Ishaya 18 - Libuka Lya Kuyela

Nyambi ukashushula Etopya

¹ Makando ku bantu bekala mu litunga lya ha nciza ya mishinzi ya Etopya! Kukuyuvwanika mungunina wa mbando.

² Olyo likutuma bankamba baliyavwishilenga mato a matete ha kupita mu mushinzi wa Nayilo. Endeshenu, yenu enu bantumwana ba lubilo, ku matunga akwakutali akulembuka, ku bantu ba kutinisha bali hahepi naba balikwakutali, litunga lya ngovu likakoma litunga lya tapuliwa na mishinzi.

³ Nimwenu enu bantu mwekala mu kaye, enu mwazika hano hanci, ndembela oho yikazikiwa hayilu ya mapili mu kuyimona, pe oho mpandula yikavuma, mukayiyuvwa.

⁴ Eshe nisho akwamba Nyambi ya Ngula kukwami ngayi, “Nikekala mu ku mwena mu mwanya wami, hinga napenza ku mwaana oho kwashakale, na mume wa mbundu ukutuka ha shikati sha kuteza.”

⁵ Ndaba shikati sha kuteza oho shilolo shikume, oho ntemo zatotomokakale, na maluba afutukakale mikabo ya shinyanca ya kuhoka, Nyambi ukaketozola myahi na zimpoko kami ukaketozola na kuyumba myahi ya kuhalaba.

⁶ Nimwabo ba kashiyiwa ku tuyoni twalyanga nyama twa ku mapili na tunzama, pe tuyoni tu ka balya mayinza nimwawo, na tunzama tu ka balya mupepo nimwawo.

⁷ Ha shikati shiyo ntupu yikaletiwa kuli Nyambi wa Makunge kufuma ku bantu babatali ba kulembuka bikonde, na bantu ba kutinishiwa ba hahepi na bakwakutali, litunga lya ngovu likakoma litunga lya tapululiwa na mishinzi, ntupu yikaletiwa ku lipili lya Ziyoni, oku bantu bakulemesha Nyambi wa Makunge.