Ishaya 22 - Libuka Lya Kuyela

Bya Yelushalema

¹ Awa niwo mazu aha mukulo wa bimono. Kati ebye bikumikabakanisha bishini ngayi mukundame hayilu, nimwenumwenu hayilu ya biluli bya matala?

² Obe munzi wa miyoyo, obe munzi wa mushunga wawunene, munzi wa myelembo yayingi. Bantu benu kaliha bazihiwile na mukwale hinge kufwila mu kulwa.

³ Batulela benu nimwabo betukile hamo, pe bakwatiwile oho shilolo bapuhiwe mivwi. Enu nimwenu mwawaniwile mwakwatiwile hinge ndi betukilile kwakutali oho bamalamo bashili kwakutali.

⁴ Nohobene nambile ngayi, “Nciyenu ninkayami, ndehenu nilile shikuma, mulipokwesha kumbengezeka ha bantu bami nimwabo baya banafu.”

⁵ Nyambi wa Makunge uli na mutena wa mishunga na sha kulyatangila na kuluwanganisha mu mukulo wa bimono. Twimbi twa lukena tunashiwiliwi hanci pe na kukalokela ku mapili.

⁶ Banzita ba ku Elamu bezile hinga bakandama ha bambishi, banapakata bipando bya mukunzi na zincumbilo za mivwi. Baku litunga lya Kila baholwele makebo wabo.

⁷ Mikulo yamu Yunda yenzalile na makoloyi, na bakanzita aba bakandamine ha bambishi bemanine ku mapangati aku Yelushalema.

⁸ Unashandolo bipata bya mu Yunda. Ha mutena uya watilaminine ku bilwisho bya mu musheke wamu lishaka.

⁹ Mwamonene ngayi ku kembi ka lukena lwa Ndavita kwa bunkukile mincena yayingi, pe mwakongele mema aku liziba lya ku nceto.

¹⁰ Niho mwalabile matala amu Yelushalema, pe mwabunkweleko amo ngayi mwanga bashumishe limota.

¹¹ Mwakabile shikongelo sha mema amu liziba lya mwaka mukati ka mamota abili, ngoboni kaliha mwapenzele kukwendi ou walitendele, hinge kufulankana ou wafungile kushikale ngayi likaleko.

¹² Ha mutena uyo Mwene, Nyambi wa Makunge, wamihanine ngayi mulile na kukangoka, ngayi ushehe huki zobe na kuvwala bya malila.

¹³ Ngoboni monenu, enu kukeyuka kwa ku wahilila, na kuziha zingombe na bambelele, mu kulya nyama na kunwa waine, himwamba ngayi, “Tulyenu na kunwa, ndaba nzona tukafwa.”

¹⁴ Nyambi wa Makunge wahololwele ebye mu matu wami ngayi, “Mwa shikuma ou wubi nifwako kukawuyatila.” Nisho anamba Mwene Nyambi wa Makunge.

Kukeyesha Shembina

¹⁵ Eshe nisho anamba Mwene, Nyambi wa Makunge ngayi, “Ya kuli Shembina shamanga wa mukulwane waku musheke ukamutongweze ngayi,

¹⁶ ukutenda bishini kuno? Uli na ngovu ngani za kulikabila shinzimbi obe mwine? Uli na ngovu ngani za ku shifumisha mu mwanya ou? Uli na ngovu ngani za kukaba mwanya wakukatalila obe mwine mu limanya?

¹⁷ Mona obe muntu wakushuma, Nyambi ya Ngula ukakukwata na kukuyumbila ha munkanda.

¹⁸ Akakupombe lutu nimwalwo na kukuzingwilisha nehe mpila na kukuyumbila mu litunga lyalinene, omo eze ukafwile na makoloyi wobe amawahe ukayenesha litala lya bahekulyobe.

¹⁹ Nikakufumisha ha mulimo wobe uli na kutenda wa hayilu naku kubwesha hanci.

²⁰ “Ha mutena uyo Nyambi ukehana mukamulimo wendi Eliyakimu, mwana Hilikiya.

²¹ Pe nika muvwalika na shivwalo shobe na ku limanga mukunzi wobe, ngovu nimwazo zikekala mu maboko endi, pe ukenga tata bantu bekala mu Yelushalema naba ku litala lya Yunda.

²² Kami nikayaka makiyi aku litala lya Ndavita mu maboko wendi, pe oho akashinkulula, kowa ou eze akashinke, kami oho akashinka, kowa ou eze akashinkulule.

²³ Nikamupampala nehe mpimpi mu mwanya mwa kushuma, pe ukenga litanda lya maleema ku litala lya tatiyendi.

²⁴ “Wulemu wa litala lya tatiyendi nimwawo ukekala ha mutwe wendi. Ukekala na ngovu ku bantu bakahemuwa na bazukulu, hamo na bishebezesho nimwabyo byabishe nehe zinkomoki na zintesho.

²⁵ Nyambi wa Makunge ukwamba ngayi, ha mutena uyo mpimpi iyo ya pampaliwile ha ku shuma yikanyenkana, pe bakayihomona na kuyiwisha ngayi byuma nimwabyo bya nyenzelelengaho bikawila hanci na kubipa.” Nisho anamba Nyambi ya Ngula.