Ishaya 19 - Libuka Lya Kuyela

Nyambi ukashushula Engepita

¹ Ebye byambiwile ha litunga lya Engepita. Nyambi ya Ngula uli na kwiza ku Engepita, hinga akandama ha likumbi likwenda lubilo, kami tunankishi twa Engepita tukakanka ku meho wendi, pe mitima ya ba Engepita yikafwa nzukwa.

² Nyambi ngayi, “Nikatumeza ba Engepita kulwisha baminabo ba Engepita, muntu na muntu ukalwisha kawushinda wendi, kami muntu na muntu ukalwisha minendi, lukena lukalwisha lukena lwamina, wene ukalwisha wene wamina.

³ Niho Baengepita bakalihupwiza, pe nikavulanganya bifungo byabo, bakaya na kwipwiziza kutunankishi naku bakamalele, bakaya kami ku bakakwamba na bapashi naku balozi,

⁴ Baengepita nikabapana ku liboko lya hekulyabo wanguma, mwene wamukali ukabalela.” Eshe nisho anamba mwene, Nyambi wa Makunge.

⁵ Kami mema amu mushinzi wa Nayilo akayuma nkwaa, na mushinzi ukalikokela na kuyuma,

⁶ na malomba wawo akanuka, mishapa yayo yikalikokela na kuyuma, matete na ntebe bikabola.

⁷ Bya kumena kunkumo ya Nayilo bikayuma, na mbuto nimwayo yiya yakuniwanga ha bibumbo bya Nayilo, bikayuma nkwaa na kupepuka kami kukekalako yifwako.

⁸ Bakakushashila zinci bakalila na kupwezuma, na bakakuhanta nimwabo mu Nayilo, aba bamanyikanga tunyanzi bakalinyenga.

⁹ Bakakutunga makwiza ha wutonge bakahomba, na bakakutunga wutonge wakutuba nanibo hamo.

¹⁰ Obo banengi zimpangwa za litunga bakacancoliwa, na bakakutenda mulimo wakuwana ncuungu bakalinyenga.

¹¹ Bana ba bamyene ba ku Zowani benga bakuyeba shikuma, kami bankongo ba kukeya ba Fwalo wa Engepita babelanga byowa. Haya mu kutwesha kwamba nahiti kuli Fwalo ngayi, “Ami nili umo wa bantu bangana, mwana wa bamyene ba ku shikale”?

¹² Obe Fwalo wa Engepita, bangana bobe balikuti? Ngayi mwanga bakutongweze naku ku shimikila ebye anafungu Nyambi wa Makunge ha litunga lya Engepita.

¹³ Babilolo ba ku Zowani bengakale byowa, bakakutwaminina ba ku Memfwishi banongeziwi, baya benga zimpangwa ku bantu, banashanwishi Engepita.

¹⁴ Nyambi ya Ngula, unayitili mumwabo moyo wakubaluwanganisha. Ba ku shanwisha Engepita muntendelo yabo nimwayo, ngonehe mukakukolwa malovu atalangilanga aha analukili.

¹⁵ Kowa hinge umo mukakutwaminina hinge mukakukonka, wamunene hinge wamushe ou ukutwesha kutenda shamina mu Engepita.

Engepita ukalemesha Nyambi ya Ngula

¹⁶ Ha mutena uyo, Baengepita bakenga ngo bambuyama. Bakatina na kukanka, ndaba Nyambi wa Makunge, ukakatula liboko lyendi na kubashushula.

¹⁷ Baka Engepita bakekala na mutentu ku baka Yunda, ndaba yanebye akatenda Nyambi wa Makunge kukwabo.

¹⁸ Ha mutena uyo kukekala zinkena mutanu mu litunga lya Engepita, muya bakamba mushobo wa mu Kenaani na kulemesha Nyambi wa Makunge. Umo wa neze zinkena, ukatumbiwa ngayi, “Lukena lwa mutena.”

¹⁹ Ha mutena uyo, kukekala kaala ka mamanya ka Nyambi ya Ngula mu litunga lya Engepita, pe ku nginza ya litunga, kukekala mpangwa ya Nyambi ya Ngula.

²⁰ Ebye bikenga bilimukisho na wupaki ngayi Nyambi wa Makunge uli mu litunga lya Engepita. Oho bakakalokela kuli Nyambi ya Ngula, ndaba ngayi kuli ba kubayandisha, pe ukabatumina mupulwishi uya ukabalwila na ku balamwina.

²¹ Nyambi ya Ngula ukaliholola ku ba Engepita. Kami ba Engepita bakalimuka Nyambi ya Ngula ha mutena uyo, pe bakamulemesha na zintupu za kuhokesha na zinkombela. Bakalibeza kuli Nyambi ya Ngula, pe bakatenda ebye bakakulupisha.

²² Nyambi ya Ngula ukashushula ba Engepita, ngoboni kami ukabanyongomanisha. Oho bakatengulukila kuli Nyambi ya Ngula, ukakumbula malombelo wabo, pe ukabanyongomanisha.

²³ Ha mutena uyo, kukekala mukwakwa wawunene mukati ka Engepita na Ashiliya, kami Baashiliya bakaya ku Engepita na ba Engepita, bakaya ku Ashiliya. Ba Engepita na Baashiliya, nimwabo bakalemesha hamo Nyambi.

²⁴ Ha mutena uyo, Ishalela ukenga wawuhatu, hamo na Engepita na Ashiliya, bakekala na mfuywezi hano hanci.

²⁵ Nyambi wa Makunge ukabatandalisha na kwamba ngayi, “Bali na mfuywezi bantu bami baka Engepita na Ashiliya mulimo wa maboko ami na Ishalela likona lyami.”