambo shinafumu mukanwa kami sha kulunga, kukafutuka shifwako shiya na kulupishile, “Bantu nimwabo bakashungumana kukwami, zindimi nimwazo zikalibeza hahami.”

²⁴ Bakamba hahami ngayi, “Muli Nyambi ya Ngula nimo mu kuwaniwa kulunga na nyala, aba nimwabo bamulwishile, bakeza kukwendi pe bakayeneshiwa.

²⁵ Muli Nyambi ya Ngula, bazukulya Ishalela, bakawaniwa kwinga bakulunga. Pe bakatumpuka.”