Ishaya 30 - Libuka Lya Kuyela

Kuliyuvwashana kowa na Engepita

¹ Eshe nisho anamba Nyambi ya Ngula, “Makando wabo aba bakakufutulukila, aba ba kukonka bifungo byabo biya bya kubula kwinga byami. Bakuliyuvwashana kwakubula bifungo byami. Bakuwezelela wubi kuwamina.

² Banayi ku Engepita na bifungo byabo kwakubula kubela kwami. Bakushinga ngayi Fwalo abalamwine, haya bakushinga kuholama mu mubombola wa Engepita.

³ Ngoboni kulamwina kwa Fwalo, kukafutuka lisheni kukwenu, kami shiholamino shenu mu mubombola wa Engepita kukamiletela malwa.

⁴ Hinge ndi ngayi babilolo ba Fwalo bali mu Zowani, kami bankamba bendi banakumu mu Haneshi,

⁵ hinge noho, bantu ba Yunda, bakayuvwa lisheni, ndaba liya litunga kuka balamwina hinge ku bayavwa lifwako. Likabaletela tuhu lisheni na malwa.”

⁶ Elye nilyo lizu lya Nyambi, ha tuyamana twa ku Nengembu ngayi, “Bankamba bakwenda mu litunga lya kuhumana na malwa, omu muli babimbwi na bampili mayoka a wuhungu, na bankonkola bakakwenda kuyilu, hinga bashimba zintupu za ndando yayinene ha bambongolo na makamela, ziya ba kutwala ku litunga liya likubula kutwesha ku bayavwa.

⁷ Litunga lya Engepita, kutwesha kuyavwa lifwako. Niho ninatumbu liya litunga ngayi, ‘Lahambu wakubula kutenda shamina.’”

Bantu bakubula kwombatala

⁸ Nyambi wantongwezele ngayi, haya batikitilebyo ha matapa, kami bitikite mu libuka, ngayi kumbili mwanga bikenge wupaki wakubula kumana.

⁹ Aba bantu banengi bakakufutulukila, na bana ba mahalo, bana bakubula kushinga kuyuvwilila ku longesha kwa Nyambi ya Ngula.

¹⁰ Enu mwambanga ku babimonamona ngayi, “Hinga mumona bimono,” kami ku bamiluwe ba Nyambi mukwamba ngayi, “Hinga mulubulula kukwetu byabiwahe, ambenu kukwetu tuhu byambo byabiboto, tulubulwilenu bya kukontama.

¹¹ Fumenu mu nzila, hendukenu mu nzila, kushinga kami kuyuvwa bya wa Kuyela wa Ishalela tufwako.”

¹² Nohobene wa Kuyela wa Ishalela ukwamba ngayi, “Ndaba munakana elye lizu, munakulupili mukwikalika baminenu na shilala na kukulupila ha kwongeza,

¹³ nohobene ou wubi kukwenu, ukafweka ngonehe mwata, unatabuku ha limota lyalitali likushinga kuwa, kuwa kwalyo kukenga kwa ku bazumuna,

¹⁴ kubunkoka kwalyo kukafweka ngo nyungu ya lima ya kubumba, eye yacancoliwanga na kubula kuyiyuvwila nceshe, kami ku bibanku byayo kowa bikawaniwako bya kukalila mundilo ha liziko, hinge sha kutekwisha mema mu lishima.”

¹⁵ Nohobene mwene Nyambi ya Ngula, wa Kuyela uya wa Ishalela ukwamba nehe ku bantu ngayi, “Ha kutenguluka na kukatala, nimo mukapulukila, mu ku mwena namu kukulupila nimo muli nyala zenu.” Ngoboni mu kukana kutenda noho,

¹⁶ mwambile ngayi, “Byo! Tuka panza ku bamalamo betu na kukandama ha bambishi ba lubilo.” Nohobene mukapanza na kuya, ngoboni, baya ba kumitanda bakenga ba lubilo shikuma.

¹⁷ Bantu 1,000 baketuka ku mafumbila a muntu umo wa kanzita, ku mafumbila a bakanzita mutanu, nimwenu muketuka na kutina. Hantu mukashale ngonehe shishimi bayakanga ndembela shinemana ha lipili, ngonehe ndembela ha shinkanda.

