Ishaya 28 - Libuka Lya Kuyela

Kukeyesha Wene waku Ncelele

¹ Makando ku wene ba kuliyemezela bashakolwa bamu Efulemu, wuwahe wawo walebukanga ngonehe zingala za ntemo eze zili ha mitwe ya bakakutwaminina bakomiwa na waine.

² Monenu, Nyambi ya Ngula uli na muntu wakushuma na wangovu, ou ukeza ngo mvula wa likandavula na nkuli ya kulobesha, ngo mvula wamunene uya ukalobesha hanci na libazi.

³ Uya munana bakuliyemeza nawo baya bashakolwa ba Efulemu ukalyatangiliwa na mawulu.

⁴ Ntemo za kulebuka na wuwahe wazo ou uli ha mutwe wa mukulo wa wilo kukamoneka wufwako, ukafweka ngonehe nkuyu za muhalule ziya zahokanga mayinza shilolo akume, oho muntu akuzimona, ukumbwangula wanguwangu, oho tuhu ukuzikwata mu liboko lyendi.

⁵ Ha mutena uyo Nyambi wa Makunge ukenga munana wa maleema, na ngala yayiwahe ku mashaliza a bantu bendi.

⁶ Kami ukapana moyo wangana za kuyata na kuketula byambo ku bakakuyata, na kupana nyala ku baya ba kushintulula bamalamo ku mapangati aku lukena.

⁷ Bakankombela na bamiluwe ba kutalangila na waine, nakuzingulukishiwa na malovu amakali, ba kuvulanganyiwa na waine, ba kutalangila na malovu amakali, ndaba ya kunwa kulimuka bimono anatumu Nyambi bafwako bakubula kuketula byambo mu ku fwanina.

⁸ Zitebulu zabo nimwazo zinalambakana na maluke, nimwaho hana lambakana.

⁹ Bakulinyenga hahami ngayi, “Uya muntu ukalongesha yani ngana? Kati yani ukashinga bilongesha byendi? Bilongesha byendi byabiwahe tuhu ku bihumwina.

¹⁰ Ndaba ku longesha kwendi kwa ku labwata tuhu ngonehe kanuke ukulilongesha kwamba ngayi, lundayano na lundayano, muzila na muzila, shilongesha na shilongesha.”

¹¹ Nohobene ndi mufwako kunyuvwilila, Nyambi ya Ngula ukaliyavwisha mapukwenda kumilongesha na mazu a kubula kuyuvwanika.

¹² Wabambile ngayi, “Kuno haya niko kukatala, katalishenu banakwanga, ngoboni mwakanine kuyuvwilila.”

¹³ Nohobene lizu lya Nyambi ya Ngula likamilongesha na ku labwata ngonehe kanuke ukulilongesha kwamba ngayi, lundayano na lundayano, muzila na muzila, shilongesha na shilongesha, kakashe kuno, kakashe kuyo, ngayi mwanga baye na kwenda, pe bawe mantenganyima na kulemana bakakwatiwe na kutwaliwa mukwinga batuyili.

Limanya lya mu nkomi lya Ziyoni

¹⁴ Nohobene yuvwililenu lizu lya Nyambi ya Ngula, enu ba wuncengwe mu kulela bantu ba mu Yelushalema.

¹⁵ Mu kuliyemeza na kwamba ngayi, “Tunalimama na lufu, hamo na kuliyuvwashana na kalunga ka bafu. Muli na kupwisha ngayi makando akamishiyaho oho akeza, ndaba munakulupili mu mahalo na kwongeza ngayi bikamilama.”

¹⁶ Nohobene, Nyambi Mpandashilanga ukwamba ngayi, “Monenu nikayaka limanya lya mwimbi mu Ziyoni, limanya linahengoliwi shiwahe, limanya lya ndando yayinene lya mu nkomi ya mwimbi wakushuma. Nimwendi ou ukakulupila mumwendi kukayuvwa lisheni wufwako.

¹⁷ Kuyata kwakwoloka na kulunga nisho shipimisho sha kupimisha mwimbi. Likandavula likakomba mahalo nimwawo owo wakinka mutima, na libazi likalobesha matinino wobe.”

¹⁸ Niho kulimama kwenu na lufu kukamana, kuliyuvwashana kwenu na kalunga ka bafu kukekalako kufwako. Makando akamizilila mukakomiwa.

¹⁹ Makando akamizilila kami ha shikati na shikati, mukawayuvwa lumenemene na mwaana na wushiku, kami shikenga sha kutinisha ku yuvwishisha lizu lya Nyambi.

²⁰ Mukenga ngo nguli ya muntu wezekanga ku tandabala ha wulili wawipi, na kayemba kakashe kakulifwika.

²¹ Nyambi ya Ngula ukakaliha ngonehe akalihile ku Lipili lya Pelazimu na mu mukulo wa Ngimbiyoni, ngayi atende ebi akushinga kutenda, biku moneka kwinga bya wuyeni, na kumanisha mulimo wendi washiyeni.

²² Haya hinga mulimbulula ku shiwulula kwami oku nikumipanika. Ndi mu kulimbulula, shikenga shashikalu kukwenu kupanza, ndaba nayuvwu bifungo bya Mwene, Nyambi wa Makunge bya kulobesha litunga nimwalyo.

Ngana za Nyambi

²³ Yuvwililenu ebye nikwamba, yuvwishishenu ebye nikumitongweza.

²⁴ Kowa ndimi watwalililangaho kuwahisha tuhu mafuba, na kuwalima nahiya kubula bya ku shangamo.

²⁵ Oho wamanishakale kuwahisha mafuba, washanganga zimbuto za mashiha ngonehe ndilu na kumini. Wakunanga ha mikomena ya loto na luku, pe kunkumo ya mafuba endi, washangangako zimbuto zimina.

²⁶ Ndimi walimuka sha kutenda mulimo wendi, ndaba Nyambi wamulongesha.

²⁷ Kaliha waliyavwishanga mimba yayilemu ha kupula ndilu hinge kumini, ngoboni waliyavwishanga bitondo byabihehu.

²⁸ Kaliha wapulanga loto shikati shashitali ngayi icancoke, halimuka sha kupula loto, oho akukokaho mimba, bambishi kucancola mpeka bafwako.

²⁹ Ezi ngana nimwazo zafuma kuli Nyambi wa Makunge. Biyongola byendi byabiwahe, kami ngana zendi zazinene.