Ishaya 36 - Libuka Lya Kuyela

Baashiliya ba kutinisha Yelushalema

¹ Mu mwaka wa 14 wakulela kwa mwene Hezekiya, Shenakelimba mwene wa Ashiliya walwishile zinkena za Yunda zazingulukiwa na bipata na kuzikoma.

² Mwene waku Ashiliya watumine Lambishake kanzita wa mukulwane kufuma ku Lakishi kuya kuli mwene Hezekiya ku Yelushalema na nzita yayinene. Niho ayile na kwimana mu mukwakwa hahepi na lilomba liya lyaletelenga mema aku liziba lya ku nkambamo.

³ Babilolo bezile na kuliwana nendi bengile aba, Eliyakimu mwana Hilikiya, ou wengile mukulwane waku musheke na Shembina mukakutikita wamu shinzanza na Yowa mwana Ashafwi ou wengile mukulwane mukakulama bya likota lya wene.

⁴ Lambishake wabambilile ngayi, “Tongwezenu Hezekiya ngayi, mwene wamunene wa Ashiliya unamba ngayi, ‘Kati unakinki mutima hati?

⁵ Kati ukuhanganika ngayi mazu owa anengi ngana za nzita ndi? Kati wakinki mutima hali yani, ngayi utweshe kumfutulukila?

⁶ Mona, uli na kukinka mutima hali Engepita, uyo muwana wa litete wakumunguka, ou ukutwesha kutubula liboko lya muntu nimwendi ukuyendaminaho. Eshe nisho ali Fwalo wa Engepita ku nimwabo ba kukinka mutima hahendi.’”

⁷ Ngoboni ndi mukwamba kukwami ngayi, “Twakinka mutima hali Nyambi ya Ngula, Nyambi yetu,” Kaliha niye Nyambi, ou mwene yenu. Hezekiya wahandwile na ku shandola myanya yendi ya hayilu na tuula twendi oho atongwezele zinkena za Yunda na Yelushalema kulemesha ku naka kaala ka mamanya.

⁸ Haya yekenu muliyuvwashane na hekulyami, mwene wa Ashiliya, ngayi mwanga nikamipanike bambishi 2,000 ndi mukaliwanina baka ku bakandama.

⁹ Haya mu kutwesha nahiti ku shintulula mukulwane wa nzita mukati ka bakamilimo bahekulyami babashebashe, oho mu kukinka mutima ha makoloyi na bakakukandama bambishi ba Engepita?

¹⁰ Kati mu kuhanganika ngayi nezi na kulwisha litunga lyenu na kulilobesha kwakubula kuyavwa kwa Nyambi ya Ngula ndi? Nyambi ya Ngula niye wantongwezele ngayi, yanga ukalwishe litunga liyo na kulilobesha.

¹¹ Niho Eliyakimu na Shembina na Yowa bambile kuli Lambishake ngayi, “Lombela na kwamba ku bakamilimo bobe mu lulimi lwa Shialamayiki, ndaba nilwo lulimi tukuyuvwa, hinga wamba kukwetu mu lulimi lwa Shihebelu ngayi bantu bali ha mamota bayuvweko.”

¹² Ngoboni Lambishake wambile ngayi, “Kati mu kuhanganika ngayi enu na mwene yenu niko anantumu mwene wamunene mukwamba awa mazu tuhu ndi? Byo, nili na kwamba kami ni ku bantu aba banekala ha mamota, baya eze balye mazilo amu mavumo abo na mema aha zinyutu zabo hamo nanenu.”

¹³ Niho Lambishake emanine na kubilika na lizu lyalinene mu lulimi lwa Yunda ngayi, “Yuvwililenu ku mazu a mwene wamunene, mwene wa Ashiliya.

¹⁴ Mwene ngayi, ‘Hinga mwitabila Hezekiya kumyongeza, ndaba wufwako kukatwesha kukamilamwina.

¹⁵ Hinga mwitabila Hezekiya kumyongeza ngayi mukinke mutima hali Nyambi ya Ngula na kwamba ngayi, “Mwa shikuma Nyambi ya Ngula ukatulamwina, olu lukena lufwako kukapanikiwa ku maboko a mwene wa Ashiliya.”

¹⁶ Hinga muyuvwilila kuli Hezekiya. Yekenu tuliyuvwashane bya ku mwena na nami, mwakatenda noho muntu nimwendi mukati kenu ukalya shinyanca na nkuyu zendi, kami nimwendi muntu mukati kenu ukanwa mema amu lishima lyendi,

¹⁷ hantu na kezi na kukamitwala ku litunga lya kulifweka na litunga lyenu, litunga lya mikolobozi ya shinyanca lya kupana waine. Litunga lili na loto lwa kutendaho mankende.

¹⁸ Keyenu kutina Hezekiya ami shanwisha na kwamba ngayi, “Nyambi ya Ngula ukatulamwina.” Kati kuli banyambi ba mishobo yashenge, aba balamwini litunga lyendi kulifumisha ku maboko a mwene wa Ashiliya ndi?

¹⁹ Kati banyambi ba Hamati na Alipandi balikuti? Hinge banyambi ba Shefwalavayimu balikuti? Kati balamwinaho Shamaliya mu liboko lyami ndi?

²⁰ Yani mukati ka naba banyambi nimwabo ba nawa matunga baya banalamwini matunga abo kuwafumisha mu maboko ami, ngayi Nyambi ya Ngula akalamwine Yelushalema kumufumisha mu maboko ami?

²¹ Ngoboni bamwenene hulutuu, kami kowa ou wakumbwileko lizu, ndaba mwene Hezekiya wambile ngayi, “Hinga mu mukumbula.”

²² Niho Eliyakimu mwana Hilikiya wengile mukulwane waku musheke na Shembina mukakutikita wa mushinzanza na Yowa mwana Ashafwi, ou wengile mukulwane mukakulama bya likota lya wene, bezile kuli Hezekiya hinga batabozola bivwalo byabo na kumutongweza mazu a Lambishake.