¹⁸ Nohobene Nyambi ya Ngula, ushili kushinga ku monesha nceshe kukwenu, nohobene ukalikatula hayilu na kumiyuvwila nceshe, ndaba Nyambi ya Ngula, nengi Nyambi wayatanga na kuketula. Bali na mfuywezi baya nimwabo ba kutatilila hahendi.

Nyambi ukafuywela bantu bendi

¹⁹ Enu bantu ba Ziyoni bekala mu Yelushalema, mufwako kukalila kami. Nyambi ya Ngula, mwa shikuma ukamiyuvwila nceshe, oho akayuvwa mbingo zenu ukamikumbula.

²⁰ Kami hinge ndi Hekulu ukamitabilisha kupita mu makando, ngoboni niye mwine ukekala nenu na kumi longesha, kami mukamumona.

²¹ Matu enu akayuvwa lizu kunyima yenu, hilyamba ngayi, “Yino nzila, endenumo,” Oho ukutengulukila ku shilyo, hinge oho ukutengulukila ku shimoho.

²² Mukalimbulula tunankishi twenu otu mwayenga na shiliva kami mukayumba bifwekesha munafwiki na ngolinde ngo byuma bya mazilo naku batongweza ngayi, “Fumenu aha!”

²³ Oho mukashanga mbuto yenu, Nyambi ya Ngula ukaminokeshela mvula wakuyikulisha na kumipana byakulya byabingi na zingombe zenu na mabuyilo amengi.

²⁴ Mapulu na bambongolo ba limanga mafuba enu bakabuya mwila wawuwahe, ou munaleleke na mafosholo.

²⁵ Ha mutena uyo oho bipata bya bamalamo benu bikakomiwa na kuzihiwa kwa bantu, tushinzi nimwato tukakuka mema kufuma ku mapili na binkanda.

²⁶ Ngonda ukatwa wezi ngo mutena, kami wezi wa mutena ukawezelela bikati mutanu na kabili kupitakana ha kutatika, nehe wezi wa matena mutanu alifungili hamo. Ebye nimwabyo bikatendiwa oho Nyambi ya Ngula akapamba na kupolesha bitombo bya bantu bendi.

Nyambi ukashushula Ashiliya

²⁷ Monenu, lizina lya Nyambi ya Ngula, lili na kwiza kufuma kwakutali na wukali wakubanga na makumbi a wishe akukakama, mivumbo yendi yinenzala na kupilama, kami lulimi lwendi lukwinga ngo kulasheka kwa mundilo.

²⁸ Kwoya kwendi ku kwinga ngo kashinzi ka nayiti kukumina mu ncingo, ukupepa matunga na kuwalobesha na kuyaka ku mimbanga ya bantu lumingo lwaku bahendwisha.

²⁹ Ngoboni enu bantu ba Nyambi, mukawahilila na kwimbila ha mutena wa shimbo sha kuyela. Mukawahilila ngo bantu bakuya ku lipili lya Nyambi ya Ngula naku Limanya lya Ishalela na mushumina wa tunamutolilo.

³⁰ Nyambi ya Ngula ukengisha muntu nimwendi kuyuvwa lizu lya kukangoka na ngovu za wukali wendi. Kukekala milangi ya mundilo na kumbyazeka kwa makumbi na likandavula na mvula wa mamanya.

³¹ Baashiliya bakatina oho bakayuvwa lizu na ngovu za wukali wa Nyambi ya Ngula, pe ukabashushula na muwana wendi.

³² Ngonehe Nyambi ya Ngula, akonzela ku bakama kami, bantu bendi bakalama shikati na kumbeta zingoma na tumbuli twatunene. Nyambi niyemwine ukalwisha Baashiliya.

³³ Ndaba mwanya wakuhokeshela mwene wa Ashiliya wawahishiwile mwaka. Mwanya unengi wawunene mu lupati na kunonka, kami munabungikiwi mushiinzi wa nkuni. Nyambi ya Ngula, ukoyelaho muuku wakwinga ngo mulangi wa mundilo unabangiziwi.