Ishaya 4 - Libuka Lya Kuyela

¹ Ha mutena uyo bambuyama mutanu na babili bakakwata mulume umo na kumutongweza ngayi, “Tukushinga tuhu ngayi twihaniwe bakazobe, mwanga tulifumishe lisheni lya kwikala mu wuzike. Tukalya byakulya byetu na kuvwala byetu.”

Yelushalema ukapinduliwa

² Mutena ukeza oho mwahi wawupya wa Nyambi ya Ngula ukawaha na kutama. Nimwabo mashaliza ba Ishalela bakawahilila na kutangala ha zimbuto ziya zikayima mu litunga.

³ Pe baya bakashala mu Ziyoni na kwikala mu Yelushalema, bakatumbiwa ngayi ba kuyela na baya nimwabo banatikitiwi ku babomi mu Yelushalema.

⁴ Oho Mwene wayoweshakale mazilo a bana ba bambuyama ba mu Ziyoni na mu Yelushalema ku mabalakata a mukeza uya wayitikilileho. Pe ukauyelesha na moyo wakuyata na moyo wa mundilo.

⁵ Niho Nyambi ya Ngula ukalenga hambalila nimwayo ya lipili lya Ziyoni nanaba bakakungulukilaho likumbi lya wishe ku shikati sha mwaana, liyeye lya mulangi wa mundilo ku wushiku. Wuwahe wa Nyambi ukafwika lukena.

⁶ Wuwahe wendi ukenzika lukena kukanisha ntukumina ya mutena na kwinga shilembalemba sha kutinina nkuli na mvula.