Ishaya 13 - Libuka Lya Kuyela

Kushushuliwa kwa Mbambiloni

¹ Eze nizo ncango Ishaya mwana Amozi amonene ha Mbambiloni.

² Katula ndembela ya shimonekesho ha lipili ha kubula mitondo! Bilikiza ku bakanzita. Behane na ku balabiza, ngayi bengine mu mapangati a babilolo babalemu.

³ Ninatumizi banzita bami ninatapululu, ninehana balume bami ba kushuma ngayi batende bya wukali wami, baya bawahililanga mu kukoma kwami.

⁴ Yuvwililenu, miyoyo ha mapili! Yikushowela ngo miyoyo ya likunge lyalinene. Yuvwililenu mishunga mukati ka wene, yikwinga ngonehe matunga analikungwili hamo! Nyambi wa Makunge ukukungulula bakanzita bendi kuya ku nzita.

⁵ Bakufuma ku litunga lya kwakutali, kwakumina kaye. Banengi bilwisho bya Nyambi ya Ngula kutenda wukali wendi, mu kulobesha hanci nimwaho.

⁶ Shikokenu na kulila! Mutena wa Nyambi ya Ngula uli hahepi. Unengi mutena ou Mpandashilanga akaleta kulobesha.

⁷ Nohobene maboko nimwawo akapopa, pe mutima wa muntu nimwendi ukafumamo.

⁸ Nimwabo bakalikomokela, bakayanda na kuyuvwa kukola, ngonehe mbuyama uli na ku shalaho. Bakalipenza umo na wamina na bowa, zimpala zabo zikahomba na lisheni.

⁹ Monenu, mutena wa Nyambi ya Ngula uli na kwiza, mutena wanguma wa wukali na kutinisha, Nyambi ya Ngula ukafutula hanci lipembe, na kulobesha baka wubi.

¹⁰ Nyenye nimwazo na mulalanginza mu mbimbayilu bifwako kukapana wezi. Mutena ukashipa oho ukatutika na ngonda kukapana wezi ufwako.

¹¹ Nyambi ya Ngula ukwamba ngayi, “Nikashushula kaye ndaba ya byabibi byako na bakuluwa ha wubi wabo, nikamanisha kuliyemeza kwa bakakulilundumika, na ku shepesha kuliyemeza kwa bakanguma.

¹² Nikengisha bantu bakashalaho kwinga babakalu kubawana, kupitakana kuwana ngolinde ya Ofwila.

¹³ Nohobene nikakankisha mayilu, kami hanci hakanyenkana kufuma ha mwanya wako, nimwabyo ebye bikatendiwa oho, Ami Nyambi wa Makunge nikamonesha wukali wami ha mutena wakutininsha wakupilama kwami.”

¹⁴ Bantu nimwabo bali mu Mbambiloni baketukila ku matunga wabo, bakapanzana ngonehe bahonge ba kutina shibinda, hinge ngonehe bambelele bakubula mulishani.

¹⁵ Ou nimwendi ukuwaniwa, ukashwangiwa mampulwa, kami ou nimwendi ukukwatiwa, ukazihiwa na mukwale.

¹⁶ Bana babo bakabancancola ku meho wabo, matala wabo akapukuliwa, bakazabo bakabakandamika kulala nabo.

¹⁷ Nyambi ya Ngula ukwamba ngayi, “Monenu, nili na kutumeza Bamendiya aba babula kufulankana bya shiliva, kami babula kutwala ngolinde ku mitima yabo ngayi balwishe Mbambiloniya.

¹⁸ Bakaziha bandumbana na bipando byabo bya mukunzi, kukayuvwila nceshe bambututu bafwako, meho wabo kukapenza batwanuke na shikeketima bafwako.

¹⁹ Mbambiloni waya mpupo ku wene nimwawo, wenga wamuwahe, ou baliyemezela Bakelondiya, ngoboni Nyambi ukalilobesha, ngonehe atendele ku Shondoma na Ngomola.

²⁰ Bantu bafwako kukekalamo kami kutwala naku bihemunwino nimwabyo. Kowa nyambangizi ukazikamo ntanda yendi, kami kowa balishani bakalangikamo matanga wabo.

²¹ Ukenga mwanya wa bamimbwe bamu libelelengwa, namu matala wabo mukenzala na makungulu, mukenga mwakwikalanga bayimpye, na bampongo ba lishaka bakashambilamo.

²² Ba mitambwe bakambolomokela ha tupeshi twabo, pe bamimbwe bakabozela mu misheke yayiwahe. Shikati sha Mbambiloni shili hahepi na matena wendi ali hahepi na kumana.”