Ishaya 26 - Libuka Lya Kuyela

Nyambi ukapana bantu bendi kukoma

¹ Ha mutena uyo, bantu bakembila luno lwimbo mu litunga lya Yunda ngayi, “Tuli na lukena lwa ku shuma, Nyambi niye unemanini mamota walwo.

² Shinkululenu mapangati a lukena, mwanga bantu bakulunga bengine, litunga lya kwoloka likutenda bya kupwisha.

³ Obe Nyambi ya Ngula, wapananga ku mwena kwa kukupwisha, baya banayaka bifungo byabo hahobe, ndaba banakulupili mumwobe.

⁴ Kulupilenu muli Nyambi ya Ngula bikati nimwabyo, ndaba Nyambi ya Ngula, Nyambi, niye limanya lya mwaya myaka.

⁵ Niye unashepeshe baya baliyemezelenga, unanyemunu lukena lwabo, unalunyemwini hanci, unalushandolo, na kuluwishila hanci.

⁶ Bakakuyandishiwa na bancepwe, bakalulyatangila.”

⁷ Zinzila za bantu bakulunga zenga zaziwahe, Obe Nyambi ya Ngula, obe walembukishanga zinzila za bakulunga.

⁸ Obe Nyambi ya Ngula, tukukonka kuyata kwobe, kami tukulumbeza mumwobe, shifungo sha mitima yetu sha kutumbalalisha lizina lyobe.

⁹ Nakushinganga na mutima wami nimwawo ku shikati sha wushiku, ku lumenemene, moyo wami wakushinganga. Oho nyatilo yobe yikekala hano hanci, bantu bamu kaye bakalimuka kuyata kwa kulunga.

¹⁰ Hinge ndi nceshe zinaholoko ku bantu bakuluwa, nibo kushinga kulilongesha bya kulunga bafwako. Bakutenda byabibi mu litunga lya bakwoloka, pe kutwesha ku mona wunene wobe Nyambi ya Ngula bafwako.

¹¹ Obe Nyambi ya Ngula, ngovu zobe zinamoneke, ngoboni kuzimona bafwako. Balehe bamone shitima shobe sha kuyavwa bantu bobe, pe bakayuvwa lisheni. Leha mundilo uya watentekela bamalamo bobe, mwanga ubalobeshe.

¹² Obe Nyambi ya Ngula, ukatupana ku mwena, ebye nimwabyo tunatende, obe unatutendelebyo.

¹³ Obe Nyambi ya Ngula, Nyambi yetu, tunaleliwi na bamyene bamina bashenge. Ngoboni, tukuleemeka tuhu lizina lyobe.

¹⁴ Nibo bafwa mwaka, kuyoya bafwako. Myoyo yabo, ku shanguka yifwako. Unabashushulu na kubalobesha, kowa ou ukabanuka kami.

¹⁵ Unaneneheshe litunga lyetu, Nyambi ya Ngula, unaneneheshe litunga lyetu. Unapanikiwi maleema. Unahenyeshe zinginza za litunga kuzimbalila nimwazo.

¹⁶ Obe Nyambi ya Ngula, washushwile bantu bobe, pe oho bekalile mu makando, balombelele kukwobe.

¹⁷ Obe Nyambi ya Ngula, watwingishile ngayi tulile, ngonehe akalokanga mbuyama uli na kushinga ku shalaho.

¹⁸ Twengile ngo muntu uli na livumo, twakalokele, ndaba ya kukola, ngoboni twabelekele byowa. Kaliha twatweshele kuleta kupulwisha hanci, kami kowa ebi tunatweshe kutenda.

¹⁹ Bantu bobe banafu, bakayoya, zinyutu zabo zikashanguka. Nimwabo banalangana mulukungu, bakapinduka na kwimbila mu ku wahilila. Ngonehe mume wabombweshanga hanci, na Nyambi ya Ngula ukashangula baya bafwile mwaka.

Kuyata na kubwesha

²⁰ Bantu bami, bokenu mulishinkile mu matala wenu. Holamenu mu shikati shashishe, hantu wukali wa Nyambi unamana.

²¹ Nyambi ya Ngula ukeza kufuma ku mwanya wendi ekala na kushushula bantu ba hano hanci, ndaba ya wubi wabo. Hanci hakaholola mukeza ou wetikilile hahawo, kami kukaholeka mituntu yafwilaho hafwako.