Ishaya 44 - Libuka Lya Kuyela

Nyambi ya Ngula niye Nyambi ninkayendi

¹ Yuvwilila haya, obe Yakobo mukamulimo wami. Obe Ishalela nalihatila.

² Ami nakulengele, ou wakubumbile mu livumo, kami ukakuyavwa. Hinga utina, obe Yakobo mukamulimo wami, Yeshulani ou nahata.

³ Nikayitila mema ha litunga lya nyuminine, nikakunkulisha mema mu libelelengwa, nikayitila moyo wami ha bazukulyobe, na mfuywezi zami ha bana bobe.

⁴ Baka zobelela ngo mwila wakuyitilila, ngo matoya aku mishinzi ya mema a nkunkula.

⁵ Muntu umo ukamba ngayi, “Ami nili muka Nyambi ya Ngula,” wamina ukalihana ngayi ami nili wa Yakobo, kami wamina ukalitikita ha liboko lyendi ngayi, “Ami nili muka Nyambi ya Ngula,” na kulitumba niye mwine ngayi, ami Ishalela lizina lya batate.

⁶ Eshe nisho akwamba Nyambi ya Ngula, Mwene na Mulamwini wa Ishalela, Nyambi wa Makunge, Ami wa muntanzi, na wamamaninino, kowa nyambi wamina, ndele ami pele.

⁷ Yani walifweka na nami? Ambe ndi niko ali, alubulule nimwabyo byekalileko kufuma kukulenga kwa Kaye. Yani walubulwile kushikale byuma bikamoneka kumbili? Haya atutongweze ebye bikamoneka kumbili.

⁸ Hinga mutina, hinge kuyuvwa bowa, kati kaliha nabilikile kushikale byuma bikatendiwa ndi? Kami enu muli bapaki bami. Kati kwali nyambi wamina ndi? Kowa limanya, nifwako kulimuka limanya limina.

Bakakulemesha tunankishi ba kuhepiwa

⁹ Nimwabo baya batendanga tunankishi benga byowa, ebye byuma bakonga, ku bayavwa bifwako. Aba bakulemesha otu tunankishi, ku mona bafwako, kami kulimuka ngayi bakayeneshiwa bafwako.

¹⁰ Kati bishini ukubazila kanankishi hinge kutenda shifwekesha sha nyambi sha kubula kuyavwa?

¹¹ Monenu, nimwabo aba ba kubilemesha, bakayeneshiwa. Benga bantu baya babazanga tunankishi. Balehenu beze na kwimana hamo, bakatina kami bakayuvwa lisheni.

¹² Mfuzi wafulanga shondo ha mundilo wa mu ncaka, wafulanga kanankishi na shikoma anakwata na maboko wendi a ngovu, oho afulanga, wayuvwanga nzala na linyontwa, kami wakwanganga.

¹³ Mukakubaza wafundikanga ha shitondo na shitikitisho na kubazasho na shondo sha Chezulu na kuyakaho shifwekesha. Wabazanga shifwekesha shashiwahe sha muntu na kushiyaka mu litala lyendi.

¹⁴ Batemanga mitondo ya shinda, hinge kuhata mutondo wa shayipulashi hinge wa Oka mu lishaka. Ukutwesha kutampika mutondo wa mupani na kutatila mvula ngayi awukulishe.

¹⁵ Muntu wacabanga shitondo kwinga nkuni, ziya abangizishanga mundilo wakumupana ntukumina na kuyoha mankende, pe kami ha shitondo, wabazangaho nyambi wa kanankishi na kumulemesha. Wabazanga kanankishi pe ha kukafunkamina.

¹⁶ Ha shitondo, wabangizanga mundilo na kuteleka byakulya na kuyoha nyama, biya alyanga na kwikuta. Wayotanga mundilo na kwamba ngayi, “Natukumini, ou mundilo wawuwahe.”

¹⁷ Ha shitondo shiya shashalanga, walibazilanga nyambi wa kanankishi, wakafunkaminanga na kukalemesha. Walombelanga kukwako hamba ngayi, “Ndamwine, ndaba obe nyambi yami.”

¹⁸ Bantu banehe, kowa ebye ba kulimuka, kami ku yuvwishisha bafwako. Meho abo anazimanana pe kutwesha ku mona bafwako, kami ngana zabo zinashinki, pe kutwesha ku yuvwishisha bafwako.

¹⁹ Kunaba bantu kowa muka kalimukisho. Kowa muka ngana, hinge muka ku yuvwishisha ukutwesha kwamba ngayi, “Nacabanga shitondo, kwinga nkuni za ku yibika mundilo, nayohangaho mankende na nyama iya na lyanga, haya kati nafwanina kubaza kanankishi ha shitondo shiya shina shalaho ndi? Kati nafwanina kufunkamina shivutu sha shitondo ndi?”

²⁰ Banafweke ngo bantu ba kulya mutoko, ndaba banongeziwi. Bihanganiko byabo bya kubula ngana binabashanwishi, kutwesha kulilamwina bafwako. Kutwesha kulibelulula niyemwine ngayi aka kanankishi anakwata mu liboko lyendi, ka mahalo wufwako.

Nyambi ya Ngula, niye Shakalenga na Mupulwishi

²¹ Obe Yakobo anuka byuma ebye, anuka obe Ishalela uli mukamulimo wami. Nakubumbile uli mukamulimo wami, obe Ishalela kuka kuvulama nifwako.

²² Nafumishi wubi wobe ngonehe likumbi, na wubi wobe unaketuku ngonehe mbundu. Boka kukwami, ndaba naku kulizakale.

²³ Enu mayilu yimbilenu kukwami na ku wahilila, ndaba Nyambi ya Ngula niye natendesho. Wulumwinenu, enu myanya ya hano hanci ya kunonka. Yimbilenu na ku wahilila, enu mapili na nobe lishaka na nimwabyo byekalamo. Ndaba Nyambi ya Ngula unakulizi Yakobo, kami ukaneneheshiwa.

²⁴ Nyambi ya Ngula ukwamba ngayi, Mukakumikuliza ou wamibumbile ukwamba nehe ngayi, Ami Nyambi ya Ngula, ou walengele byuma nimwabyo, Ami ninkayami natandubwile mayilu, ha kutandubula hano hanci, yani wekalile na nami?

²⁵ Ami navulanganyanga bimonekesho bya bamiluwe ba mahalo, naluwanganishanga ngana za bakakubuka. Nakupocakana ngana za bakakukeya ngayi kwinge kwowa.

²⁶ Ami nashumishanga lizu lya mukamulimo wami, na kwinzalishilila mazu a bantumwana bami, nikwamba ha Yelushalema ngayi, “Bantu bakazikamo kami,” naku zinkena za Yunda ngayi, “Yikatendululiwa,” zinkena zikazikiwila muyo zekalile mwaka.

²⁷ Ami namba nambilanga liwate ngayi, “Yuma, pe mishinzi yikuyuma,”

²⁸ Ami nambanga kuli Shilushi ngayi, “Niye mulishani wami, pe ukatenda ebye nafunga mu bifungo byami,” habya Yelushalema ukwamba ngayi, “Ukatendululiwa,” habya Litala lya Nyambi, ukwamba ngayi, “Mwimbi wobe ukayaliwa.”