Ishaya 23 - Libuka Lya Kuyela

Bya Fonisha

¹ Awa niwo mazu a hali Tile, lilenu, enu bishepe bya ku Tashishi! Ndaba lukena lwa Tile lunalobeshiwi. Matala na bibumbo byako binalobeshiwi. Elye lizu linafumu ku Shayipulashi.

² Mwenenu, enu mwazika ha shibumbo sha liwate, nanenu bakamikwebo bamu Shindoni. Mwatuminenga bantu,

³ mu nciza ya liwate mu kulanda na kulandulula mbuto yaku Shihola, yiya baliminenga mu Engepita. Mwengile bakamikwebo na matunga nimwao.

⁴ Yuvwa lisheni obe Shindoni, ndaba bipata bya liwate binamba ngayi, “Kaliha nekalile na mwana, kami kaliha nalelaho mwana wamulume hinge wa mbuyama.”

⁵ Oho lizu likakuma mu Engepita, bakakanka ha kuloba kwa Tile.

⁶ Tininenu ku Tashishi, lilenu na kuyena, enu mwazika ha shibumbo sha liwate.

⁷ Kati olu lukena lwenu lwa mwaka lwa nkwela, yani watwalile bantu balwo ngayi bakazike kwakutali?

⁸ Yani unatende nehe ku lukena lwa Tile, lukena luya lwaholwelenga bamyene? Lukena luya lwekalile na bakamikwebo, na bakakulandisha baya bengile ba maleema hano hanci nimwaho.

⁹ Nyambi wa Makunge, niye unatende nehe, ngayi mwanga ashepeshe bakakuliyemeza nimwabo, naku fumisha maleema a baka kulemeekiwa nimwabo ba hano hanci.

¹⁰ Enu bantu bamu Fonisha yenu mukalime mu Tashishi! Ndaba hikowa muntu wakumikinga kami.

¹¹ Nyambi ya Ngula unolwele liboko lyendi ha liwate, unanyenkanishi wene. Unalayelele ngayi bipata bya Fonisha bilobeshiwe.

¹² Unamba ngayi, “Kukaliyemeza kami mufwako, nenu bakakulyatililiwa bamu Shindoni. Katukenu muye ku Shayipulashi, hingebene kuyo, mufwako kukekala mu ku mwena.”

¹³ Penzenu ku litunga lya ba Mbambiloni, bantu aba balobeshiwakale. Baashiliya nibo bafutulakale bipata bya Tile kwinga lishaka mwakwikala tuyamana. Batalihishile ku tupeshi twabo, banyemwine misheke yamu Tile na ku shiya lukena mu mapembe.

¹⁴ Lilenu enu bakakuvuwa bishepe bya ku Tashishi, ndaba shipata eshi mwakulupilile shinalobeshiwi.

¹⁵ Ha shikati shiyo, Tile ukavulamiwa mu myaka 70, kwezekesha ngo matena akuyoya kwa mwene. Oho myaka oyo yakamana, Tile ukenga ngonehe lwimbo lwa walwiholwiho bembilile ngayi,

¹⁶ “Shimba shiwalawala shobe, uye na kuzinguluka lukena, obe walwiholwiho wakuvulamiwa. Yimbila mushumina wawuwahe, yimbila nyimbo zazingi ngayi mwanga wanukiwe.”

¹⁷ Oho myaka 70 yakamana, Nyambi ya Ngula ukayavwa Tile. Olu lukena lukaboka ku mikwebo yawo ya mwaka. Tile ukatenda bya lwiholwiho na wene nimwawo wa hanci.

¹⁸ Nkambiko ya mali awa akawana ha mikwebo, ukawafungwila kuli Nyambi ya Ngula. Hinga akatentekiwa awa mali, ngoboni baya bakalemeshanga Nyambi mu kulanda byakulya na bya kuvwala ebye bakushinga.