Ishaya 15 - Libuka Lya Kuyela

Ncango zaha Mowambi

¹ Eze nizo ncango zaha litunga lya Mowambi. Mwa shikuma wushiku umo tuhu bamalamo banalobeshe nkambe ya, Kili Mowambi hi lipembe. Mwa shikuma wushiku umo tuhu bamalamo banalobeshe nkambe ya Ali na Kili, Mowambi hi lipembe.

² Bantu bamu Ndimboni banakukankalala ku myanya ya kulemeshela ha binkanda na ku lililako. Mowambi ukutuwa mbingo ha zinkambe za Nembo na Mendeba. Ku mitwe yabo nimwayo banayishehe, na milevu nimwayo banayitewulu.

³ Mu mikwakwa bantu banavwala mashaka, bantu hayilu ya matala namu zimbanza ba kutuwa mbingo na kuhopoka mu zinyutu na kupwezuma kulila.

⁴ Bantu bamu Heshimboni na Eliyale ba kukaloka, mazu wabo akutwesha kuyuvwanika naku Yahazi, nohobene bakanzita ba ku Mowambi bakakaloka, na kutina shikuma.

⁵ Mutima wami uli na kulilila Mowambi, bantu bamu Mowambi baya banapanza banatini kukakuma naku Zowa, naku Engilata Shelishiya. Bakukankalala mu nzila yaku Luhiti, hibaya na kulila. Bamina bakatinina ku Holonayimu, bakaya hibatuwa mbingo za wunginga wakulobeshiwa.

⁶ Mema a Nimolima anayumu, pe mwila unalebuku kami kowa binakumena.

⁷ Nohobene wushe wa wuheti wabo na byuma bakowezelenga, bana kubitwala mu nciza ya Kashinzi ka Matoya.

⁸ Mwa shikuma lukuwa luna kuyuvwanika mu litunga lya Mowambi nimwamo, na mbingo zinakakumu ku minzi yamu Engilayimu namu Mbelelimu.

⁹ Mwa shikuma mema amu Ndimboni anafubili na mukeza, hinge noho nikaleta byuma byabingi shikuma ha Ndimboni. Nikabatumina shimbwi bantu nimwabo baya bapanzile mu Mowambi, naku baya bashalile mu litunga.