Ishaya 2 - Libuka Lya Kuyela

Ku mwena kwa mwaya myaka

¹ Shino nisho shimono amonene Ishaya mwana Amozi ha Yunda na Yelushalema.

² Shikenga nehe ha matena akeza kumbili, lipili elye hanemana Litala lya Nyambi ya Ngula, likenga lyalitali kupitakana mapili amina, na kutumpuka mukati ka binkanda, pe matunga amengi akakunkula kukwalyo.

³ Bantu babengi bakeza na kwamba ngayi, “Yekenu tukankalale ku lipili lya Nyambi ya Ngula. Ku Litala lya Nyambi wa Ishalela, ngayi akatulongeshe twafwanina kutenda, mwanga tukende mu zinzila zendi.” Ndaba ndayano zikufuminina mu Ziyoni, na lizu lya Nyambi ya Ngula likafuma mu Yelushalema.

⁴ Nyambi ya Ngula ukayata byambo mukati ka matunga, na kumanisha nkani za bantu ba mishobo yayingi. Bakafula mikwale yabo kwinga makahu, na milinga yabo bakafulaho zimpoko. Matunga kukalwa na matunga amina afwako, hinge kuliwahishila bya nzita afwako.

⁵ Enu baka litala lya Yakobo, yekenu twende mu mwana wa Nyambi ya Ngula.

Bakakulilundumika na kuliyemeza bakalobeshiwa

⁶ Obe Nyambi ya Ngula, unafutamini bantu bobe, baka litala lya Yakobo, ndaba mukati kabo munenzala wumbuki waku mushamuko, hamo na bakakwawula ngonehe Bafwilishitina. Bakulipakila mu maboko kutenda shikonzi na mapukwenda.

⁷ Litunga lyabo linenzala shiliva na ngolinde kami wuheti wabo kumana mu zimfuma zabo wufwako. Litunga lyabo linenzala na bambishi, kami makoloyi wabo kumana afwako.

⁸ Litunga lyabo linenzala na tunankishi. Bakulemesha milimo ya maboko wabo.

⁹ Muntu nimwendi ukombatalishiwa ukashepeshiwa. Obe Nyambi ya Ngula, hinga ubayatila.

¹⁰ Yinginenu mu manzolongoma amu mamanya. Holamenu mu mateke kutina wukali wa Nyambi ya Ngula naku wuwahe wa ngovu zendi.

¹¹ Mutena ukeza oho kulilundumika kwa muntu kukombatalishiwa na kuliyemeza kwa muntu kukashepeshiwa. Ha mutena uya Nyambi ya Ngula ninkayendi ukayemeziwa.

¹² Nyambi wa Makunge ukashepesha muntu nimwendi mukakuliyemeza na mukakulilundumika. Shuma nimwasho sha yemeziwile shikashepeshiwa,

¹³ mitondo nimwayo ya shinda yayitali na wunene yamu Lembanoni na mitondo nimwayo ya Oka yamu Mbashani,

¹⁴ na mapili amatali na binkanda nimwabyo,

¹⁵ na kapeshi kakatali ka ku shuma na shipata sha ku shuma shikuma nimwasho.

¹⁶ Mato nimwawo amanene shikuma aku Tashishi na mato nimwawo amawahe ayemeziwile akashepeshiwa.

¹⁷ Pe bakakuliyemeza nimwabo bakashepeshiwa na bakakulilundumika, bakwombatalishiwa. Ha mutena uyo, Nyambi ya Ngula ninkayendi, niye ukayemeziwa.

¹⁸ Tunankishi nimwato, tukamana.

¹⁹ Bantu bakatinina mu manzolongoma amu mamanya na mu mateke a hanci kutina wukali wa Nyambi ya Ngula naku wuwahe wa ngovu zendi oho akaholoka mu kunyenkanisha hanci.

²⁰ Ha mutena uyo, bantu bakapuhila ku bampumba naku tumfwimfwa, tunankishi twabo twa shiliva na twa ngolinde otu balitendelele ngayi batulemeshenga.

²¹ Baketukila mu manzolongoma namu mateke amu mamanya, ndaba ya kutina wukali wa Nyambi ya Ngula naku wuwahe wa ngovu zendi, oho akwiza mu kunyenkanisha hanci.

²² Leha kukulupila muntu, ou uli na muuku mu mizulu yendi. Muntu uli na maleema akukuma hati?