Ishaya 43 - Libuka Lya Kuyela

Nyambi ukukulupisha kulamwina bantu bendi

¹ Ngoboni haya Nyambi ya Ngula ou wakulengele, obe Yakobo, ou wakubumbile, obe Ishalela ukwamba ngayi, “Hinga utina, ndaba naku kulizakale, na kwihana ha lizina, uli wami.

² Oho ukapita mu mema nikekala nobe, kami oho ukazabuka mushinzi, kukukupula wufwako, oho ukenda mu mundilo, kukahoka wufwako, pe milangi ya mundilo kuka kubabula yifwako.

³ Ndaba ami Nyambi ya Ngula, Nyambi yobe. Ami wa kuyela wa Ishalela, mupulwishi wobe. Nikapana Engepita kwinga waku kukuliza, Etopya na Shemba ku kutambashana nanenu.

⁴ Ha kuwana ngayi uli wami waha mutima, na kulemeekiwa ku meho wami, kami ndaba na ku haka, nikayaka bantu kuhingisha mu mwanya wobe, na matunga kutambashana na wumi wobe.

⁵ Hinga utina, nili hamo na nobe, nikafumisha bana bobe ku mushamuko, nanaba bali ku mponci na kubabwesha kukwabo.

⁶ Nikatongweza ncelele ngayi, ‘Balehe!’ Na mabukubuku ngayi, ‘Hinga ubakanisha!’ Fumisha bana bami ku matunga akwakutali, na bana bami babambuyama kufuma kwakumina hano hanci.

⁷ Bantu nimwabo bakwihaniwa na lizina lyami, aba nalengele ndaba ya wuwahe wami, na babumbile na kubatenda.”

Nyambi ya Ngula niye Nyambi ninkayendi

⁸ Twalenu bantu bami ku nkuta. Meho bali nawo, ngoboni banengi tushishitwa, Matu bali nawo, ngoboni bafwako kuyuvwa.

⁹ Lehenu matunga nimwawo akunguluke hamo. Na mishobo ya bantu ba kunguluke. Kati yani hakati kabo ukutwesha kutontolola eshe, na kututongweza byuma bya ku mwaka? Mwanga balete bapaki babo, ba kubashambisha ngayi banengi bakwoloka, pe bayuvweko niho bambe ngayi, “Shinengi sha kupwisha.”

¹⁰ Enu Baishalela muli bapaki bami, Eshe nisho anamba Nyambi ya Ngula. Muli bakamilimo bami, baya nahatile ngayi mwanga mundimuke na kunkulupila na ku yuvwishisha ngayi Ami Nyambi ninkayami. Kumbili yami kowa Nyambi ukekalako, pe kunyima yami kowa wekalileko.

¹¹ Ami tuhu Nyambi ya Ngula, kwakubula ami kowa wakupulwisha.

¹² Naholwele pe nabapulwishile kami nabilikile, Amibene kaliha nyambi washenge wekalile hakati kenu. Nyambi ya Ngula ukwamba ngayi, “Enu muli bapaki bami.”

¹³ Ami nili Nyambi, kami nikekala shikati nimwasho, kowa muntu ukatwesha kunyangula shili mu liboko lyami. Kowa muntu ukatwesha kukanisha eshe natende.

Kufumishiwa ku Mbambiloni

¹⁴ Nyambi ya Ngula, Mukakumikuliza, wa kuyela wa Ishalela ukwamba ngayi, ndaba ya nenu, nikatuma nzita mu kulwisha Mbambiloni. Nikapokola mapangati a lukena, pe tunkelenkele twa Makalendiya tukafutuka mbingo.

¹⁵ Nyambi ya Ngula, wa Kuyela, ou walengele Ishalela, Mwene yenu.

¹⁶ Eshe nisho akwamba Nyambi ya Ngula, ou watendele nzila ya kupita mu liwate, na mukwakwa wakupita mu mankanyi a ngovu.

¹⁷ Wakatwile nzita ya baka makoloyi na bambishi, na bakakulwa bangovu, wabawishilile hanci, kami kaliha bapindukile. Bazimine na kumaninina ngonehe lumuni lwa Kandela.

¹⁸ Vulamenu byuma bya mwaka, hinga muhanganika byuma byatendiwile mwaka.

¹⁹ Monenu, nili na kutenda shuma shashipya, eshe shamonekakale, kati ku shimona mufwako ndi? Nikatenda nzila mulibelelengwa, nikayaka mishinzi mu litunga lya nyuminine.

²⁰ Tuyamana twa lishaka, bamimbwe na bayimpye bakampana maleema. Ndaba nikaholola mema mu libelelengwa, na kuyaka mishinzi mu litunga lya nyuminine, ngayi bantu bami ba kuhatiwa banwe.

²¹ Bantu aba nabumbile ngayi mwanga bakembilenga na kunyemeza.

Wubi wa Ishalela

²² Ngoboni kaliha wanyihanine obe Yakobo, kami obe Ishalela wakwangile hahami.

²³ Kaliha wandetelele zinkombela za kuhokesha za bambelele, kaliha wampanine maleema na zinkombela zobe. Kaliha nakupanine wulemezezi wakuntupwila zintupu za mpeka, hinge kuliyakata ha kushinga ntupu ya incence.

²⁴ Kaliha wandandilile incence, hinge kungwahililisha na livumba lya zinkombela. Ngoboni unankwangishi ndaba ya wubi wobe, kami ninakwanga ndaba ya kuluwa kwobe.

²⁵ Ami ninkayami, mu shifungo shami, ami nafumishanga wubi wobe, kami kukanuka wubi wobe nifwako.

²⁶ Nyanukishe bya ku mwaka, yeka tuliyate. Leta shambo shobe tumone ndi ukushamba.

²⁷ Tatiyobe wakutatika wabipishile, na bakakutwaminina bobe nanibo bamfutaminine.

²⁸ Niho nakendele bakakutwaminina mwanya wa kuyela, na kuleta makando akulobesha Yakobo, na kwitabila Ishalela ngayi ahanduliwe.