Ishaya 21 - Libuka Lya Kuyela

Shimono sha kuwa kwa Mbambiloni

¹ Awa niwo mazu a hali libelelengwa lya ku liwate, ngonehe tukundukundu twa Nengembu, twapepula kufuminina ku libelelengwa, twafumanga ku litunga lya kutinisha.

² Nekala na shimono sha kutinisha, shimono sha kubeba na kulobesha. Bakanzita ya Elamu na Mendiya bazingulukile, na kulwisha Mbambiloni. Nyambi ukamanisha makando aya baletele ba Mbambiloni.

³ Nohobene zintungi zami zikukola shikuma, kukola shikuma, kukola kwa kufweka ngo mbuyama unakushalaho. Nikutalangila ndaba yanebye nikuyuvwa, natampwishiwi ndaba yanebye niku mona.

⁴ Mutima wami unapopo, bowa wawunene unankwata. Mazolo nashinganga anafutuku kukwami kwinga akunkankisha.

⁵ Bakuwahisha tebulu, ba kuyala manala hanci, pe ba kulya na kunwa. Enu babilolo katukenu! Wabishenu makebo.

⁶ Ndaba mwene nantongweze ngayi, “Yanga, ukayake mukakulama, pe akabilike ebye aku mona.

⁷ Oho aku mona bantu babili babili, banakandama ha bambishi naha bambongolo, naba banakandama ha bakamela, enu bakakulama keyenu, keyenu shikuma.”

⁸ Niho mukakulama wabilikizile ngayi, “Obe mwene, nemananga ha kapeshi shikati nimwasho sha mwaana, na shikati sha wushiku nikwikala na kubelamina na kubula kukatala.”

⁹ Namonene, kuli na kwiza bantu banakandama ha bambishi, mu bipani bya bantu babili babili! Pe umo kukwabo wakumbwile ngayi, “Mbambiloni unau, Mbambiloni unau, na bifwekesha bya banyambi bendi nimwabyo banabicancwele hanci.”

¹⁰ Niho enu bawushinda wami Baishalela, enu ba kupuliwa ha likotwelo na kupepiwa, nili na kubilika kukwenu ncango zaziwahe ebye nayuvwu kuli Nyambi wa Makunge Nyambi wa Ishalela.

Bya Endoma

¹¹ Awa niwo mazu a hali Nduma. Muntu waku Sheya uli na kunyihana ngayi, “Obe mukakulama, wushiku uli nahiti? Obe mukakulama, wushiku uli nahiti?”

¹² Mukakulama wambile ngayi, “Lumenemene luli na kwiza na wushiku kami ukwiza. Ndi mukepula, kepulenu, pe kabokenu kami.”

Bya Alembiya

¹³ Awa niwo mazu a hali Alembiya. Enu mihoko ya Bandendani, mukatulila mu shimbundu sha Alembiya.

¹⁴ Bapanenu mema bantu banafu linyontwa. Enu bantu mwekala ku Tema, shimbawishilenu byakulya baya banetuku ku nzita.

¹⁵ Ndaba banetuku ku mikwale, mikwale ya kuhomona mu shipushu na bipando bya mukunzi, na ku nzita yayikalu.

¹⁶ Ndaba mwene wambile kukwami ngayi, “Mukati ka mwaka umo bene, kwezekesha ngo mwaka wa mukakwihaniwa ku mulimo, kuliyemeza kwa Kenda kukamana.

¹⁷ Bakabipando bya mukunzi baya bakashalaho, ku bantu bangovu bamu Kenda, bakenga babashe, eshi nisho ninamba ami Nyambi ya Ngula, Nyambi wa Ishalela.”