Ishaya 35 - Libuka Lya Kuyela

Nzila ya kuyela

¹ Libelelengwa likawahilila, pe ngawungawu yikatangala na kuyaka ntemo ngonehe mayangayanga.

² Libelelengwa likayaka ntemo zazingi, na ku wahilila kwa kuwulumwina na kwimbila, maleema a Lembanoni akapanikiwa kukwalyo. Wunene wa Kamela na Shaloni kami ukapanikiwa kukwalyo, bakamona wuwahe wa Nyambi ya Ngula, na wunene wa Nyambi yetu,

³ Ukashumisha maboko akuzekema, na manungo akuzikima na kuwashumisha.

⁴ Tongweza baya bali na mitima ya bowa ngayi, “Shumenu, hinga mutina! Monenu, Nyambi yenu ukeza na kubweshela, ukwiza na kutapishila kashushwilo. Pe ukeza na kumipulwisha.”

⁵ Niho meho a kashishitwa akatoneshiwa pe matu a shizika matu akazikuka.

⁶ Niho shihole ukakiloka ngonehe shineke, kami lulimi lwa shimumu lukembila na ku wahilila. Ndaba mema akashabika mu ngawungawu, tushinzi twa mema tukakunkula mu libelelengwa,

⁷ lihekelela lya kubanga likafutuka liziba, kami litunga lyanyuminine likenzala na tuheloke. Omu mwekalilenga bamimbwe, mukamena likundu na matete na ntebe.

⁸ Kukekala likululu kami kuyo pe yikatumbiwa ngayi nzila ya kuyela, wa mazilo kukatwesha kupitamo wufwako, babihulahuli bafwako kukashanwisha baya bakwendamo.

⁹ Babimbwi bafwako kukekalako kuyo, na tunzama twatukali kukapita na nzila yiyo tufwako, ngoboni aba banakuliziwi nibo bakendamo.

¹⁰ Banakuliziwi kuli Nyambi ya Ngula bakaboka, bakeza ku Ziyoni na kwimbila, na kutangala na kuwulumwina tunkelenkele twa ku wahilila. Ku wahilila kwa mwaya myaka, ku wahilila na kutangala kukekala ha mitwe yabo, wunginga na kulihwezumuna bikatina.