Ishaya 41 - Libuka Lya Kuyela

Nyambi ukushumisha Ishalela

¹ Mwenenu na kunyuvwilila, enu matunga aku mawate! Bantu bahongolole nyala zabo, balehenu beze, bambe, yekenu hahepi twikale hamo ku mwanya wakuyatishila.

² Kati ou waletele mwene waku mushamuko, na kumwingisha wakukoma matunga nimwao kutendela Nyambi yani? Ou unamupaniki ngovu za kukoma bamyene na matunga yani? Ukubacancola na mukwale wendi ngo lukungu, mivwi yendi yikubapanzanisha ngo muzungu ku mpepo.

³ Ukubatanda, kami niye ukwenda mu nzila shiwahe, ngo muntu ukubula kulyata hanci.

⁴ Yani naleteshe ngayi ebye bitendiwe, na kwihana mikoka kufuma ku kutatika? Ami, Nyambi ya Ngula, ami wa muntanzi na mamaninino.

⁵ Bantu baha bikuli aba banamono ebye bali na bowa, mamanino a hanci akukanka, banakuhenyena hahepi, ba kulikungulula.

⁶ Muntu nimwendi ukuyavwa ndambo yendi, kami ukwamba ku kawushinda wendi ngayi, “Lishumishe!”

⁷ Mbazi wamanono ukushumisha mfuzi wa ngolinde, kami mukakulembulula na shikoma ukushumisha muka kufula na shikoma, na kwamba ngayi, “Ku ngungika ku nawaha” kami ukupampala kanankishi na zindonda, ngayi kabule kuwa.

⁸ Ngoboni obe, Ishalela mukamulimo wami, Yakobo, muntu uyo nahatile, muzukulya Abulahama, muhoni wami,

⁹ nakufumishile ku nkumo ya litunga lya hanci, na kukwihana ku kufumisha ku matunga akwakutali, na kukutongweza ngayi, obe uli mukamulimo wami, na kuhatile kami kukakukana nifwako.

¹⁰ Hinga utina, ndaba nili nobe, hinga ulikekula, ndaba ami Nyambi yobe. Nikakupana nyala na ku kuyavwa, nika kukoweza na liboko lyami lya kulunga lya shilyo.

¹¹ Mona, nimwabo bakakupilamina, bakayuvwa lisheni lya ku bakoma, baya bakakulwisha bakenga byowa, kami bakaloba.

¹² Hinge ndi ukashinga bamalamo bobe, ngoboni kuka bawana wufwako. Obo bakakulwisha bakenga byowa.

¹³ Ndaba, ami Nyambi ya Ngula, Nyambi yobe. Nikukwatilila ku liboko lyobe lya shilyo. Ami nikwamba kukwobe ngayi, “Hinga utina, Ami nika kuyavwa.”

¹⁴ Nyambi ya Ngula ukwamba ngayi, obe lipila, Yakobo, hinga utina, Ami nika kuyavwa, Mukakukuliza wobe niye wa Kuyela wa Ishalela.

¹⁵ Mona, nika kutenda shipumpwisho sha ku shuma shashipya, shashitwe, kami shili na mayewe ukapumpula mapili na kuwacancola kami ukatenda binkanda kwinga muzungu.

¹⁶ Ukawaleleka, pe mpepo yikawapepola, kami nkuli yikapanzanisha. Pe obe ukatangala muli Nyambi ya Ngula, ukekala na maleema muli wa Kuyela wa Ishalela.

¹⁷ Oho bantu bami ba kuyanda bakashinga mema, milibu yikayuma na linyontwa, ami Nyambi ya Ngula nikaba kumbula, kami ami, Nyambi wa Ishalela, nifwako kuka bafutamina.

¹⁸ Nikatenda mishinzi ha binkanda bya nyuminine, na tuheloke twa mema tukahwenta mu mikulo. Nikafutula libelelengwa kwinga maziba a mema, kami litunga lya nyuminine likenga tuheloke twa mema.

¹⁹ Nikayaka mu libelelengwa mitondo ya shinda, na mimbambangoma na mitondo ya mayiliti hamo na ya olive, nikameneshamo mitondo ya shayipulashi, mu litunga lya nyuminine, hamo na yunipa na mipaini,

²⁰ ngayi bantu bamone na kulimuka, mwanga bahanganike na ku yuvwishisha, ngayi liboko lya Nyambi ya Ngula nilyo linatende ebye, wa Kuyela wa Ishalela niye walengele.

Nyambi ya Ngula ukunyanca banyambi bowa

²¹ Nyambi ya Ngula ukwamba ngayi, letenu shambo shenu, mwene ya Yakobo ukwamba ngayi, kunkwilishenu nkani zenu za ku fwanina.

²² Letenu otwo tunankishi kuno mwanga tulubulule kukwetu ebye bikamoneka, tutontwelelenu eshe byekalile byuma bya ku mwaka, ngayi mwanga tubihanganike, na kulimuka shikati shabyo, hinge kututontwelela ebye bikamoneka.

²³ Tutongwezenu ebye bikekala kumbili, mwanga tukalimuke ngayi kati muli banyambi. Tendenu shuma shashiwahe hinge sha kuleta malwa, ngayi mwanga tutampwe na kwikala na bowa na mutentu.

²⁴ Monenu, munengi byowa, obyo mwatendanga binengi byowa, na nou unamihata unengi wa wunyengwe.

²⁵ Nehana umo wekala ku ncelele na kwiza wezakale, ukufuminina kwezanga mutena, pe ukehana ha lizina lyami, ukalyatangila bamyene ngo ndoba, ngonehe mukakubumba alyatangilanga lima.

²⁶ Kati yani wabilubulwile ku kutatika, ngayi mwanga tulimuke, Kati yani wabilubwilile shilumweza mwanga twambe ngayi, “Wawahishile”? Kwabulile umo kukwenu wabishimikile, kwabulile umo wabitoyele ngayi bikamoneka, kowa muntu wamiyuvwile himwamba lizu hahasho.

²⁷ Ami, Nyambi ya Ngula, ami wakutatika kutongweza Ziyoni, natumine ntumwana ku Yelushalema na ncango zaziwahe.

²⁸ Oho natilaminine, kowa hinge umo, kowa hinge umo watunankishi watweshele kubela, kowa hinge umo watweshele kukumbula mayipu.

²⁹ Mona, nimwabo aba banengi byowa, ebye ba kutenda byenga byowa, tunankishi twabo twa kuyungulula twa kupopa na kubula ngovu.