Ishaya 42 - Libuka Lya Kuyela

Mukamulimo wa Nyambi ya Ngula

¹ Nyambi ya Ngula ngayi, monenu mukamulimo wami, wakuhatiwa wami, niku wahilila mumwendi. Nayaka moyo wami hahendi, ukaleta kwoloka ku matunga nimwawo.

² Kukakuwa hinge kukabilika na lizu lyalinene wufwako, hinge kuya na kubilika mu mikwakwa wufwako.

³ Kukapokola litete lya ku bofwoka wufwako, kami kukazima lumuni lwa ncishilile wufwako. Ukaleta kwoloka kwa mwaya myaka ku bantu nimwabo.

⁴ Kukaleha kulumbeza wufwako kami kupopa wufwako, hantu nashumishi kwoloka hano hanci, kami bekala ha bikuli bakalumbeza mu ndayano zendi.

⁵ Eshe nisho anamba Nyambi, Nyambi ya Ngula, ou walengele mayilu na kuwatandubula, ou wayalile hanci na kupaho nimwabyo biliho, ou ukupana wumi na moyo ku bantu nimwabo baliho.

⁶ Ami Nyambi ya Ngula nakwihanini kulunga, na kukwata ku liboko na kukulama mumwobe nimo nikalimamina na kuleta lumuni ku bantu nimwabo,

⁷ ngayi nikapane meho ku tushishitwa, na ku shobola baya bali mu mincimpwe ya zitolongo.

⁸ Nyambi ya Ngula nilyo lizina lyami, kowa nyambi ou nikulitapila nendi maleema, hinge kulitapila kuyemeziwa kwami na tunankishi.

⁹ Monenu, byuma bya mwaka binalinzalishilili, wuluno nikumitongweza byuma byabipya oho shilolo biholoke.

Lwimbo lwa kuyemeza

¹⁰ Yimbililenu Nyambi ya Ngula lwimbo lwalupya, yimbilenu na kumuyemeza enu ba hano hanci nimwaho, na nobe liwate nkwancana, na byuma nimwabyo bilimo, muyemezenu enu bikuli, hamo nanenu mwazikaho.

¹¹ Libelelengwa hamo na zinkena zamo zilemeshe Nyambi, bantu ba ku Kenda bamuyemeze, bantu bekala mu lukena lwa Shela bembile na kutangalila hayilu ya mapili.

¹² Obo bekala ha bikuli bayemeze na kulemesha Nyambi ya Ngula.

¹³ Nyambi ya Ngula wayanga na kulwa ngo kanzita wa ngovu, ngonehe kanzita alishakashakanga kuya ku nzita, wabilikanga na lizu lyalinene lya nzita, wamoneshanga ngovu zendi ku bamalamo bendi.

Nyambi ukukulupisha kuyavwa bantu bendi

¹⁴ Namwenene shikati shashitali, nalubile ku kumbula bantu bami, ngoboni haya shikati shakumakale nikubilika ngo mbuyama uli na kubeleka, nikashunga nakufwomafwoma.

¹⁵ Nikalobesha mapili na binkanda, na kuyumisha mwila na bitondo, nikafutula mishinzi kwinga bikuli na kuyumisha maziba.

¹⁶ Nikatwaminina tushishitwa mu nzila iyo bakubula kulimuka, mu zinzila muyo shilolokale bendemo nimo nikabatwaminine. Nikabafutwila mincimpwe kwinga mwaana, na litunga lyalibi kwinga lyaliwahe. Ebye nibyo nikatenda kwakubula ku bafutamina.

¹⁷ Nimwabo bakukulupila mu tunankishi, kwinga banyambi babo, nikabayuvwisha lisheni lyalinene shikuma.

Ishalela ukukwanga kulilongesha

¹⁸ Yuvwililenu enu bizikamatu. Tilaminenu shiwahe, enu tushishitwa.

¹⁹ Yani kashishitwa napitakana mukamulimo wami, hinge shizikamatu wakupitakana ntumwana wami ou natumu? Yani kashishitwa ukwinga ngo muka kulifungula wami, hinge kashishitwa ou nengi ngo kashishitwa wa mukamulimo wa Nyambi ya Ngula?

²⁰ Ishalela unamono byabingi, ngoboni kumoneshesha wufwako, uli na matu akuyuvwa, ngoboni ku yuvwishisha wufwako.

²¹ Nyambi ya Ngula wenga wakulunga shikati nimwasho, nohobene washingile ngayi mulao wendi uyemeziwenga shikuma.

²² Ngoboni bantu bendi bali mu mankwina na mu tolongo, kwakubula wamina wakubalamwina. Nimwabo banapukuliwi byabo, kwakubula wamina waku babweshelako bimo.

²³ Yani hakati kenu ukutwesha kutengeka litu lyendi, na kuyuvwilila ku byuma bikatendiwa kumbili?

²⁴ Yani watwalile Yakobo ku mukawubi? Yani watwalile Ishalela ku bezi? Kati kaliha Nyambi ya Ngula ou tunabipishili ndi? Ngoboni kwenda shiwahe bafwako mu nzila yendi, kami kwombatala ndayano zendi bafwako.

²⁵ Nohobene wayitililile ntukumina, ya wukali wendi na nzita yayinene ha Ishalela, wabangizile mundilo hahabo, ngoboni kaliha bayuvwishishile, mundilo wabahokeshele, ngoboni nibo ni mutima waboko. Kowa ebye tunalilongesheho.