Ishaya 38 - Libuka Lya Kuyela

Kukola na kunyongomana kwa mwene Hezekiya

¹ Ha matena ayo mwene Hezekiya wekalile na kukola pe washingile kufwa. Niho muluwe Ishaya mwana Amozi wayile mu kumumona pe wamutongwezele ngayi, “Nyambi ya Ngula unamba ngayi, wahisha byuma byobe shiwahe ndaba kukapola wufwako, ukafwa.”

² Niho Hezekiya wakinkile lupala lwendi ha limota na kulombela kuli Nyambi ya Ngula ngayi,

³ “Anuka haya, obe Nyambi ya Ngula, nikukulambilila, wamona shiya nendanga shiwahe kumbili yobe na mutima nimwawo na kwoloka, kami natendanga ebye byenga byabiwahe ku meho obe.” Pe Hezekiya walilile shikuma.

⁴ Niho Nyambi ya Ngula atongwezele Ishaya ngayi,

⁵ “Yanga kuli Hezekiya na kumutongweza ngayi Nyambi ya Ngula, Nyambi wa nkaka yobe Ndavita nayuvwu lilombelo lyobe kami namono mihozi yobe, mona nikanunga ku myaka yobe ya kuyoya na myaka 15.

⁶ Nikakulamwiwna obe na lukena luno ku maboko a mwene waku Ashiliya. Ee, nikalamwina luno lukena.”

⁷ Shino nisho shilimukisho sha kuli Nyambi ya Ngula shikutontoloka ngayi Nyambi ya Ngula ukatenda shuma eshe anakulupishi,

⁸ mona, nikabwesha munyima muvwulu ha shipimo sha mwene Ahazi sha kulimukila shikati, muvwulu ukahenyena munyima zintambo likumi kami.

⁹ Ku nyima ya ku nyongomana kwa Hezekiya mwene wamu Yunda, watikitile olu lwimbo lwa kuyemeza ngayi,

¹⁰ Nahanganikile ngayi ha kuketula matena a wumi wami, nikaya ku kalunga ka bafu, na kuketwila myaka ya kuyoya kwami.

¹¹ Nahanganikile ngayi nifwako kukamona Nyambi ya Ngula muno mu litunga lya babomi. Nifwako kukamona muntu kami mukati ka bantu ba mu kaye.

¹² Wumi wami waketuziwile, kami wamanine ngo ntanda ya mulishani bananyemunu, ngonehe muka kutunga makwiza na vungu wumi, naketwili matena ami akuyoya. Kufuma ku mwaana kutwala naku wushiku, nahanganikile ngayi Nyambi ukamanisha wumi wami.

¹³ Wushiku nimwawo nalilile ndaba ya kukola, ngo shimbwi ukumbulukuta bifupa byami, kufuma ku mwaana kutwala naku wushiku nahanganikile ngayi Nyambi ukumanisha wumi wami.

¹⁴ Lizu lyami lyengile lya kunongota kami lyapopele, pe nalilile ngo litela hinge mulombwe, meho ami akwangile na kutilamina kuyilu. Mwene, ndamwine ku makando ami.

¹⁵ Haya nikwamba bishini? Ndaba Nyambi ya Ngula niye nafungu eshe. Hinge tulo nifwato ndaba ya kukola kwa mutima wami.

¹⁶ Obe Mwene nikayoyela hahobe, hahobe tuhu ninkayobe nyongomanishe na kundeha ngayi niyoye.

¹⁷ Mwa shikuma shinafwanini kukwami, ngayi niyande nehe. Wandama mu shishemo shobe mu kumfumisha ku kalunga ka bafu, wunavulama wubi wami nimwawo.

¹⁸ Ndaba shinzimbi shifwako ku kukambilila, lufu lufwako kukuyemeza, bantu ba kufwa bafwako kukulupila kwoloka kwobe.

¹⁹ Bantu babomi, babomi tuhu nibo ba kukambililanga ngonehe eshi nikutenda lelo, tata bantu watongwezanga bana bendi byakwoloka kwobe.

²⁰ Nyambi ya Ngula ukumpulwisha, pe tukamwimbilila nyimbo ha tumbuli twa kulema na nyimbwa matena akuyoya kwetu nimwawo, ku Litala lya Nyambi ya Ngula.

²¹ Niho Ishaya ambile kuli Hezekiya ngayi, “Balehe batende linkende ha nkuyu na kukukandisha ha mukalahabi, ngayi mwanga ekale shiwahe.”

²² Hezekiya wambile ngayi, “Shilimukisho ngani ngayi nikaya ku litala lya Nyambi ya Ngula.”