Ishaya 39 - Libuka Lya Kuyela

Bantumwana bafumine ku Mbambiloni

¹ Ha shikati shiyo mwene Melondaki mwene waku Mbambiloni mwana Mbalandani, watumine bantumwana kuli mwene Hezekiya hamo na liñwati na bishemo, ndaba wayuvwile ngayi mwene Hezekiya wakolanga hano napinduku shiwahe.

² Hezekiya watekeshele bantumwana na kubatongweza litala lya wuheti wendi wa shiliva na ngolinde na mazi amawahe na lukumba na bilwisho byendi nimwabyo bya nzita, kaliha kwekalile shuma hinge shimo mu wene wendi nimwamo biya abulile kubamonesha.

³ Niho Ishaya muluwe wa Nyambi ayile kuli mwene Hezekiya, pe wepwile ngayi, “Kati aba balume bakufuma kuti, kami banamba bishini kukwobe?” Hezekiya wakumbwile ngayi, “Bakufuma ku litunga lya kwakutali, ku Mbambiloni.”

⁴ Muluwe wepwile ngayi, “Kati banamono bishini mu musheke wobe?” Hezekiya wakumbwile ngayi, “Banamono byuma nimwabyo mu musheke wami, kowa shuma shimo shiya nabulu kubamonesha mu bikongelo byami.”

⁵ Niho Ishaya atongwezele mwene Hezekiya ngayi, “Nyambi ya Ngula, ukwamba ngayi,

⁶ monenu, matena akeza oho byuma nimwabyo mu musheke wobe na byuma nimwabyo biya bakongele bankakazobe binakumu naku mutena wa lelo, bikatwaliwa ku Mbambiloni. Kowa shuma shikashalako.

⁷ Bamina ku bazukulyobe bakatwaliwa, kami bakenga bantatula ba ku musheke wa mwene waku Mbambiloni.”

⁸ Niho mwene Hezekiya ambile kuli Ishaya ngayi, “Elye lizu lya Nyambi ya Ngula unamba linawaha.” Ndaba wahanganikile ngayi, “Kati shumangani, ndi kukekala ku mwena na kwikala shiwahe ha matena a wumi wami?”