Ishaya 32 - Libuka Lya Kuyela

Wene wakulunga

¹ Shikati shikeza, oho kukekala mwene ukalela mu kulunga, na batulela bakalela mu kupwisha.

² Muntu nimwendi ukenga ngo shilembalemba sha kutinina mpepo, na matinino akuyuwamina mvula, hinge ngonehe tushinzi twamema mu libelelengwa, na mubombola wa limanya lyalinene mu litunga lyanyuminine.

³ Niho meho a bantu baya ba ku mona afwako ku zimanana, na matu a bantu baya ba kuyuvwa akayuvwishisha.

⁴ Bakakwamba na kubula kuhanganika, bakalimuka byambo na kubiyuvwishisha. Baka shikukuma, bakamba na kulubulula byambo shiwahe.

⁵ Bakuyeba kukapanikiwa kami maleema bafwako, hinge ba mahalo kukawana maleema bafwako.

⁶ Ndaba shibulangana shambanga byowa, kami wahanganikanga byabibi. Pe watendanga bya kubula wunyambi. Bambanga bya kuhandula Nyambi ya Ngula, babulanga kupana byakulya ku baya bali na nzala, na kubula kupana mema ku baya bali na linyontwa.

⁷ Shibulangana biheka byendi byabibi, wafunganga byabibi bya kulobesha ba kushepwa mu nzila ya ku babangila bya mahalo, na ku bakwangisha kuwana byabo.

⁸ Ngoboni muntu wamuleemu, watendanga byuma byabiwahe, kami wemaninanga bya kupwisha.

⁹ Yuvwililenu, enu bambuyama muli mu mpoza, enu bambuyama mwabula kuyuvwa bowa, yuvwililenu ebye nikwamba.

¹⁰ Kukapita mwaka umo na matena amashe, pe enu bambuyama muli mu mpoza, yikalenu na bowa, ndaba mikabo ya shinyanca yikabulako, kubuya kwa mikabo kukekalako kufwako.

¹¹ Kankenu, enu bambuyama muli mu mpoza, yikalenu na bowa, enu bambuyama muli mu mpoza, vulenu bivwalo byenu mwende muhelengwa, pe mulikumbakanye bicancolo mu zinkanda zenu.

¹² Likamenu ha tupumpo ku monesha wunginga ndaba ya mafuba wenu a wilo na mafuba wenu a mikolobozi ayimanga mikabo ya shinyanca shikuma analobo,

¹³ ha litunga lya bantu bami hakamena mihongela na mitwampuku. Ee tuwenu mbingo ha matala nimwawo aya awahilililenga namu lukena lwa ku wahilila.

¹⁴ Musheke ukafutaminiwa, na lukena lwa bantu babengi lukafutuka mapembe, mimi yaha binkanda na tupeshi bikashiwuka mwaya myaka, kami bamintinkwe bakawahilililamo mukafutuka mabuyishilo a bambelele.

¹⁵ Hantu shikati shinakumu sha kututumina moyo wendi wakuyilu, libelelengwa likafutuka mafuba a wilo, na mafuba a wilo akamoneka ngo lishaka.

¹⁶ Kuyata kwakuketula byambo kukatendiwa mu libelelengwa, na kulunga kukekala mu mafuba a wilo.

¹⁷ Pe mikabo ya kulunga yikaleta ku mwena, kami bya kulunga bikaleta ku mwena mwaya mwaka.

¹⁸ Bantu bami bakazika mu myanya ya ku mwena, na minzi ya kwikala shiwahe na myanya ya ku shuma ya kukatalila.

¹⁹ Hinge ndi mvula wa nkuli ukalobesha mashaka, na lukena lukabunkoliwa.

²⁰ Bantu bakawahilila, ndaba bakekala na mema amengi, na kwitabilisha zingombe zenu na bambongolo ngayi bende oku bakushinga nimwako.