Ishaya 33 - Libuka Lya Kuyela

Lilombelo lya kushinga kuyavwiwa

¹ Makando wobe, obe kalobesha, obe mwine ou unabulu kulobeshiwa. Makando wobe obe libeba, obe unabulu kubebiwa. Oho unalehe kulobesha, ukalobeshiwa, kami oho unalehe kubeba nobe ukabebiwa.

² Obe Nyambi ya Ngula, tuyuvwileko nceshe, tukukutatilila. Winge nyala zetu ku lumenemene, kupulwisha kwetu ha bikati bya makando.

³ Kumbyazeka kwa lizu lyobe matunga aketuka, oho ukakatuka pe matunga akapanzana.

⁴ Byuma byabo bikapukuliwa ngonehe ba kungulanga bambimba byakulya byabo, bantu bakakilozokaho ngonehe yakilozokanga mikumbi ya shihenya.

⁵ Nyambi ya Ngula watumbalala, ndaba wazika hayilu, Kupwisha na kulunga kukenzala mu Ziyoni.

⁶ Obe mwimbi aha tunaziki lelo. Watupulwishanga bikati nimwabyo na kutupana ngana na kalimukisho, kowa byabinene kukwetu ngonehe ku kwombatala.

⁷ Monenu, bantu babo ba kukanca ba kulilila hanza. Bankamba bashingile kuleta ku mwena bali na kukaloka shikuma.

⁸ Mikwakwa yinakaniwi bakakwenda balehesho kwendamo. Kulimama kukamana na bapaki banashampuliwi, kowa kufulankana muntu kami.

⁹ Litunga lili mu mbingo kami linafutuku mapembe, mashaka a Lembanoni analebuku. Shaloni unafweke ngo libelelengwa, mitondo yaku Mbashani na Kamela yikupulumuka mabizi.

Nyambi ya Ngula ukutoshesha bamalamo bendi

¹⁰ Nyambi ya Ngula ukwamba ngayi, “Haya nikalikatula amimwine, haya bakankatula.

¹¹ Mukwimita muzungu, pe mu kubeleka ntende, muuku ou mukwoya unengi mundilo uya ukamilobesha.

¹² Kami bantu ba matunga bakafweka ngo kuhokeshiwa kwa mpaza, ngonehe mihongela yinatetiwi na kuhokeshiwa.

¹³ Yuvwililenu, enu muli kwakutali, ebi ninatende. Nanenu muli kwakwipi, limukenu wunene wami.”

¹⁴ Bakawubi bali mu Ziyoni bali na bowa, kukanka ku na kwata bakakubula Nyambi “Yani hakatiketu ukutwesha kwikala mu mundilo wakumunangisha? Yani hakatiketu ukutwesha kwikala mu mundilo wakubanga mwaya myaka?”

¹⁵ Muntu ou ukwenda mu kulunga na kwamba byakwoloka, ou ukukana kuhetela ha bakakushepwa, ou ukukana kutambula mazika kanwa, ou ukukanisha matu endi kuyuvwilila ku bya kuyita mukeza, kami ukuzimanana kutina ku mona byabibi.

¹⁶ Muntu wanehe ukekala hayilu, mwanya wendi wakupulukila ukenga bipata bya mapili, byakulya bikapanikiwa kukwendi, mema akapanikiwa kukwendi.

Wuwahe wakumbili

¹⁷ Meho enu akamona mwene mu wuwahe wendi, bakamona litunga lya kumina kwakutali.

¹⁸ Mitima yenu yikahanganikanga bikati bya kutinisha, “Mukakulaba uli kuti, ou watambwilenga mali uli kuti? Ou watwamininenga tupeshi uli kuti?”

¹⁹ Mufwako kami kukamona bakakulilundumika, bantu bakakwamba bya kulavwata obyo mu kubula kuyuvwa, ba kutata na lulimi lwa kubula kuyuvwanika.

²⁰ Monenu Ziyoni, lukena mwekala bimbo byetu. Meho enu akamona Yelushalema, mwanya waku mwena wakwikala, ntanda ya kubula kuhenyeshiwa, zimpimpi zayo zifwako kuzukuliwa hinge kuvutozola nyimbwa zayo.

²¹ Ngoboni kuyo Nyambi ya Ngula ukatumonesha wuwahe wendi, ku mwanya wawunene uli na mishinzi yayinene neye yayishe, omo mu kubula kupita mato a bilapo, hinge bishepe bya nzita.

²² Nyambi ya Ngula niye mukakuyata wetu, Nyambi ya Ngula niye kalela wetu, Nyambi ya Ngula niye mwene yetu na mupulwishi wetu.

²³ Nyimbwa za bishepe byobe bikuhenkanya, zifwako kushumisha shitondo sha mukati ka shishepe, hinge kutandubula likwiza lyendeshanga shishepe. Niho wuheti wawingi ukapukuliwa na kutapiliwa ngayi na bihole bikawaneko bitapilo.

²⁴ Pe kowa wazikamo ukamba ngayi, “Nili na kukola,” bantu bekala muyo bakayatiliwa ku milandu yabo.