Ishaya 25 - Libuka Lya Kuyela

Lwimbo lwa kuyemeza

¹ Obe Nyambi ya Ngula, obe Nyambi yami. Nikakuleemeka na kuyemeza lizina lyobe. Ndaba unatende mu kwoloka bifungo ebye wafungile mwaka.

² Luyo lukena unalufutulu lilala, lukena lwa shipata unalufutulu lipembe. Misheke ya bamalamo betu yifwako kukatenduliwa kami.

³ Haya bantu ba matunga a ngovu bakakupana maleema, kami ukatiniwa mu zinkena zili na bantu banguma.

⁴ Obe shipata sha bancepwe, na matinino a bakuyanda, oho bali mu malwa. Obe likunka mwa ku yuwama mvula, na mumvulu wakutinina mwaana. Ndaba kuhashoka kwa bantu banguma, ku nafweke ngonehe likandavula likulokela ha limota,

⁵ ngonehe linanga mu litunga lyanyuminine. Ngoboni obe, Nyambi ya Ngula, unamweneshe bamalamo betu, ngonehe likumbi lya bombweshanga ntukumina ya mutena, haya lwimbo lwa bantu banguma, lunamweneshiwi.

Nyambi ukuwahisha mayambwayambwa

⁶ Ha lipili elye lya Ziyoni, Nyambi wa Makunge, ukawahishilaho mayambwayambwa a matunga nimwawo a mukaye, akenga a byakulya byabingi byabiwahe shikuma na waine. Bikenga byakulya bya mazi bili na minconco na waine binatendiwi shiwahe.

⁷ Hanelye lipili, ukafumisha likumbi lya wunginga liya lyafwikile bantu nimwabo, likumbi liya lya konkanine ku matunga nimwao.

⁸ Ukamanisha lufu, kukekalako kami lufwako. Nyambi wa Makunge, ukakunkumuna mihozi ku meho a bantu nimwabo, kami ukafumisha lisheni ku bantu bendi mukaye nimwamo. Eshe nisho anamba Nyambi ya Ngula.

⁹ Ha mutena uyo bakamba ngayi, “Mwa shikuma, ou niye Nyambi yetu, twa kulupila mumwendi. Haya watulamwinakale, ou niye Nyambi ya Ngula, twa kulupila mumwendi, tuyenu tuwahilile na kutangala mu kupulwisha kwendi.”

Nyambi ukashushula Mowambi

¹⁰ Liboko lya Nyambi ya Ngula likekala ha lipili lya Ziyoni, ngoboni ba ku Mowambi bakalyatangiliwa ngonehe mwila walyatangiliwanga mu wutoko.

¹¹ Bakatandubula maboko ngonehe mukakuyowa ha mema. Ngoboni Nyambi ya Ngula ukashepesha kulilundumika kwabo, hinge ndi ngayi nibo benga bawutungu, ku bya kutenda na maboko.

¹² Ukanyemuna twimbi twabo twatutali, tukanyemukile hanci, tukashandoka na kufutuka lukungu.