Ishaya 37 - Libuka Lya Kuyela

Hezekiya ukulomba kumubela kuli Ishaya

¹ Oho mwene Hezekiya ayuvwile eshe, watabwele bivwalo byendi na kuvwala bicancolo na kuya mu Litala lya Nyambi ya Ngula.

² Pe watumine Eliyakimu, ou wengile mukakulama lukena na Shembina mu kakutikita na bakankombela ba bakulwane, hinga bavwala mu bicancolo kuya kuli muluwe Ishaya mwana Amozi.

³ Bamutongwezele ngayi, “Eshi nisho anamba Hezekiya ngayi, ‘Lelo unengi mutena wakuyanda, wakuhanduliwa na kuletesha lisheni. Tunengi ngo mbuyama unayenduku kushinga kubeleka, ngoboni unabulu ngovu za kubeleka.

⁴ Mwene wamunene wa Ashiliya unatumu shilolo wendi wa mukulwane wa nzita kwiza mu kuhandula Nyambi wakuyoya. Nyambi ya Ngula, Nyambi yobe unayuvwu lihandu eli, pe ashushule baya bambabyo, nohobene lombelelenu bantu betu banashalaho kuli Nyambi.’”

⁵ Oho Ishaya ayuvwile mazu a mwene Hezekiya,

⁶ wakumbwile ngayi, “Tongwezenu hekulyenu, mazu a Nyambi ya Ngula ngayi, ‘Hinga mutina ndaba ya mazu akuhandula munayuvwu ku bakamilimo ba mwene wa Ashiliya.

⁷ Monenu, nikapana moyo mumwendi ngayi mwanga akayuvwe mbuzi na ku bokela ku litunga lyendi, pe nikamuzihila kuyo.’”

Baashiliya ba kutuma kutinisha kwamina

⁸ Lambishake wabokele, pe wawanine mwene wa Ashiliya uli na kulwisha Limbina, ndaba wayuvwile ngayi mwene nafumumo mu litunga lya Lakishi.

⁹ Lizu lya kumine ku Baashiliya ngayi, “Nzita ya baka Engepita yinatwaminiwi na mwene Tilihaka waku Etopya uli munzila kwiza na kubalwisha.” Pe oho ayuvwile noho, watumine bantumwana kuli Hezekiya na kwamba ngayi,

¹⁰ “Ukambe ebye kuli Hezekiya mwene wa Yunda, ‘Hinga witabila ngayi Nyambi yobe ou wakinka mutima ku kwongeza mu ku kukulupisha ngayi Yelushalema wufwako kukapanikiwa ku liboko lya mwene wa Ashiliya.

¹¹ Monenu, munayuvwu ebi banatende bamyene Baashiliya ku matunga nimwawo, ba nawalobeshe nimwawo kulungu. Kati mu kuhanganika ngayi enu mukapanza ndi?

¹² Kati banyambi ba matunga banalamwini matunga ayo balobeshele batatizami banalamwini banyambi ba Ngozani na Halani na Lezefwa na bantu bamu Endeni baya bekalile mu Telesha ndi?

¹³ Kati mwene waku Hamati na mwene waku Alipandi na mwene wa lukena lwa Shefwalavayimu na mwene wa Hena, hinge mwene wa Aviva uli kuti?’ ”

¹⁴ Mwene Hezekiya watambwile liñwati ku bantumwana na kulilaba, pe Hezekiya wayile ku Litala lya Nyambi ya Ngula, watandubwile liñwati ku meho a Nyambi ya Ngula.

¹⁵ Hezekiya walombelele kuli Nyambi ya Ngula ngayi,

¹⁶ “Obe Nyambi wa Makunge, Nyambi wa Ishalela, unekala ha litanda lya wene wobe hayilu ya makelumbi, obe Nyambi, ninkayobe ukalela wene nimwawo wa hano hanci. Obe walengele hanci na liyilu.

¹⁷ Haya, obe Nyambi ya Ngula tengeka litu lyobe utuyuvwe na kupenza meho wobe kukwetu obe Nyambi ya Ngula umone. Yuvwilila ku byuma nimwabyo biya anambanga Shenakelimba bya kukuhandula obe Nyambi wakuyoya.

¹⁸ Shinengi sha kupwisha, Obe Nyambi ya Ngula, bamyene babanene ba ku Ashiliya banalobeshe matunga amengi na matunga wabo.

¹⁹ Kami bayumbilile banyambi babo mu mundilo aba babulile kwinga banyambi, twengile tuhu tunankishi twa bitondo na mamanya, twa kutendiwa ku maboko a bantu.

