Ishaya 27 - Libuka Lya Kuyela

¹ Ha mutena uyo Nyambi ya Ngula ukaliyavwisha mukwale wendi wakushuma shikuma na kutinisha kushushula Libiyatani, liyoka walubilo, Libiyatani liyoka mu ka kulivungavunga ukazihiwa hamo na kayamana wa mu liwate.

² Ha mutena uyo, Nyambi ya Ngula ukamba bya mfuba yendi ya shinyanca ya kuyima shiwahe, ukamba ngayi,

³ “Ami Nyambi ya Ngula, ami mu ka kuyilama, ni kuyiyitilila shikati nimwasho. Nikuyilama wushiku na mwaana kutinisha muntu wamina ku yibipisha.

⁴ Nifwako kukayipilamina. Ndi nikuwana mihongela na mitwampuku, nikayilwisha mu nzita, pe nikayihokesha nimwayo.

⁵ Ngoboni bamalamo ba bantu bakushinga ngayi ni balame, banafwanini kulipana kukwami na ku lyambwilila na nami. Ee, banafwanini ku lyambwilila na nami.”

⁶ Mu matena a kumbili Yakobo ukamena mipishi, Ishalela ukahengula mabizi na kuyima mikabo yayingi oyo yikenzala mu kaye nimwamo.

⁷ Kati Nyambi ya Ngula unashushulu Baishalela ngonehe atendele ku bamalamo babo ndi? Kati Baishalela ba kuzihiwa ngonehe atendele ku bamalamo bendi ndi?

⁸ Nyambi ya Ngula wabashushwile, na kubatwala mu wuntapwa. Wabapepwilile kwakutali, ngonehe nkuli yayinene ya ku mushamuko.

⁹ Nohobene muntendelo eye, wubi wa Ishalela ukayatiliwa, pe bakamonesha kutenguluka kwabo kwa kupwisha. Bakabunkola tuula twa mamanya nimwato, kowa zimpangwa za nyambi Ashela hinge tuula twa kumuhokeshela incence bikashala hinga byemana.

¹⁰ Lukena lwa limota lunafutuku lipembe, ngonehe libelelengwa. Lunafutuku mabuyishilo a zingombe, oku zikutwesha kukatalila na kubuya mabizi.

¹¹ Oho myahi ya mitondo yikuyuma, yikupokoka. Pe bambuyama ba kuchaba nkuni. Ndaba banengi bantu bakubula ku yuvwishisha, nohobene, ou wabalengele, kuka bayuvwila nceshe wufwako, ou shakalenga wabo, kuka bayamiziza wufwako.

¹² Ha mutena uyo, Nyambi ya Ngula ukakungula bantu bendi Baishalela. Kufuma ku mushinzi wa Yufuleti kukakuma ku nginza na Engepita.

¹³ Ha mutena uyo, mpandula yayinene yikashibiwa, pe baya balubila mu litunga lya Ashiliya na baya batwaliwa mu litunga lya Engepita, bakaboka na kulemesha Nyambi ya Ngula, mu Yelushalema ha lipili lyendi lya kuyela.