²⁰ Haya obe Nyambi ya Ngula, Nyambi yetu, tulamwine ku Baashiliya ngayi mwanga matunga nimwawo a hano hanci akalimuke ngayi, obe tuhu ninkayobe, obe Nyambi ya Ngula.”

Lizu lya Ishaya kuli mwene Hezekiya

²¹ Niho Ishaya mwana Amozi atumine lizu kuli mwene Hezekiya, lya kumutongweza ngayi, “Nyambi ya Ngula, Nyambi wa Ishalela. Ndaba unalombele kukwami hali Shenakelimba mwene wa Ashiliya.

²² Elye nilyo lizu anamba Nyambi ya Ngula bya hahendi ngayi, ‘Mwana wa mbuyama wa kankanga wamu Ziyoni uli na kukulimbwilisha na ku kushilawiza. Mwana wa mbuyama wa Yelushalema ukunengokesha mutwe wendi oho ukutina.

²³ Yani ou unatukana na kuhandula? Lizu lyobe unalitutwishili yani kami yani ou unalushwili meho? Una handulu wa kuyela wa Ishalela.

²⁴ Unahandulu Mwene na bakamilimo bobe, kami unamba ngayi, na makoloyi ami amengi, ninayi hayilu ya mapili a Lembanoni nawishile mitondo yayitali shikuma ya shinda, na mitondo yayiwahe shikuma ya Shayipulashi, pe na kumine kwakutali mu mashaka akuzika.

²⁵ Nakabile mashima, pe nanwine mema amo, kami na malyatilo a mawulu wami nayumishile tushinzi nimwato twamu Engepita.’ ”

²⁶ Kati mufwako kuyuvwa ngayi nashiyongwele mwaka ndi? Ebi nikutenda lelo nabiyongwele mwaka ku matena akunyima, ngayi ufutule zinkena za bipata kwinga mishiinzi ya mamanya.

²⁷ Bantu bekalile muyo, bengile bakubula ngovu, ba batampwishile na ku bayenesha. Banafweke ngo mwila unamene mu mfuba hinge ngo nyawe yinamene ha shiluli sha litala, oyo yikulebuka na ntukumina ya mpepo yaku mushamuko.

²⁸ Ngoboni nikulimuka nimwabyo bya hahobe, nikulimuka ebi ukutenda, noku ukuya, nineshe ukundwisha.

²⁹ “ ‘Ndaba unandwishi, kami kuliyemeza kwobe kunakumu ku matu wami, nikayaka kahanto kami mu muzulu wobe, na lumingo lwami mukanwa kobe, pe nika kubwesha na nzila wezile nayo.’ ”

³⁰ Niho Ishaya atongwezele mwene Hezekiya ngayi, “Eshe nisho shilimukisho shikamoneka kukwobe. Uno mwaka ukalya mbuto ya kulimenena, mwaka ukwiza ukalya mbuto ya ngwila, ngoboni mu mwaka wa wuhatu ukakuna mbuto yobe, oyo ukateza, kami ukakuna mfuba ya shinyanca na kulya mikabo yayo.

³¹ Obo bakapuluka mu litala lya Yunda bakatangama, bakenga ngo mitondo yinatwala mipishi hanci na kuyima mikabo kuyilu yayo.

³² Mu Yelushalema kukafuma mashaliza, ha lipili lya Ziyoni hakekala bantu baya eze bakapuluke ndaba Nyambi wa Makunge nafungu ngayi ebye bikatendiwe.

³³ “Nohobene Nyambi ya Ngula ukwamba hali mwene wa Ashiliya ngayi, ‘Kukengina mu lukena luno wufwako, hinge kupuhamo muvwi, hinge kukeza na bakanzita bali na makebo abo kwakwipi na lukena luno, hinge kushiminako mushimino wakuzingwilishako.

³⁴ Na nzila eye ezile nayo, niyo kami akaboka nayo, pe kukengina mu lukena luno wufwako, eshe nisho anamba Nyambi ya Ngula.

³⁵ Ndaba nikalama luno lukena na kulupulwisha, ndaba yami amimwine na mukamulimo wami Ndavita.’ ”

³⁶ Lingeloyi lya Nyambi ya Ngula lyayile ku munkungwa wa Ashiliya lya kazihilemo bakanzita 185,000. Oho bapindukile lumenemene mituntu ya bantu ba kufwa yinashewama hanci shewaa.

³⁷ Niho Shenakelimba mwene wamunene wa Ashiliya wakatukile na kuboka ku munzi, pe wakekalile ku Neniva.

³⁸ Mutena umo oho alemeshelenga mu litala lya nyambi yendi Nishiloki, Andilameleki na Shaleza bana bendi babalume babili bamuzihile na mikwale yabo, pe batininine ku litunga lya Alalata. Niho mwanendi Eshahandoni wamushwanine kwinga mwene.